ជាតិ
សង្គមជាតិ
×![]()
ដោយ: ខន ចំប៉ា
មជ្ឈមណ្ឌលជាតិផ្តល់ឈាមនឹងរៀបចំយុទ្ធនាការអប់រំនិងទទួលអំណោយឈាមនៅទីលានប្រជាធិបតេយ្យ រយៈពេលពេញមួយថ្ងៃទី១៤កុម្ភៈចាប់ពីម៉ោង៨ព្រឹករហូតដល់ម៉ោង៤កន្លះ«ផ្តល់ឈាម ផ្តល់ក្តីស្រឡាញ់»គឺជាប្រធានបទនៃយុទ្ធនាការនៅថ្ងៃស្អែកនេះ។ប្រធានមជ្ឈមណ្ឌលជាតិផ្តល់ឈាមលោកហុកគឹមចេង រំពឹងទុកថា មជ្ឈមណ្ឌលនឹងទទួលបានឈាមជាង ៣ រយប្លោកក្នុងយុទ្ធនាការនេះ ។
ការបរិច្ចាគឈាមគឺជាការបង្ហាញក្តីស្រឡាញ់ចំពោះមនុស្សជាទីស្រឡាញ់ក៏ដូចជាជនរងគ្រោះ។នេះជាប្រសាសន៍របស់ប្រធានមជ្ឈមណ្ឌលជាតិផ្តល់ឈាម។លោកហុកគឹមចេងរំពឹងថា មជ្ឈមណ្ឌលនឹងទទួលបានអំណោយឈាមពីសប្បុរសជនច្រើនជាង៣០០ប្លោកនៅក្នុងយុទ្ធនាការនៅថ្ងៃស្អែកនេះ ខណៈកាលពីថ្ងៃទី១៤កុម្ភៈឆ្នាំ២០១៤មជ្ឈមណ្ឌលជាតិផ្តល់ឈាមទទួលបានអំណោយឈាមចំនួន៣២៩ប្លោក។
បើតាម លោកហុកគឹមចេងនេះជាឆ្នាំទី៣ហើយដែលមជ្ឈមណ្ឌលជាតិផ្តល់ឈាមរៀបចំយុទ្ធនាការទទួលអំណោយឈាមនៅថ្ងៃទី១៤កុម្ភៈដែលគេស្គាល់ថាជាថ្ងៃនៃសេចក្តីស្រឡាញ់។លោកថា យុទ្ធនាការអប់រំនិងទទួលអំណោយនេះរៀបចំឡើងក្នុងគោលបំណងជំរុញឲ្យយុវជនយល់ដឹងពីអត្ថប្រយោជន៍នៃការបរិច្ចាគឈាមនិងចូលរួមក្នុងសកម្មភាពមនុស្សធម៌គឺការបរិច្ចាគឈាមដោយស្ម័គ្រចិត្តទាំងអស់គ្នា។
បើតាមគម្រោង មជ្ឈមណ្ឌលជាតិផ្តល់ឈាមនឹងប្រមូលអំណោយឈាមឲ្យបានចំនួន៦ម៉ឺនប្លោកដើម្បីផ្គត់ផ្គង់តម្រូវឈាមនៅទូទាំងប្រទេសក្នុងនោះមជ្ឈមណ្ឌលជាតិផ្តល់ឈាមសង្ឃឹមថានឹងមានឈាមប្រមាណ៥០ភាគរយជាឈាមបានមកពីការបរិច្ចាគដោយស្ម័គ្រចិត្ត។បើតាមការសិក្សារបស់មជ្ឈមណ្ឌលនេះ បច្ចុប្បន្នការបរិច្ចាគឈាមដោយស្ម័គ្រចិត្តមានតែជាង៣៥ភាគរយប៉ុណ្ណោះចំណែក៦៥ភាគរយទៀតជាការដោះដូរអំណោយឈាមតាមរយៈសាច់ញាតិអ្នកជំងឺខណៈដែលកម្ពុជាត្រូវការឈាមចំនួន១៥០ប្លោកក្នុងមួយថ្ងៃដើម្បីសង្គ្រោះជីវិតមនុស្ស។
នៅក្នុងឆ្នាំ២០១៤កន្លងទៅមជ្ឈមណ្ឌលជាតិផ្តល់ឈាម(NBTC) ប្រមូលបានឈាមបរិច្ចាគសរុបចំនួន៥២,៨៦៧ប្លោកនៅទូទាំងប្រទេសក្នុងនោះឈាមដែលបរិច្ចាគតាមការស្ម័គ្រចិត្តមានចំនួន១៧,៧៩០ប្លោកស្នើនឹង៣៣.៨ភាគរយនៃឈាមដែលប្រមូលបាន។ដោយឡែកនៅទីក្រុងភ្នំពេញមជ្ឈមណ្ឌលជាតិផ្តល់ឈាមប្រមូលបានឈាមបរិច្ចាគសរុបចំនួន៣២,៦៤៨ប្លោកក្នុងនោះឈាមដែលបរិច្ចាគតាមការស្ម័គ្រចិត្តមានចំនួន១២,៣៤៦ប្លោកស្នើនឹងជាង៣៧.៨ភាគរយនៃឈាមដែលបរិច្ចាគសរុប៕
© រក្សាសិទ្ធិដោយ thmeythmey.com
