ជាតិ
សង្គមជាតិ
លោក អាឡិច ៖ ខ្ញុំមិនចាកចេញពីកម្ពុជាមួយរយៈឡើយ ព្រោះខ្លាចមិនបានមកវិញ
×![]()
ដោយ: ធឿន បញ្ញាឬទិ្ធ
ប្រធានអង្គការចលនាមាតាធម្មជាតិ លោក អាឡិចហ្សង់ដ្រូ ហ្គន់សាឡេស បានអះអាងថា រូបលោកនឹងមិនចាកចេញពីប្រទេសកម្ពុជាដោយខ្លួនឯងនោះឡើយ បើទោះជាក្រសួងមហាផ្ទៃ តម្រូវឲ្យលោកត្រូវចាកចេញពីប្រទេសកម្ពុជាមួយរយៈក៏ដោយ ។ បើតាមជនជាតិអេស្បាញរូបនេះ មូលហេតុដែលរូបលោកមិនចាកចេញពីប្រទេសកម្ពុជានេះ គឺដោយសារលោកខ្លាចខ្លួនចាកចេញហើយ នឹងមិនអាចចូលមកប្រទេសកម្ពុជាវិញបាន។
បន្ទាប់ពីក្រសួងមហាផ្ទៃតម្រូវឲ្យខ្លួនចាកចេញពីប្រទេសកម្ពុជា មួយរយៈពេលខ្លីនៅពេលផុតកំណត់ទិដ្ឋាការស្នាក់នៅក្នុងប្រទេសកម្ពុជានោះ លោក អាឡិចហ្សង់ដ្រូ ហ្គន់សាឡេស បានបដិសេធភ្លាមៗថា រូបលោកនឹងមិនចាកចេញពីប្រទេសកម្ពុជាឡើយ ហើយរូបលោកនឹងបន្ដរស់នៅរហូតដល់អាជ្ញាធរចាប់បញ្ជូនខ្លួនចេញពីកម្ពុជា។ ការប្តេជ្ញាបែបនេះ ធ្វើឡើងក្រោយពីរូបលោកត្រូវប្រឈមមុខ នឹងការចាប់ខ្លួនបណ្ដេញចេញពីប្រទេសកម្ពុជានៅថ្ងៃទី២០កុម្ភៈ បន្ទាប់ពីរដ្ឋមន្ត្រីក្រសួងមហាផ្ទៃ លោក ស ខេង បានសម្រេចចិត្តមិនបន្តទិដ្ឋាការឲ្យលោករស់នៅកម្ពុជាទៀត។
ជនជាតិអេស្បាញរូបនេះ បញ្ជាក់ថាមូលហេតុដែលរូបលោកមិនចាកចេញពីប្រទេសកម្ពុជានេះ គឺដោយសារលោកបារម្ភថា នៅពេលរូបលោកចាកចេញហើយ នឹងមិនអាចចូលមកប្រទេសកម្ពុជាវិញបាន។លោកថា ការបង្គាប់ឲ្យលោកចាកចេញពីកម្ពុជាមួយរយៈពេលសិននេះ អាចជាល្បិចកល។ ដូចនេះលោកមិនជឿក្រសួងមហាផ្ទៃនោះទេ ។
ប្រធានអង្គការចលនាមាតាធម្មជាតិរូបនេះពន្យល់យ៉ាងដូច្នេះថា៖ «ខ្ញុំមិនចាកចេញពីកម្ពុជាមួយរយៈឡើយ ព្រោះខ្លាចមិនបានមកវិញ។ខ្ញុំមិនចាកចេញពីប្រទេសកម្ពុជាទេ លុះត្រាតែគេចាប់បញ្ជូនខ្ញុំចេញប្រទេសទើបខ្ញុំចាកចេញ ព្រោះខ្ញុំរស់នៅទីនេះយូរហើយ ខ្ញុំក៏ដូចជាប្រជាជនខ្មែរដទៃទៀតដែរ ដូចនេះទាល់តែចាប់បញ្ជូនខ្ញុំទើបបានខ្ញុំចាកចេញ ។ ហើយការបង្គាប់តម្រូវឲ្យខ្ញុំចាកចេញនេះ ខ្ញុំបានពិភាក្សាជាអង្គការសហប្រជាជាតិ និងអង្គការនានា យល់ឃើញថា នេះអាចជាលេសមួយដើម្បីបញ្ជូនខ្ញុំចេញទៅហើយ ហើយពេលខ្ញុំសុំចូលមកកម្ពុជាវិញ គេនឹងមិនឲ្យខ្ញុំចូលមកនោះទេ »។
