ជាតិ
សង្គមជាតិ
ក្រសួងសាធារណការ ជំរុញឲ្យអាជ្ញាធរចាត់វិធានការបុស្តិ៍អនាធិបតេយ្យតាមដងផ្លូវ
× ដើម្បីធានាសេចក្ដីថ្លៃថ្នូ សណ្ដាប់ធ្នាប់សាធារណៈ និងរបៀបរៀបរយក្នុងសង្គម ក្រសួងសាធារណការ និងដឹកជញ្ជូន ជំរុញឲ្យអាជ្ញាធរមានសមត្ថកិច្ច និងអាជ្ញាធរមូលដ្ឋានគ្រប់លំដាប់ថ្នាក់ចូលរួមលុបបំបាត់ បុស្តិ៍ជញ្ជីងថ្លឹងបែបអនាធិបតេយ្យតាមដងផ្លូវ និងការគ្រប់គ្រងការដឹកជញ្ជូនលើសទម្ងន់កំណត់ជាបន្ទាន់។ នេះបើតាមសេចក្តីប្រកាសព័ត៌មានរបស់ក្រសួងសាធារណការ និងដឹកជញ្ជូន កាលពីថ្មីៗនេះ។
ក្រសួងសាធារណការ បានបញ្ជាក់ថា កន្លងមកនេះមានក្រុមជនខិលខូចមួយចំនួន បានដាក់បុស្តិ៍ត្រួតពិនិត្យបែបអនាធិបតេយ្យតាមដងផ្លូវ ដោយនៅពេលយប់មានដាក់ភ្លើងសញ្ញាបំភ្លឺ ឬសញ្ញាសំគាល់ឲ្យរថយន្តដឹកជញ្ជូនឆ្លងកាត់ឈប់ដើម្បីត្រួតពិនិត្យ និងបង្ខំឲ្យបង់ប្រាក់ទៅពួកគេ ដែលធ្វើឲ្យប៉ះពាល់ដល់ក្រសួងសាធារណៈការ។ ជាមួយគ្នានេះក្រសួងក៏បានអំពាវនាវដល់អាជីវករដឹកជញ្ជូនឲ្យគោរពច្បាប់ដោយមិនត្រូវដឹកទំនិញលើសទម្ងន់កំណត់ និងមិនត្រូវបង់ប្រាក់ទៅបុស្តិ៍អនាធិបតេយ្យដែលបង្កើតដោយជនខិលខូចនោះដែរ។
ក្នុងសេចក្តីប្រកាសដដែល បន្តថា មានស្ថានីយ៍ថ្លឹងអចិន្ត្រៃបច្ចុប្បន្នដែលមានទីតាំងផ្សេងៗគ្នាដូចជា ស្ថានីយ៍ថ្លឹងកូនដំរី ឃ្លាំងមឿង លង្វែក នៅផ្លូវជាតិលេខ៥, ស្ថានីយ៍ថ្លឹងពួក នៅផ្លូវជាតិលេខ៦, ស្ថានីយ៍ថ្លឹងព្រែកឯង កំពង់ភ្នំ បាវិត នៅផ្លូវជាតិលេខ១, និងស្ថានីយ៍ថ្លឹងថ្នល់ទទឹង នៅផ្លូវជាតិលេខ៧ ប៉ុណ្ណោះ ដែលតម្រូវឲ្យអាជីវករដឹកជញ្ជូនចូលថ្លឹង៕
© រក្សាសិទ្ធិដោយ thmeythmey.com