អន្តរជាតិ
នយោបាយអន្តរជាតិ
នាយករដ្ឋមន្ត្រីក្រិកបង្ហាញភាពថ្លៃថ្នូរ មិនហាមាត់សុំលុយរុស្ស៊ី ![](https://image.thmeythmey.com/pictures/2015/04/09/epa-20150408-russia-alexis-tsipras-vladimir-putin-meeting-640_24b614e64ad241d9838d70687584eff8.jpg)
×![]()
ក្នុងពេលបំពេញទស្សនកិច្ចនៅក្រុងម៉ូស្គូ រឹតចំណងទំនាក់ទំនងជាមួយរុស្ស៊ី ថ្ងៃពុធម្សិលមិញ នាយករដ្ឋមន្ត្រីក្រិកមិនបានសុំជំនួយហិរញ្ញវត្ថុពីរុស្ស៊ីសូម្បីតែមួយសេនឡើយ។ ដោយឡែក រុស្ស៊ីអាចនឹងធ្វើការវិនិយោគជាច្រើននៅក្រិក ជាផលប្រយោជន៍សម្រាប់ក្រិក ក្នុងការដោះស្រាយវិបត្តិសេដ្ឋកិច្ច។
ថ្វីបើម្សិលមិញ ប្រធានាធិបតីរុស្ស៊ីនិងនាយករដ្ឋមន្ត្រីក្រិក បានជជែកគ្នាយ៉ាងខ្លី ពីបញ្ហាបំណុលក្រិក ក៏នាយករដ្ឋមន្ត្រីក្រិកមិនបានសុំលុយពីរុស្ស៊ីដែរ។ នេះបើយោងតាមប្រធានាធិបតីពូទីនដែលបានលើកឡើង ម្សិលមិញ ក្នុងសន្និសីទព័ត៌មាន។ ប៉ុន្តែ លោកពូទីនប្រាប់ថា ក្រុងម៉ូស្គូអាចនឹងចូលរួមក្នុងគម្រោងវិនិយោគហេដ្ឋារចនាសម្ព័ន្ធនៅក្រិក
និងក្នុងផ្នែកឧស្ម័នផងដែរ ដើម្បីដោះស្រាយបញ្ហាហិរញ្ញវត្ថុក្រិក។ យោងតាមលោកពូទីន បញ្ហាចោទមិនមែនជាការដែលរុស្ស៊ីជួយក្រិកទេ។ ការវិនិយោគរបស់រុស្ស៊ីនៅក្រិកគឺជាការសហប្រតិបត្តិការ ក្នុងវិស័យហិរញ្ញវត្ថុ ដែលជាប់ពាក់ព័ន្ធនឹងគម្រោងជាក់ស្តែងនានា។
ប្រធានាធិបតីរុស្ស៊ីក៏បានលើកឡើងដែរ នូវការចូលរួមរបស់ក្រុងអាថែនក្នុងគម្រោងសាងសង់បំពង់ឧស្ម័នTurkish Stream ស្ថិតនៅចន្លោះប្រទេសរុស្ស៊ីនិងតួកគី។ គេអាចប្រើបំពង់បង្ហូរឧស្ម័ននេះ ជាមូលដ្ឋានផ្គត់ផ្គង់ឧស្ម័នរបស់រុស្ស៊ី អោយទៅភាគខាងត្បូងអឺរ៉ុប។ ប៉ុន្តែ ក្រិកនិងរុស្ស៊ីមិនទាន់សម្រេចកិច្ចព្រមព្រៀងច្បាស់លាស់ក្នុងរឿងនេះជាមួយគ្នានៅឡើយទេ។
ក្រិកចង់សិក្សាមើលពីការផ្ចុងផ្តើមទាក់ទងនឹងការសង់បំពង់ឧស្ម័ននេះ នៅតាមព្រំដែនក្រិក-តួកគីសិន។
ទស្សនកិច្ចរបស់លោកអាឡិចស៊ីស ស៊ីប្រាស នៅក្រុងម៉ូស្គូ មិនបានធ្វើអោយសហភាពអឺរ៉ុបដែលជាម្ចាស់បំណុលក្រិកសប្បាយចិត្តទេ។ អឺរ៉ុបនិងរុស្ស៊ីកំពុងបញ្ចេញមុខយក្សដាក់គ្នា ក្នុងបញ្ហាជម្លោះភាគខាងកើតអ៊ុយក្រែន។ គេរំពឹងដែរថា លោកស៊ីប្រាសបានធ្វើដំណើរទៅជួបលោកពូទីននៅម៉ូស្គូ ក៏ប្រហែលដើម្បីអរគុណរដ្ឋាភិបាលរុស្ស៊ីដែលគ្រោងឈប់ហាមឃាត់ការនាំចូលបន្លែផ្លែឈើត្រីមាន៉ទា និងផលិតផលទឹកដោះរបស់ក្រិក ក្នុងទឹកដីរុស្ស៊ី។ កន្លងមក ក្រុងម៉ូស្គូដាក់ទណ្ឌកម្មបែបនេះចំពោះបណ្តាប្រទេសសហភាពអឺរ៉ុប ដើម្បីសងសឹកអឺរ៉ុបដែលដាក់ទណ្ឌកម្មរុស្ស៊ី ក្នុងជម្លោះអ៊ុយក្រែន៕
© រក្សាសិទ្ធិដោយ thmeythmey.com