ជាតិ
សេដ្ឋកិច្ច
ឥណ្ឌាបើកសម្ពោធពិព័រណ៌ផលិតផលសិប្បកម្មលើកទី៣៩នៅក្នុងទីក្រុងញូវដេលី ![](https://image.thmeythmey.com/pictures/2015/02/17/1722015143341india.jpg)
×![]()
ញូវដេលី-ឥណ្ឌា៖ ក្រុមប្រឹក្សាលើកកម្ពស់ការនាំចេញផលិតផលសិប្បកម្មឥណ្ឌា (EPCH) ធ្វើការរៀបចំពិព័រណ៌និទាឃរដូវ Indian Handicrafts & Gifts Fair [ SPRING] លើកទី៣៩ ចាប់ពីថ្ងៃទី២០ដល់ថ្ងៃទី២៣ ខែកុម្ភៈ ឆ្នាំ២០១៥ នៅមជ្ឈមណ្ឌល India Expo Centre & Mart ក្នុងទីក្រុងញូវដេលី។ ពិព័រណ៌ផលិតផលសិប្បកម្ម និងវត្ថុអនុស្សាវរីយ៍ នេះ មានការចូលរួមពីសមាជិកដែលដៃគូនាំចេញប្រមាណ៧២០០ ។
Indian Handicrafts & Gifts Fair (IHGF) បានជាពិព័រណ៌សិប្បកម្ម និងវត្ថុអនុស្សាវរីយ៍ដ៏ធំមួយនៅក្នុងទ្វីបអាស៊ី ដែលដំណើរអស់រយៈពេលជាង២០ឆ្នាំ ដោយក្រុមប្រឹក្សា EPCH ដែលបង្កើតឡើងកាលពីឆ្នាំ១៩៨៦ ។ ចាប់ពីឆ្នាំ១៩៩៤មក ក្រុមប្រឹក្សា EPCH បានសម្រេចរៀបចំពិព័រណ៌ IHGF ចំនួន២ដងក្នុងមួយឆ្នាំ។
ស្នាដៃសិប្បកម្ម វត្ថុអនុស្សាវរីយ៍ និងសម្ភារតុបតែង ដែលដាក់បង្ហាញក្នុងពិព័រណ៌រយៈពេល៤ថ្ងៃនៅក្នុងទីក្រុងញូវដេលី រួមមាន សម្ភារតុបតែងគេហដ្ឋាន គ្រឿងសង្ហារឹម សម្ភារតុបតែងនាឱកាសបុណ្យណូអែល ចង្កៀង អំពូលភ្លើង ផលិតផលការពារបរិដ្ឋានដែលធ្វើពីអំពៅ និងឬស្សី គ្រឿងអលង្ការ គ្រឿងបន្លាស់ កាបូប កំរាលព្រំ ផលិតផលធ្វើពីស្បែក គ្រឿងបន្លាស់បន្ទប់ទឹក ទៀន ធូប ជាដើម។
សម្រាប់ព្រឹត្តិការណ៍លើកទី៣៩នេះ លោក R.K.Verma អ្នកទទួលខុសត្រូវលើការរៀបចំពិព័រណ៌របស់ EPCH បានអះអាងថា នឹងមានការចូលរួមពីក្រុមហ៊ុន និងម្ចាស់សិប្បកម្មប្រមាណ២៤០០ ដែលត្រូវបានជ្រើសរើសនៅទូទាំងប្រទេសឥណ្ឌា។ បន្ថែមពីលើនេះ ដៃគូនាំចេញប្រមាណ៧២០០ រួមទាំងបណ្តាញព័ត៌មានអន្តរជាតិ ដែលក្នុងនោះ មានអ្នកព័ត៌មានសារព័ត៌មានថ្មីៗ ផងដែរនោះ ក៏មានវត្តមានផងដែរ។
កាលពីឆ្នាំមុន ព្រឹត្តិការណ៍ពិព័រណ៌ដែលមានឈ្មោះថា «IHGF-Delhi Fair Autumn 2014» ទាក់ទាញបានដៃគូនាំចេញប្រមាណ៦៩០០ ដែលមកពីប្រទេសចំនួន១១០ នៅលើពិភពលោក៕
© រក្សាសិទ្ធិដោយ thmeythmey.com