អន្តរជាតិ
នយោបាយអន្តរជាតិ
នៅពីក្រោយការដោះលែងជនជាតិស៊ុយអែត២នាក់ដែលក្រុមជីហាតចាប់ជាចំណាប់ខ្មាំង
×
គេពិបាកនឹងគិតថាក្រុមជីហាតនៅស៊ីរីដែលកាប់សម្លាប់មនុស្សឥតប្រណីដៃ អាចដោះលែងចំណាប់ខ្មាំងជាពលរដ្ឋប្រទេសលោកខាងលិចបានងាយណាស់។ តែវាជាការពិត កាលពីថ្ងៃសុក្រ ក្រុមជីហាតបានដោះលែងពលរដ្ឋស៊ុយអែត២នាក់ ដែលក្រុមខ្លួនចាប់ជាចំណាប់ខ្មាំងកាលពីខែធ្នូ ឆ្នាំ២០១៣។
លោក Thomas Olsson អាយុ៥០ឆ្នាំ និងលោក Martin Reen អាយុ៣៣ឆ្នាំ ដែលក្រុមជីហាតបានចាប់ជាចំណាប់ខ្មាំងជាង១ឆ្នាំមកនេះ បានត្រូវដោះលែង ហើយបានទៅត្រលប់ទៅស៊ុយអែត ជួបជុំក្រុមគ្រួសារពួកគេវិញ នៅថ្ងៃអាទិត្យម្សិលមិញ។ ពលរដ្ឋស៊ុយអែតទាំង២ជាអ្នកបំរើការអង្គការគ្រិស្តសាសនាមនុស្សធម៌មួយនៅស៊ីរី។
ការដោះលែងនេះ បានដំណើរការក្រោមការជួយជ្រោមជ្រែងរបស់អាជ្ញាធរប៉ាឡេស្ទីន និងហ្ស៊កដានី។ ស៊ុយអែតគាំទ្រ និងទទួលស្គាល់រដ្ឋប៉ាឡេស្ទីន ប្រហែលដូច្នេះហើយទើបបានជារដ្ឋាភិបាលប៉ាឡេស្ទីន និងហ្ស៊កដានីបានខ្នះខ្នែងរហូតដល់ទទួលបានការដោះលែងដ៏កម្រ ក្នុងទឹកដីស៊ីរី ដែលរងសង្គ្រាមរ៉ាំរ៉ៃរាប់ឆ្នាំមកនេះ។ ទាំងស៊ុយអែត ទាំងប៉ាឡេស្ទីនសុទ្ធតែប្រាប់ថា មិនបានបង់ថ្លៃថ្នូរដោះលែងចំណាប់ខ្មាំងឡើយ។
ប្រតិបត្តិការជួយដោះលែងចំណាប់ខ្មាំងស៊ុយអែតបានចាប់ផ្តើម កាលពីខែកុម្ភៈ ក្រោយប្រធានរដ្ឋអំណាចប៉ាឡេស្ទីនធ្វើទស្សនកិច្ចនៅប្រទេសស៊ុយអែត។ ប៉ាឡេស្ទីនពិតជារីករាយមិនតិចទេ ដែលស៊ុយអែតដែលជាប្រទេសដ៏ធំមួយនៅអឺរ៉ុបខាងលិច បានបង្ហាញជំហរទទួលស្គាល់រដ្ឋប៉ាឡេស្ទីនថាជារដ្ឋស្របច្បាប់ ប្រឈមនឹងអ៊ីស្រាអែល។ ក្នុងដើមខែមេសានេះ មានភស្តុតាងថាលោកThomas Olsson និងលោក Martin Reen នៅមានជីវិតនៅឡើយ។ អាជ្ញាធរប៉ាឡេស្ទីនបានបញ្ជូនក្រុមពិសេសចុះទៅស៊ីរី ដើម្បីតាមរកអ្នកបំរើការមនុស្សធម៌ស៊ុយអែតទាំង។ នៅទីបញ្ចប់ ជនជាតិប៉ាឡេស្ទីនម្នាក់បានទទួលជោគជ័យក្នុងការបញ្ចុះបញ្ចូលអោយក្រុមជីហាតអាល់ណូស្រា ដែលជាសាខាក្រុមអាល់កៃដា ដោះលែងចំណាប់ខ្មាំងទាំង២៕
© រក្សាសិទ្ធិដោយ thmeythmey.com