ជាតិ
នយោបាយជាតិ
លោក អាឡិច៖ ការមិនបន្ដទិដ្ឋាការឲ្យខ្ញុំ គឺមកពីរដ្ឋាភិបាលកម្ពុជាមិនចង់ឲ្យខ្ញុំរស់នៅទីនេះ ![](https://image.thmeythmey.com/pictures/2015/02/14/alejandro_ganzalez_davidson.png)
×![]()
ប្រធានចលនាមាតាធម្មជាតិ លោក អាឡិច ហ្គន់សាឡេស (Alejandro Ganzalez Davidson) ដែលជាអ្នកតស៊ូមតិយ៉ាងខ្លាំងក្លា ប្រឆាំងនឹងការសង់ទំបន់អគ្គិសនីតំបន់អារ៉ែង បានឲ្យដឹងថា ខ្លួននឹងអាចចាកចេញពីប្រទេសកម្ពុជា បើសិនជានាយកដ្ឋានអន្តោប្រវេសន៍ មិនបន្តទិដ្ឋាការឲ្យរូបលោកបន្តរស់នៅលើទឹកដីកម្ពុជា ។ លោក អាឡិច អះអាងទៀតថា ការមិនបន្ដទិដ្ឋាការឲ្យរូបលោក គឺអាចមកពីបុគ្គលមួយចំនួនក្នុងរដ្ឋាភិបាលមិនចង់ឲ្យរូបលោករស់នៅប្រទេសកម្ពុជាបន្ដទៀត។ ចំពោះបញ្ហានេះលោក ខៀវ សុភ័គ អ្នកនាំពាក្យក្រសួងមហាផ្ទៃ អះអាងថា នេះគឺសិទ្ធិរបស់សាមីប្រទេស ក្នុងការសម្រេចទៅលើជនបរទេស ដែលមករស់នៅប្រទេសកម្ពុជា។
ជនបរទេសសញ្ជាតិអេស្ប៉ាញ ដែលបានមករស់នៅប្រទេសកម្ពុជាអស់រយៈពេលជាង១០ឆ្នាំមកហើយ លោក អាឡិច ហ្គន់សាឡេស បានប្រាប់សារព័ត៌មានថ្មីៗនៅថ្ងៃនេះឲ្យដឹងថា ខ្លួននឹងអាចចាកចេញពីប្រទេសកម្ពុជា បើសិនជានាយកដ្ឋានអន្តោប្រវេសន៍ មិនបន្តទិដ្ឋាការឲ្យរូបលោកបន្តរស់នៅលើទឹកដីកម្ពុជា។
លោក អាឡិច ដែលជាអ្នកតស៊ូមតិយ៉ាងខ្លាំងក្លា ប្រឆាំងនឹងការសាងសង់ទំបន់អគ្គិសនីតំបន់អារ៉ែង អះអាងថា ក្នុងករណីនាយកដ្ឋានអន្តោប្រវេសន៍ មិនបន្ដទិដ្ឋាការជូនរូបលោក នេះអាចជាសញ្ញានៃការគំរាមកន្លងមក ដែលមានបុគ្គលមួយចំនួននៅក្នុងជួររដ្ឋាភិបាល មិនចង់ឲ្យរូបលោករស់នៅបន្ដក្នុងប្រទេសកម្ពុជា ។
ប្រធានចលនាមាតាធម្មជាតិរូបនេះពន្យល់យ៉ាងដូច្នេះថា៖«ទិដ្ឋាការខ្ញុំនឹងអស់សុពលភាពនៅថ្ងៃទី២០កុម្ភៈខាងមុខនេះ ប៉ុន្ដែខ្ញុំបានស្នើទៅតាមក្រសួងអន្តោប្រវេសន៍ តាមរយៈភ្នាក់ងាររត់ការ ប៉ុន្ដែឮដំណឹងថា ប្រហែលគេមិនបន្ដទិដ្ឋាការឲ្យខ្ញុំទេ ដោយក្រសួងតម្រូវឲ្យខ្ញុំទៅជួបគេសិន ។ បើសិនជាគេមិនបន្ដទិដ្ឋាការឲ្យខ្ញុំ ១០០ភាគរយ គឺអាចបណ្ដាលមកពីមានបុគ្គលមួយចំនួន នៅក្នុងរដ្ឋាភិបាលមិនចង់ឲ្យខ្ញុំរស់នៅកម្ពុជាបន្ដ ព្រោះគេឃើញថាខ្ញុំតែងចេញតស៊ូមតិការពារតំបន់អារ៉ែងនេះ ដែលអាចប៉ះពាល់បាត់បង់ដល់ប្រយោជន៍បុគ្គលទាំងនោះ។
