អន្តរជាតិ
នយោបាយអន្តរជាតិ
អារ៉ាប៊ីសាអូឌីតប្រកាសផ្អាកវាយប្រហារយេម៉ែន៥ថ្ងៃ ![](https://image.thmeythmey.com/pictures/2015/05/10/9_arabia.jpg)
×![]()
នៅថ្ងៃសុក្រម្សិលមិញ លោក អាដែល អាល់ ជូបី ជារដ្ឋមន្ត្រីការបរទេសអារ៉ាប៊ីសាអូឌីត បានប្រកាសផ្អាកវាយប្រហារក្រុមហ៊ូទីនៅយេម៉ែន ៥ថ្ងៃ គិតចាប់ពីថ្ងៃអង្គារ១២ឧសភាទៅ ចាប់ពីម៉ោង១១យប់ក្នុងស្រុក។ ការផ្អាកការវាយប្រហារនេះមានទិសដៅបញ្ជូនជំនួយមនុស្សធម៌អោយប្រជាជនស៊ីវិល។ បទឈប់បាញ់អាចពន្យារពេលទៀត ប្រសិនក្រុមប្រដាប់អាវុធហ៊ូទីគោរពបទឈប់បាញ់ និងគិតដល់សុខទុក្ខប្រជាជនជាចំបង។
ការ ប្រកាសផ្អាកការវាយប្រហារយេម៉ែន ធ្វើឡើងក្រោយពេលប្រមុខការទូតអារ៉ាប៊ីសាអូឌីតបានប្រជុំគ្នាជាមួយ មេដឹកនាំប្រទេសឈូងសមុទ្រពែរស៍ និងប្រមុខការទូតអាមេរិក ចន ឃែររីនៅក្រុងប៉ារីស។ ប្រមុខការទូតអាមេរិកចង់អោយភាគីនយោបាយយេម៉ែនចូលតុចរចាគ្នា ដើម្បីដោះស្រាយបញ្ហា ព្រោះថាការផ្អាកការវាយប្រហារមិនអាចបញ្ចប់ជម្លោះទាំងស្រុងទេ។ គិតតាំងពីពាក់កណ្តាលខែមិនាមក មនុស្សជាង១៤០០នាក់បានស្លាប់ក្នុងប្រតិបត្តិការទំលាក់គ្រាប់បែក របស់ប្រទេសសម្ព័ន្ធអារ៉ាប់ដឹកនាំដោយអារ៉ាប៊ីសាអូឌីត។
យោងតាមអង្គការសហប្រជាជាតិ ប្រជាជនយេម៉ែនប្រមាណ២០លាននាក់ ត្រូវនឹង៨០ភាគរយនៃប្រជាជនសរុបក្នុងប្រទេស កំពុងរងការគំរាមកំហែងដោយគ្រោះអត់ឃ្លាន។
ថ្ងៃសុក្រម្សិលមិញ ប្រជាជនអ៊ីរ៉ង់រាប់ពាន់នាក់បាននាំគ្នាបាតុកម្មបរិហារ ការទំលាក់គ្រាប់បែករបស់ប្រទេសសម្ព័ន្ធមិត្តអារ៉ាប់។ អ៊ីរ៉ង់ត្រូវបានអាមេរិកនិងអារ៉ាប៊ីសាអូឌីតចោទថា ជួយក្រុមឧទ្ទាមហ៊ូទីដែលបានដណ្តើមអំណាចពីប្រធានាធិបតីហាឌី កាលពីដើមខែមករា។ ប៉ុន្តែ រដ្ឋាភិបាលអ៊ីរ៉ង់បានបដិសេធការចោទប្រកាន់នេះយ៉ាងដាច់អហង្កា៕
© រក្សាសិទ្ធិដោយ thmeythmey.com