បើតាមជនជាតិអេស្បាញរូបនេះ កន្លងមករូបលោកធ្លាប់សុំអន្តរាគមន៍ពីស្ថានកុងស៊ុលប្រទេសអេស្បាញ ស្ថិតនៅក្នុងប្រទេសថៃផងដែរ ប៉ុន្ដែអគ្គស្ថានកុងស៊ុល ក៏មិនអាចជួយដោះស្រាយបញ្ហានេះជូនរូបលោកបានឡើយ។
រដ្ឋមន្ត្រីក្រសួងមហាផ្ទៃស្ដីទី លោក ឯម សំអាន បានឆ្លើយតបលោក សម រង្ស៊ី ប្រធានក្រុមមតិភាគតិចក្នុងរដ្ឋសភា ដែលបានស្នើឲ្យក្រសួងមហាផ្ទៃបន្ដទិដ្ឋាការជូនលោក អាឡិច ថា ក្រសួងមហាផ្ទៃ តម្រូវឲ្យលោក អាឡិចហ្សង់ដ្រូ ហ្គន់សាឡេស ចាកចេញពីប្រទេសកម្ពុជាមួយរយៈពេលខ្លីនៅពេលផុតកំណត់ទិដ្ឋាការស្នាក់នៅ។ ក្រសួងមហាផ្ទៃបន្ដថា ពុំមានគោលការណ៍ហាមឃាត់លោក អាឡិច ក្នុងការចូលមកកម្ពុជាវិញនោះទេ ប្រសិនបើគាត់បានបំពេញបែបបទ និងមានលក្ខណៈសម្បត្តិគ្រប់គ្រាន់ ដូចជនអន្តោប្រវេសន៍ដទៃទៀត ស្របតាមគោលការណ៍ច្បាប់នៃប្រទេសកម្ពុជា។
កាលពីថ្ងៃទី១៨កុម្ភៈ លោក កឹម សុខា អនុប្រធានទី១នៃរដ្ឋសភា បានស្នើឲ្យព្រះមហាក្សត្រកម្ពុជា ជួយអន្តរាគមន៍ដល់រាជរដ្ឋាភិបាល ដើម្បីអនុញ្ញាតឲ្យលោក អាឡិច ប្រធានអង្គការចលនាមាតាធម្មជាតិរូបនេះ អាចស្នើសុំបន្ដទិដ្ឋាការរស់នៅ និងបំរើការងារនៅកម្ពុជា ដោយពុំចាំបាច់តម្រូវឲ្យចាកចេញជាមុនសិន ទើបបន្ដទិដ្ឋាការជាក្រោយនោះទេ។
លោកអាឡិច ជនជាតិអេស្បាញរូបនេះ បានមករស់នៅប្រទេសកម្ពុជាអស់រយៈពេល១២ឆ្នាំមកហើយ។ ហើយលោកអាឡិច គឺជាអ្នកតស៊ូមតិយ៉ាងខ្លាំងក្លា ប្រឆាំងនឹងរដ្ឋាភិបាលកម្ពុជាក្នុងការសាងសង់ទំបន់អគ្គិសនីតំបន់អារ៉ែង។ ចំពោះសកម្មភាពការពារតំបន់អារ៉ែងកន្លងមក លោក ឈាង វុន សមាជិកសភាគណបក្សប្រជាជនកម្ពុជា ធ្លាប់ព្រមានបណ្ដេញលោកអាឡិច ចេញពីប្រទេសកម្ពុជា ដោយកាលនោះលោក ឈាង វុន បានចោទបុរសជនជាតិអេស្ប៉ាញរូបនេះថា បានលូកដៃចូលកិច្ចការផ្ទៃក្នុងរដ្ឋាភិបាលកម្ពុជា ៕
© រក្សាសិទ្ធិដោយ thmeythmey.com
