ជាតិ
សង្គមជាតិ
មន្ទីរពេទ្យចក្ខុរោគព្រះអង្គឌួងចំណាយថវិកា ៨លានដុល្លារនឹងសម្ពោធនៅថ្ងៃទី១៣ ឧសភា
× ភ្នំពេញ៖ មជ្ឈមណ្ឌលចក្ខុរោគមិត្តភាពកម្ពុជា កូរ៉េ នៅមន្ទីរពេទ្យព្រះអង្គឌួងនឹងសម្ពោធដាក់ឲ្យដំណើរការ នៅថ្ងៃទី១៣ ខែឧសភា ឆ្នាំ២០១៥ ខាងមុខនេះ។
មជ្ឈមណ្ឌលនេះ សង់ឡើងក្រោមគម្រោងជំនួយឥតសំណងរបស់ទីភ្នាក់ងារកូរ៉េសម្រាប់ការអភិវឌ្ឍអន្តរជាតិ (KOICA) ដោយចំណាយថវិកាអស់ជាង ៨លានដុល្លារអាមេរិក។
មន្ត្រីកម្មវិធីទីភ្នាក់ងារ KOICA លោក ម៉ៅ ឌីណា បានឲ្យដឹងថា មជ្ឈមណ្ឌលចក្ខុរោគព្រះអង្គឌួងនឹងត្រូវសម្ពោធដាក់ឲ្យដំណើរការជាផ្លូវការនៅថ្ងៃទី១៣ ខែឧសភា ឆ្នាំ២០១៥នេះ ក្រោមអធិបតីភាពរបស់លោកនាយករដ្ឋមន្ត្រី ហ៊ុន សែន។ នាសន្និសីទសារព័ត៌មានស្តីពីសកម្មភាពវប្បធម៌កូរ៉េ ប្រចាំឆ្នាំ២០១៥ កន្លងមក លោកបន្ថែមថា មជ្ឈមណ្ឌលភ្នែកដ៏ទំនើបនេះ ត្រូវបានសាងសង់ឡើងនៅក្រោម គម្រោងជំនួយ ឥតសំណង ៨លានដុល្លារអាមេរិក ក្នុងនោះ ជំនួយ KOICA ចំនួន ៥,៥ លាន ដុល្លារ និងមន្ទីរពេទ្យគីមចំនួន ២,៥ លានដុល្លារ ក្រោមជំនួយឈ្មោះថា គម្រោងសម្រាប់ការបង្កើតមន្ទីរពេទ្យចក្ខុរោគព្រះអង្គឌួង ក្នុងប្រទេសកម្ពុជា។
មន្ត្រី KOICA រូបនេះ អះអាងថា៖«មជ្ឈមណ្ឌលភ្នែកដ៏ទំនើបនេះ នឹងជួយធ្វើឲ្យប្រសើរឡើងនូវអត្រានៃការការពារ ការពិការ ភ្នែក និងសេវាថែទាំសុខភាពភ្នែកទូទៅសម្រាប់ប្រជាជនកម្ពុជា»។
ដោយឡែក យោងតាមសេចក្តីប្រកាសព័ត៌មានរបស់អគ្គលេខាធិការដ្ឋានរដ្ឋសភា ប្រធានរដ្ឋសភានៃសាធារណរដ្ឋកូរ៉េ លោក ជុង អូយ វ៉ា (Chung Ui-Hwa) ក៏នឹងចូលរួមក្នុងពិធីសម្ពោធបើកមជ្ឈមណ្ឌលភ្នែកមិត្តភាពកម្ពុជា កូរ៉េ នៅមន្ទីរពេទ្យព្រះអង្គឌួងនេះដែរ។ ប្រធានរដ្ឋសភារូបនេះ នឹងដឹកនាំគណៈប្រតិភូមកបំពេញទស្សនកិច្ចនៅកម្ពុជារយៈពេល៤ថ្ងៃ គឺចាប់ពីថ្ងៃទី១០ ដល់ទី១៣ខែឧសភា ខាងមុខ។
គួរបញ្ជាក់ថា បើតាមរបាយការណ៍ទីភ្នាក់ងារកូរ៉េសម្រាប់ការអភិវឌ្ឍអន្តរជាតិ (KOICA) ចាប់តាំងពីឆ្នាំ១៩៩១ រហូតមកត្រឹមឆ្នាំ ២០១៤ ទីភ្នាក់ងារនេះ បានផ្តល់ជំនួយឥតសំណង ១៥៦ លានដុល្លារអាមេរិកមកកាន់ប្រទេសកម្ពុជា។
គួររម្លឹកផងដែរថា មជ្ឈមណ្ឌលចក្ខុរោគមិត្តភាពកម្ពុជា កូរ៉េ ត្រូវបានចុះបឋមសិលាសាងសង់ កាលពីខែតុលា ឆ្នាំ២០១៣ ៕
© រក្សាសិទ្ធិដោយ thmeythmey.com