ជាតិ
កម្ពុជាស្នើឲ្យមានការគាំទ្រពីជប៉ុន ដើម្បីពន្លឿនសេវាហោះហើរត្រង់ប្រទេសទាំងពីរ
×![]()
ដោយ: ថ្មីៗ
លោកនាយករដ្ឋមន្ត្រី ហ៊ុន សែន ស្នើឲ្យមានការគាំទ្រពីជប៉ុន ដើម្បីឲ្យសេវាហោះហើរត្រង់រវាងប្រទេសទាំងពីរលេចចេញជារូបរាង។ការស្នើរបស់លោក ហ៊ុន សែន ធ្វើឡើងកាលពីថ្ងៃអាទិត្យ ក្នុងជំនួបជាមួយលោកនាយករដ្ឋមន្ត្រីជប៉ុន ស៊ិនហ្សូ អាបេ នៅក្នុងសន្និសីទពិភពលោកលើកទី៣ នៅទីក្រុងសេនដាយស្តីពីការកាត់បន្ថយហានិភ័យនៃគ្រោះមហន្តរាយ ។
ប្រមុខរដ្ឋាភិបាលកម្ពុជា មានប្រសាសន៍បន្ថែមថា ការហោះហើរត្រង់ គឺវាពាក់ព័ន្ធនិងក្រុមហ៊ុនហោះហើរផ្ទាល់ ដែលតម្រូវឲ្យមានការគាំទ្រពីជប៉ុន ដើម្បីបង្កើនបរិយាកាសវិនិយោគជប៉ុននៅកម្ពុជា ឲ្យកាន់តែមានស្ថេរភាព ។
ពាក់ព័ន្ធបញ្ហានេះនាយករដ្ឋមន្ត្រីជប៉ុន មានប្រសាសន៍ថា នេះគឺជាលើកទី១ហើយដែល រូបលោកបានឃើញក្រុមហ៊ុនអាកាសចរណ៍ ជប៉ុន ANA មានការចាប់អារម្មណ៍ចំពោះការហោះហើរត្រង់ ។ ហើយលោកនិងខិតខំប្រឹងប្រែងធ្វើយ៉ាងណា ឲ្យច្បាប់ស្តីពីហោះហើរ នៃវិស័យអាកាសចរណ៍ស៊ីវិលរបស់ប្រទេសទាំងពីរ បានចេញជារូបរាងពីរដ្ឋសភានៅរយៈពេលដ៏ខ្លីខាងមុខ។នេះបើតាមការសរសេរលើទំព័រហ្វេសបុករបស់អគ្គនាយកទូរទស្សន៍ជាតិកម្ពុជា លោក កឹម គុណវឌ្ឍ ដែលបានតាមដានជំនួបនេះ ។
គួរបញ្ជាក់ថា រដ្ឋាភិបាលកម្ពុជា និងជប៉ុន បានចុះហត្ថលេខាលើកិច្ចព្រមព្រៀង នៃវិស័យអាកាសចរណ៍ រវាងប្រទេសទាំងពីរ កាលពីខែមករា ឆ្នាំ២០១៥កន្លងទៅ ៕
© រក្សាសិទ្ធិដោយ thmeythmey.com
