ខ្មែរក្រហម
ជាតិ
×![]()
ភ្នំពេញ៖ ដើម្បីការពារអត្តសញ្ញាណសាក្សីនោះ អង្គជំនុំជម្រះសាលាដំបូងនៃអង្គជំនុំជម្រះ វិសាមញ្ញតុលាការកម្ពុជា (អ.វ.ត.ក) បានចេញដីកាសម្រេចផ្ទាល់មាត់មួយ ហាមមិនឲ្យ ប្រព័ន្ធផ្សព្វផ្សាយទាំងអស់ បញ្ចេញអាសយដ្ឋាន និងរូបភាពសាក្សីមានរហស្សនាម 2-TCW-944 ទៅដល់សាធារណជន។
អ្នកនាំពាក្យសាលាក្តីខ្មែរក្រហម លោក នេត្រ ភក្ត្រា បានឲ្យដឹងថា បន្ទាប់ពីបញ្ចប់សវនាការ នៅថ្ងៃទី១៩ ម្សិលមិញនេះ ប្រធានអង្គជំនុំជម្រះសាលាដំបូងនៃ អ.វ.ត.ក លោកចៅក្រម និល ណុន បានចេញដីកាសម្រេចផ្ទាលមាត់មួយ ដើម្បីការពារសាក្សីរបស់សាលាក្តី។
លោកបន្តឲ្យដឹងថា អង្គជំនុំជម្រះសាលាដំបូងនៃ អ.វ.ត.ក បានសម្រេចផ្តល់វិធានការការពារដល់សាក្សីមានរហស្សនាម 2-TCW-944 ដែលរួមមាន ការហាមមិនឲ្យបញ្ចេញអាសយដ្ឋាន និងរូបភាពសាក្សីនេះទាំងអស់ទៅសាធារណជន។ ប៉ុន្តែ លោកបន្តថា ការហាមមិនឲ្យផ្សព្វ ផ្សាយរូបភាព ឬរូបថតនេះ មិនរួមបញ្ចូលរូបភាពបំផ្លែង (រូបមិនច្បាស់) ដែលផ្តល់ឲ្យដោយ អ.វ.ត.ក នោះឡើយ។
គួរបញ្ជាក់ថា ចាប់ពីថ្ងៃទី១៧ ដល់ទី១៩ កុម្ភៈ កន្លងមកនេះ អង្គជំនុំជម្រះសាលាដំបូងនៃ អ.វ.ត.ក បានបើកសវនាការស្តាប់សក្ខីកម្មសាក្សីសំខាន់ៗចំនួន ៣រូប ដែលជាអតីតឆ្មាំគុក នៅមន្ទីរសន្តិសុខក្រាំងតាចាន់។
សវនាការស្តាប់សក្ខីកម្មសាក្សីនេះ នឹងបើកបន្តនៅថ្ងៃច័ន្ទ ទី២៣ កុម្ភៈ សប្តាហ៍ក្រោយ៕
© រក្សាសិទ្ធិដោយ thmeythmey.com
