ជាតិ
រដ្ឋមន្ត្រីអប់រំនឹងនាំមនុស្សជាង៦០០នាក់ទៅទទួលអ្នកគ្រូ នាង ផល្លា ដល់ព្រលានយន្តហោះ
×
លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា នឹងដឹកនាំមនុស្សជាង៦០០នាក់ដើម្បីទៅទទួលស្វាគមន៍អ្នកស្រី នាង ផល្លា ដែលនឹងត្រឡប់ពីវេទិកាGlobal Education and Skills Forum នៅទីក្រុងឌូបៃ។ គ្រូបង្រៀនដ៏ឆ្នើមរូបនេះ នឹងមកដល់ព្រលានយន្តហោះអន្តរជាតិភ្នំពេញ នាព្រឹកថ្ងៃទី១៨ ខែមិនា ឆ្នាំ២០១៥ វេលាម៉ោង១០ និង៣០នាទី។
ទំព័រហ្វេសប៊ុកផ្លូវការរបស់ក្រសួងអប់រំ យុវជន និងកីឡា បានសរសេរថា លោក ហង់ ជួន ណារ៉ុន រួមជាមួយថ្នាក់ដឹកនាំក្រសួងអប់រំ យុវជន និងកីឡា យុវជនកាយរឹទ្ធិ កាកបាទក្រហម សហភាពសហព័ន្ធយុវជនកម្ពុជា បុគ្គលិក និងសិស្សានុសិស្សអង្គការក្រសារថ្មី ប្រមាណជាង ៦០០នាក់ នឹងទៅចូលរួមទទួលស្វាគមន៍ដំណើរត្រឡប់មកវិញរបស់គ្រូឆ្នើមរូបនេះ។
អ្នកគ្រូ នាង ផល្លា នៃអង្គការគ្រួសារថ្មី បានប្រើប្រាស់ពេលវេលាអស់រយៈពេលជិត២០ឆ្នាំលើការអប់រំ បង្រៀនកុមារ គថ្លង់នៅកម្ពុជា។ អ្នកស្រីស្ថិតក្នុងចំណោមបេក្ខជន១០នាក់ចុងក្រោយសម្រាប់រង្វាន់ Global Teacher Prize ដែលរៀបចំដោយមូលនិធិ Varkey Foundation។
នាពិធីប្រកាសរង្វាន់កាលពីយប់ថ្ងៃទី១៥ ខែមិនា រង្វាន់គ្រូឆ្នើមសកលប្រចាំឆ្នាំ២០១៥នេះ បានទៅលើអ្នកស្រី Nancie Atwell គ្រូបង្រៀនមកពីសហរដ្ឋអាមេរិក ដោយនាំមុខគ្រូបង្រៀន៩នាក់ផ្សេងទៀត រួមមាន អ្នកគ្រូ នាង ផល្លា របស់កម្ពុជា លោក AzizullahRoyesh (អាហ្វហ្គានីស្ថាន) លោកស្រី KiranBirSethi (ឥណ្ឌា) លោក Guy Etienne (ហៃទី) លោកស្រី Jacqueline Jumbekahura (កេនយ៉ា) លោក Richard Spencer (អង់គ្លេស) លោក Stephen Ritz (អាមេរិក) លោកស្រី Naomi Volain (អាមេរិក) និងលោក Madenjit Singh (ម៉ាឡេស៊ី)។
បើទោះបីជាប្រាក់រង្វាន់១លានដុល្លារអាមេរិកនៃកម្មវិធី Global Teacher Prize បានធ្លាក់ទៅអ្នកស្រី Nancie Atwell គ្រូបង្រៀនមកពីសហរដ្ឋអាមេរិកក៏ដោយ ប៉ុន្តែអ្នកស្រី នាង ផល្លា គ្រូបង្រៀនរបស់កម្ពុជានៅមានឱកាសឈ្នះរង្វាន់គ្រូមានប្រជាប្រិយភាពជាងគេនៅលើបណ្តាញសង្គមហ្វេសប៊ុក (Most Popular Teacher on Facebook)។ ការបោះឆ្នោតដំណើរការរហូតដល់វេលាម៉ោង១២ និង៥៩នាទី យប់ថ្ងៃអង្គារ ទី១៧ ខែមិនា នេះ។
យោងតាមការបញ្ជាក់របស់អង្គការគ្រួសារថ្មី អ្នកគ្រូ នាង ផល្លា និងបេក្ខភាពផ្សេងទៀតដែលស្ថិតក្នុងចំណោម១០នាក់ចុងក្រោយ នឹងបានប្រាក់រង្វាន់លើកទឹកចិត្តក្នុងម្នាក់ចំនួន២៥០០០ដុល្លារអាមេរិកផងដែរពីមូលនិធិ Varkey Foundation។
ព័ត៌មានមួយចំនួនក៏បានលើកឡើងផងដែរថាលោកនាយករដ្ឋមន្ត្រី ហ៊ុន សែន បានផ្តល់ប្រាក់រង្វាន់១០០លានរៀល ព្រមទាំងបំពាក់គ្រឿងឥស្សរិយយសដល់គ្រូឆ្នើមរូបនេះផងដែរ៕
© រក្សាសិទ្ធិដោយ thmeythmey.com