កន្លងមកលោក ឈាង វុន មន្ត្រីគណបក្សប្រជាជនកម្ពុជា ធ្លាប់បានគំរាមបណ្ដេញលោក អាឡិច ដែលជាសកម្មជនអ្នកការពារព្រៃឈើតំបន់អារ៉ែងខេត្តកោះកុង ចេញពីប្រទេសកម្ពុជា ដោយកាលនោះលោក ឈាង វុន ចោទបុរសជនជាតិអេស្ប៉ាញរូបនេះថាបានលូកដៃចូលកិច្ចការផ្ទៃក្នុងរដ្ឋាភិបាលកម្ពុជា ។
តែយ៉ាងណាក៏ដោយ បញ្ហានេះត្រូវបានលោក ខៀវ សុភ័គ អ្នកនាំពាក្យក្រសួងមហាផ្ទៃ មានប្រសាសន៍ថា ការបន្ដទិដ្ឋាការ ឬ មិនបន្ដទិដ្ឋាការជូនជនបរទេសណាមួយ នោះគឺសិទ្ធិរបស់សាមីប្រទេស ក្នុងការសម្រេចទៅលើជនបរទេស ដែលមករស់នៅប្រទេសកម្ពុជា។ អ្នកនាំពាក្យរូបនេះបន្ថែមថា៖«ជនជាតិអេស្បាញនេះអស់ទិដ្ឋាការ ដូចនេះការសុំបន្ដ មិនមែនចេះតែបន្ដឲ្យទេ គឺអាស្រ័យលើសាមីប្រទេសកម្ពុជា ដែលសម្រេច»។
ទន្ទឹមនឹងនេះលោក ខៀវ សុភ័គ បានវាយតម្លៃសកម្មភាពរបស់លោក អាឡិចកន្លងមក ដោយលោកបានផ្លែផ្កាដូច្នេះថា «យើងឃើញថាសកម្មភាពជនបរទេសនេះ ស្រលាញ់ខ្មែរជាងប្រជាពលរដ្ឋខ្មែរទៀត។ ស្ដេចខ្មែរច្រើនណាស់ ដែលសុគតដោយសារជនបរទេស»។
ទាក់ទងនឹងបញ្ហានេះមន្ត្រីការពារសិទ្ធិមនុស្សសមាគមអាដហុក លោក នី ចរិយា យល់ឃើញថា ក្នុងករណីដែលនាយកដ្ឋានអន្តោប្រវេសន៍ មិនបន្តទិដ្ឋាការឲ្យជនជាតិអេស្បាញនោះ គឺអាចបណ្ដាលមកពីរដ្ឋាភិបាលកម្ពុជា មិនពេញចិត្តនិងសកម្មភាពរបស់លោក អាឡិច ដែលតែងតែចូលរួមសកម្មភាពនានា ក្នុងការការពារតំបន់អារ៉ែងកន្លងមក។ ហើយលោកថា ការមិនផ្ដល់ទិដ្ឋាការជូនលោក អាឡិចនេះ អាចជាការរើសអើងជាតិសាសន៍ ដែលផ្ទុយពីច្បាប់អន្តរជាតិផងដែរ។
លោកបន្ថែមថា៖«យើងឃើញថា ប្រធានចលនាមាតាធម្មជាតិរូបនេះ កន្លងមករូបគេបានចូលរួមការពារបរិស្ថាន និងការចូលរួមអភិវឌ្ឍន៏ប្រទេស ដូចនេះរដ្ឋាភិបាលគួរតែផ្ដល់ទិដ្ឋាការរស់នៅកម្ពុជាបន្ដជូនជនបរទេសនេះ។ តែបើសិនជានាយកដ្ឋានអន្តោប្រវេសន៍ មិនផ្ដល់ទិដ្ឋាការជូនលោកអាឡិច នេះអាចជាការរើសអើងជាតិសាសន៍ ដែលផ្ទុយពីច្បាប់អន្តរជាតិ។ ហើយនេះអាចជារឿងនយោបាយ ដោយសាររដ្ឋាភិបាលមិនពេញចិត្តចំពោះអាឡិច ព្រោះយើងឃើញថាលោក អាឡិចជនជាតិអេស្បាញនេះ បានចូលរួមសកម្មភាពនានាការពារតំបន់អារ៉ែងដែលប្រឆាំងនិងរដ្ឋាភិបាលកន្លងមក»។
បើតាមមន្ត្រីការពារសិទ្ធមនុស្សរូបនេះ ក្នុងករណីរដ្ឋាភិបាល ក៏ដូចជានាយកដ្ឋានអន្តោប្រវេសន៍ មិនអាចផ្ដល់ទិដ្ឋាការបន្ដជូនលោក អាឡិច លុះត្រាតែជនបរទេសរូបនេះ បានប្រព្រឹត្តិបទល្មើសដែលបានចែងនៅក្នុងច្បាប់អន្តោប្រវេសន៍ ៕
© រក្សាសិទ្ធិដោយ thmeythmey.com