ជាតិ
សង្គមជាតិ
សង្គមស៊ីវិលចំនួន៨៣គាំទ្រ និងទទូចឲ្យរដ្ឋាភិបាលបន្តទិដ្ឋាការដល់ លោក អាឡិច
× អង្គការសង្គមស៊ីវិលជាតិ និងអន្តរជាតិចំនួន៨៣ បានចេញសេចក្តីថ្លែងការណ៍រួមគ្នា ដោយបានគាំទ្រ និងទទូចឲ្យរាជរដ្ឋាភិបាល ពិសេសក្រសួងមហាផ្ទៃ ពិចារណាឡើងវិញ និងបន្តទិដ្ឋាការដល់ លោក អាឡិចសាន់ត្រូ ហ្គន់សាឡេស ដេវីតសុន អនុប្រធានអង្គការចលនាមាតាធម្មជាតិ ឲ្យស្នាក់នៅក្នុងប្រទេសកម្ពុជាបន្តទៀត។
សេចក្តីថ្លែងការណ៍រួមគ្នា ចុះថ្ងៃទី១៩កុម្ភៈ បានសរសេរថា លោក អាឡិច គឺជាជនបរទេសមួយរូបដែលបានចូលរួមយ៉ាងសកម្មក្នុងការថែរក្សា និងការពារធនធានធម្មជាតិនៅក្នុងប្រទេសកម្ពុជា។
បើតាមសេចក្តីថ្លែងការណ៍ដដែល សកម្មភាពរបស់សកម្មជនបរិស្ថានរូបនេះ ត្រូវបានអង្គការសង្គមស៊ីវិលជាតិ និងអន្តរជាតិ ក្រុមយុវជនការពារបរិស្ថាន ប្រជាពលរដ្ឋកម្ពុជាមួយចំនួននៅក្នុង និងក្រៅប្រទេស ជាពិសេស សហគមន៍ តំបន់ឆាយអារ៉ែងទទួលស្គាល់ គាំទ្រនូវឆន្ទៈ និងសមិទ្ធផលរបស់ជនជាតិអេស្ប៉ាញរូបនេះ ដូចជាការលើកកម្ពស់ចំណេះដឹងដល់សហគមន៍ ពីសិទ្ធិស្របច្បាប់ វប្បធម៌ ប្រពៃណី និងធនធានធម្មជាតិ។
គួរកត់សម្គាល់ថា អនុប្រធានអង្គការចលនាមាតាធម្មជាតិ លោកអាឡិចសាន់ត្រូ ហ្គន់សាឡេស ដេវីតសុន ត្រូវប្រឈមមុខនឹងការចាប់ខ្លួនបណ្ដេញចេញពីប្រទេសកម្ពុជា នៅថ្ងៃទី២០កុម្ភៈនេះ បន្ទាប់ពីរដ្ឋមន្ត្រីក្រសួងមហាផ្ទៃ លោក ស ខេង បដិសេធការបន្តទិដ្ឋាការ អោយជនជាតិអេស្ប៉ាញរូបនេះ បន្ដរស់នៅប្រទេសកម្ពុជាទៀត៕
© រក្សាសិទ្ធិដោយ thmeythmey.com