ជាតិ
នយោបាយជាតិ
លោកនាយករដ្ឋមន្ត្រីនៅតែមានអំណាចលើតុលាការ ![](https://image.thmeythmey.com/pictures/2015/02/19/175_20140808001__w1g0368.jpg)
×![]()
អន្តរាគមន៍របស់លោកនាយករដ្ឋមន្ត្រី ហ៊ុន សែន ក្នុងសំណុំរឿងដោះលែងបណ្តោះអាសន្នឪពុកម្តាយថោង សារ៉ាត់ ហើយដែលឈានដល់ការផ្លាស់ប្តូរតំណែងប្រធានសាលាដំបូងរាជធានីភ្នំពេញនោះ បានទទួលការស្វាគមន៍ពីសង្គមស៊ីវិល។ ប៉ុន្តែពួកគេនៅតែមិនសប្បាយចិត្ត នៅពេលដែលនាយករដ្ឋមន្ត្រីដែលដឹកនាំនីតិប្រតិបត្តិមានអំណាចលើអំណាចតុលាការ។
ឥទ្ធិពលរបស់នាយករដ្ឋមន្ត្រី ហ៊ុន សែន ទៅលើតុលាការ និងទៅលើស្ថាប័ននីតិបញ្ញត្តិផងនោះ វាបានក្លាយជាប្រធានបទដែលសង្គមស៊ីវិលនៅប្រទេសកម្ពុជាបានស្គាល់យូរដែរហើយ។ ប៉ុន្តែការស្រែកស្នើអោយឧត្តមក្រុមប្រឹក្សានៃអង្គចៅក្រមស៊ើបអង្កេតលើការដោះលែងឪពុកម្តាយថោង សារ៉ាត់ ហើយដែលបានឈានដល់ការសម្រេចផ្លាស់ប្តូរប្រធានសាលាដំបូងរាជធានីភ្នំពេញ វាបានលេចចេញជាបញ្ហាមួយទៀតនៅក្នុងប្រព័ន្ធយុត្តិធម៌ នេះបើតាមការកត់សម្គាល់របស់លោក អ៊ូ វីរៈ អ្នកស្រាវជ្រាវឯករាជ្យមួយរូប។ អ្នកស្រាវជ្រាវដដែលនេះ ពន្យល់ថា លោកស្វាគមន៍អន្តរាគមន៍ ឬចំណាត់ការរបស់លោកនាយករដ្ឋមន្ត្រីដែលស្រែកជំរុញឲ្យមានការធ្វើអធិការកិច្ចក្នុងសំណុំរឿងក្តីក្តាំដែលដំណើរការដោយមិនធម្មតា។ ម្តងនេះ លោក អ៊ូ វីរៈ និយាយដល់ថា លោក ហ៊ុន សែន កំពុងអនុវត្តតាមនីតិវិធីទៀតផង។ ប៉ុន្តែសម្រាប់លោក វាគឺជានីតិវិធីដែលផ្ទុយនឹងរដ្ឋធម្មនុញ្ញ។
លោក អ៊ូ វីរៈ អត្ថាធិប្បាយយ៉ាងដូច្នេះថា៖«គាត់ (លោកនាយករដ្ឋមន្ត្រី) ស្រែកនេះ ឥតខុសទេ។ គាត់ធ្វើតាមនីតិវិធីហើយ។ តែជានីតិវិធីដែលដើរផ្ទុយពីរដ្ឋធម្មនុញ្ញកម្ពុជា។ ច្បាប់បីចុងក្រោយ ផ្តល់តម្លៃខ្លាំងដល់រដ្ឋមន្ត្រីក្រសួងយុត្តិធម៌ ដែលនៅក្រោមអំណាចនាយករដ្ឋមន្ត្រី។ ដូច្នេះអំណាចរបស់លោកនាយករដ្ឋបានឆ្លងដល់តុលាការហើយ»។ ត្រង់ចំនុចនេះ លោក អ៊ូ វីរៈ នៅតែទាមទារឲ្យមានការធ្វើវិសោធនកម្ម និងរុះរើសេចក្តីព្រាងច្បាប់ទាំងបីចុងក្រោយ ស្តីពីប្រព័ន្ធតុលាការឡើងវិញ។
លោកមេធាវី សុក សំអឿន ប្រធានអង្គការក្រុមអ្នកច្បាប់ការពារសិទ្ធិកម្ពុជា នៅតែមិនពេញចិត្តរូបភាពដ៏មានឥទ្ធិពលរបស់ប្រមុខរដ្ឋាភិបាលទៅលើវិស័យតុលាការ។ ចំងល់ដ៏សាមញ្ញមួយរបស់លោកមេធាវីគឺ ហេតុអ្វីបានជា ក្រុមប្រឹក្សានៃអង្គចៅក្រមផ្តើមធ្វើការភ្លាមៗ ក្រោយការប្រកាសរបស់លោកនាយករដ្ឋមន្ត្រី? លោកប្រាប់សារព័ត៌មានថ្មីៗ ថា៖«ពិបាកដែរ ពីមុនមានភស្តុតាងគ្រាប់គ្រាន់ម៉េចក៏មិនចាត់ការភ្លាមៗ ចាំបាច់មានការស្នើសុំពីសម្តេច នាយករដ្ឋមន្ត្រី ហ៊ុន សែន ទើបចាត់ការ? ធ្វើបែបនេះស្ថាប័នតុលាការអត់មានប្រសិទ្ធភាពសោះ»។
គួរបញ្ជាក់ថា បន្ទាប់ពីប្រតិកម្មជាលើកដំបូងរបស់លោកនាយករដ្ឋមន្ត្រី ហ៊ុន សែន លើករណីដោះលែងឪពុកម្តាយលោក ថោងសារ៉ាត់ នោះ ឧត្តមក្រុមប្រឹក្សានៃអង្គចៅក្រមបានកោះប្រជុំជាបន្ទាន់មួយសម្រេចដកតំណែង លោក អាំង មាលតី ចេញពីប្រធានសាលាដំបូងរាជធានីភ្នំពេញទៅក្រសួងយុត្តិធម៌ ហើយតែងតាំងលោក តាំង ស៊ុនឡាយ មកជាប្រធានសាលាដំបូងរាជធានីភ្នំពេញជំនួសវិញ។
លោក អាំង មាលតី ជាអតីតប្រធានសាលាដំបូងខេត្តបន្ទាយមានជ័យ ហើយលោកបានចូលធ្វើជាប្រធានសាលាដំបូងរាជធានីភ្នំពេញ កាលពីថ្ងៃទី២០ ខែមេសា ឆ្នាំ២០១៤ ជំនួសលោក ជីវ កេង ដែលត្រូវតែងតាំងជាអនុប្រធានតុលាការកំពូល៕
© រក្សាសិទ្ធិដោយ thmeythmey.com