អន្តរជាតិ
នយោបាយអន្តរជាតិ
នាយករដ្ឋមន្ត្រីចិនអញ្ជើញនាយករដ្ឋមន្ត្រីក្រិកទៅទស្សនកិច្ចនៅចិន
×
នៅថ្ងៃពុធម្សិលមិញ នាយករដ្ឋមន្ត្រីចិន លី ខឺឈាំង បានទូរសព្ទទៅអបអរសាទរ កោតសរសើរលោកអាឡិចស៊ិស ស៊ីប្រា ដែលបានទទួលជោគជ័យក្នុងការបោះឆ្នោតសភាក្រិក កាលពីថ្ងៃ២៥មករា។ លោកលីបានអញ្ជើញលោកស៊ីប្រាស ទៅទស្សនកិច្ចប្រទេសចិន។ ចិនចង់ពង្រីកទំនាក់ទំនងជាមួយក្រិកអោយកាន់តែខ្លាំងក្លាថែមទៀត។
មុនត្រូវបានរដ្ឋាភិបាលចិនអញ្ជើញអោយទៅបំពេញទស្សនកិច្ចក្រុងប៉េកាំង នាយករដ្ឋមន្ត្រីក្រិក អាឡិចស៊ិស ស៊ីប្រា ក៏ត្រូវបានរុស្ស៊ីអញ្ជើញអោយទៅទស្សនកិច្ចក្រុងម៉ូស្គូ ដើម្បីចូលរួមថ្ងៃបុណ្យជាតិរុស្ស៊ី ក្នុងខែឧសភាខាងមុខនេះហើយដែរ។ គេនៅមិនទាន់ដឹងថា តើពេលណា លោកស៊ីប្រា នឹងធ្វើដំណើរទៅលេងចិនតាមការអញ្ជើញរបស់លោកលីនៅឡើយទេ។ ប៉ុន្តែ គណៈប្រតិភូក្រិកនឹងទៅទស្សនកិច្ចនៅចិន ដើម្បីរៀបចំដំណើរទស្សនកិច្ចរបស់លោកស៊ីប្រា។
ក្នុងការពិភាក្សាតាមទូរសព្ទម្សិលមិញ នាយករដ្ឋមន្ត្រីក្រិកនិងនាយករដ្ឋមន្ត្រីចិន បានលើកឡើងពីការធ្វើយ៉ាងណាអោយកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវប្បធម៌រវាងប្រទេសទាំង២ ទទួលបានភាពស៊ីជំរៅថែមទៀត។ ម្សិលមិញ អ្នកនាំពាក្យក្រសួងការបរទេសចិនបានលើកឡើងថា រដ្ឋាភិបាលចិនចង់ធ្វើការជាមួយរដ្ឋាភិបាលថ្មីរបស់ក្រិក ដើម្បីសម្រេចភាពជាដៃគូពេញលេញរវាងចិននិងក្រិក។ ប៉ុន្មានឆ្នាំចុងក្រោយនេះ ចិនបានក្លាយជាដៃគូវិនិយោគដ៏ចំបងមួយរបស់ក្រិក។
ក្រុមហ៊ុនចិនឈ្មោះថា Coscoបានទទួលសម្បទានទីកន្លែងកុងតឺណឺចំនួន២ នៅកំពង់ផែចំបងឈ្មោះថាPiréeនៅជិតក្រុងអាថែន។ ក្រុមហ៊ុននេះក៏ចង់ទិញភាគហ៊ុន៦៧ភាគរយរបស់រដ្ឋក្រិក ក្នុងកំពង់ផែនេះដែរ។ ប៉ុន្តែរដ្ឋាភិបាលក្រិកដែលទើបជាប់ឆ្នោតថ្មី បានប្រកាសព្យួរគម្រោងលក់កម្មសិទ្ធិរដ្ឋចោលទៅវិញ។ ទោះយ៉ាងនេះក្តី នាយករដ្ឋមន្ត្រីចិនបានអះអាងទៅនាយករដ្ឋមន្ត្រីក្រិកថ្មីថា សហគ្រាសចិនក៏ចាប់អារម្មណ៍លើរឿងវិនិយោគថ្មីផ្សេងៗនៅក្រិក ហើយចង់ពង្រីកការវិនិយោគផ្សេងៗដែរ។
ពេលនេះ រដ្ឋាភិបាលលោកស៊ីប្រាហាក់ចាប់អារម្មណ៍ចងមិត្តភាពជាមួយចិននិងរុស្ស៊ីកាន់តែខ្លាំង ខណៈក្រិកកំពុងចរចាយ៉ាងលំបាកជាមួយសហភាពអឺរ៉ិប រកវីធីបន្ធូរបន្ថយបំណុលជាតិ។ ម្ចាស់បំណុលក្រិកមិនចង់កាត់បន្ថយបំណុលអោយក្រិកទេ។ កាលពីថ្ងៃអង្គារ រដ្ឋមន្ត្រីការពារជាតិក្រិក លោក PanosKammenosបានបង្ហើបថា បើការចរចាបំណុលទទួលបរាជ័យ ក្រិកប្រហែលជាអាចនឹងរកថវិកាពីចិន អាមេរិក រុស្ស៊ី រឺក៏ប្រទេសផ្សេងៗទៀត ដើម្បីដោះស្រាយវិបត្តិ។ ប៉ុន្តែ ក្រសួងការបរទេសក្រិកបានចេញមុខបញ្ជាក់ឡើងវិញថា នេះគ្រាន់តែជាការគិតរបស់លោកKammenosផ្ទាល់ខ្លួនប៉ុណ្ណោះ ហើយថា សហភាពអឺរ៉ុបនៅតែជាដៃគូពិសេសរបស់ក្រិកដដែល៕
© រក្សាសិទ្ធិដោយ thmeythmey.com