ជាតិ
សង្គមជាតិ
អាជ្ញាធរហាមបង្កសំឡេងផ្ទុះ និងលេងល្បែងស៊ីសង ក្នុងចូលឆ្នាំចិន-វៀតណាម ![](https://image.thmeythmey.com/pictures/2015/02/17/chinese_new.jpg)
×![]()
ដើម្បីរក្សាសន្ដិសុខ សុវត្ថិភាព សណ្ដាប់ធ្នាប់ និរបៀបរៀបរយសាធារណៈ ក្នុងឱកាសបុណ្យចូលឆ្នាំចិន - វៀតណាម ដែលប្រព្រឹត្តទៅនៅថ្ងៃទី១៨ ដល់ ថ្ងៃទី២១កុម្ភៈនេះ សាលារាជធានីភ្នំពេញ ហាមឃាត់មិនឲ្យមានការដុតផាវ កាំជ្រួច ឬបង្កសំឡេងផ្ទុះគ្រប់ប្រភេទនៅក្នុងពិធីបុណ្យនេះទេ។ មិនឲ្យលេងល្បែងគ្រប់ប្រភេទដែលមានលក្ខណៈស៊ីសង និងរាល់ការហែរក្បួនផ្សេងៗទាំងបែបសាសនា ឬប្រពៃណីដែលគ្មានការអនុញ្ញាតត្រូវហាមឃាត់។
ជាមួយគ្នានេះ អាជ្ញាធរមានសមត្ថកិច្ចត្រូវចាត់វិធានការឲ្យបានម៉ឺងម៉ាត់បំផុត កុំឲ្យមាននាំផាវ កាំជ្រួច ជាតិផ្ទុះគ្រប់ប្រភេទ និងត្រូវត្រួតពិនិត្យដកហូតវត្ថុទាំងនោះ ដែលមានទីតាំងលក់គ្រប់ទីកន្លែងនៅក្នុងរាជធានីភ្នំពេញ។ ជាពិសេសនៅកន្លែងសប្បាយ អង្គភាព រោងចក្រ សហគ្រានានា រក្សាសន្តិសុខ សណ្ដាប់ធ្នាប់សាធារណៈ និងត្រូវប្រុងប្រយ័ត្ននៅការអុជធូបទៀន ចរន្ដអគ្គិសនី ដែលអាចបង្កគ្រោះថ្នាក់អគ្គីភ័យកើតឡើងជាយថាហេតុ។
ស្នងការដ្ឋាននគរបាលជាតិ បញ្ជាការដ្ឋានកងរាជអាវុធហត្ថ និងបញ្ជាការដ្ឋានយោធាភូមិភាគពិសេស ត្រូវចេញបទបញ្ជាឲ្យបានម៉ត់ចត់ដល់កម្លាំងរបស់ខ្លួន ដើម្បីអនុវត្តឲ្យមានប្រសិទ្ធភាព។ ចំពោះអ្នកដែលប្រព្រឹត្តល្មើសបង្កឲ្យមានចលនាចលក្នុងសង្គមខុសពីសេចក្ដីណែនាំនេះ នឹងត្រូវផ្ដន្ទាទោសតាមច្បាប់ ៕
© រក្សាសិទ្ធិដោយ thmeythmey.com