ជាតិ
សង្គមជាតិ
យុវជនកម្ពុជា៤រូបនឹងចូលរួមប្រកួតតស៊ូមតិ និងវោហាស័ព្ទថ្នាក់តំបន់នៅម៉ាឡេស៊ី ![](https://image.thmeythmey.com/pictures/2015/06/09/9620151153181520151006571-aii.jpg)
×![]()
ភ្នំពេញ៖ វេទិកាប្រកួតប្រជែងផ្នែកតស៊ូមតិ និងវោហាស័ព្ទជាសាធារណៈថ្នាក់តំបន់នឹងរៀបចំ ក្នុងអំឡុងសន្និសីទតំបន់អាស៊ីប៉ាស៊ីហ្វិក (ASPAC2015) របស់សភាយុវពាណិជ្ជករអន្តរជាតិ (JCI) ចាប់ពីថ្ងៃទី១១ ដល់ទី១៤ មិថុនា នៅប្រទេសម៉ាឡេស៊ី។ នៅថ្ងៃទី១០ មិថុនា ស្អែកនេះ កម្ពុជានឹងបញ្ជូនជ័យលាភី ៤រូបទៅចូលរួមការប្រកួតនេះ ជាមួយបេក្ខជនមកពីជាង ១០ប្រទេសផ្សេងទៀតក្នុងតំបន់។
ការប្រកួតតស៊ូមតិ និងវោហាស័ព្ទជាសាធារណៈនេះ មានបំណងលើកកម្ពស់ជំនាញការរិៈគិត និងប្រកួតការជជែកតាមបញ្ញា។ កម្មវិធីប្រកួតផ្នែកវោហាស័ព្ទសាធារណៈវគ្គដំបូងនឹងត្រូវរៀបចំនៅថ្ងៃទី១២ មិថុនា សម្រាប់ ១១ប្រទេស រីឯការប្រកួតផ្នែកតស៊ូមតិនឹងប្រព្រឹត្តទៅនៅថ្ងៃទី ១៣ មិថុនា សម្រាប់ ៦ប្រទេស។
ប្រធានថ្នាក់ជាតិរបស់សភាយុវពាណិជ្ជករអន្តរជាតិប្រចាំកម្ពុជា លោក គួច ផេង ជឿជាក់ថា បេក្ខជនរបស់កម្ពុជានឹងឈ្នះការប្រកួតថ្នាក់តំបន់អាស៊ីប៉ាស៊ីហ្វិកនេះ ដោយលោកអះអាងថា ពួកគេមានភាពស្ទាត់ជំនាញខាងភាសាអង់គ្លេស ចំណេះដឹង ការស្រាវជ្រាវ ពិសេសគឺការត្រៀមខ្លួនមុនការប្រកួតតែម្តង។
«ពួកគេបានបង្ហាញសមត្ថភាព និងភាពជឿជាក់លើការប្រកួតថ្នាក់ជាតិកន្លងមក ពួកគេនឹងត្រៀមខ្លួនយកជ័យជំនះប្រចាំតំបន់អាស៊ីប៉ាស៊ីហ្វិកបាន»។ នេះជាប្រសាសន៍បញ្ជាក់របស់ លោក គួច ផេង។
បេក្ខជនដែលនឹងត្រូវចាកចេញទៅប្រកួតថ្នាក់តំបន់អាស៊ីប៉ាស៊ីហ្វិក សុទ្ធសឹងជាជ័យលាភីដែលត្រូវបានជ្រើសរើសពីវេទិកាប្រកួតប្រជែងតស៊ូមតិ និងវោហោស័ព្ទជាសាធារណៈថ្នាក់ជាតិ កាលពីថ្ងៃទី ២៦ ខែមេសា ឆ្នាំ២០១៥កន្លងទៅ នៅវិទ្យាស្ថានបច្ចេកវិទ្យាកម្ពុជា។ វេទិកាតស៊ូមតិ និងវោហាស័ព្ទជាសាធារណៈថ្នាក់ជាតិកន្លងមក មានសិស្ស និងនិស្សិតមកពីគ្រឹះស្ថានអប់រំចំនួន ៧ បានចូលរួម ក្នុងនោះ រួមមាន សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE) សាកលវិទ្យាល័យហ្សាម៉ាន់ (ZAMAN) សាកលវិទ្យាល័យអាស៊ីអឺរ៉ុប (AEU) សាកលវិទ្យាល័យភ្នំពេញអន្តរជាតិ (PPIU) សាកលវិទ្យាល័យន័រតុន (NU) សាកលវិទ្យាល័យបៀលប្រាយ (BBU) និងវិទ្យាស្ថានអន្តរទី្វបអាមេរិកាំង (AII) ។ បន្ទាប់ពីការប្រកួតយ៉ាងស្វិតស្វាញ និងការផ្តល់ពិន្ទុពីសំណាក់ចៅក្រមវិនិច្ឆ័យពេលនោះ ជាលទ្ធផលជ័យលាភីអ្នកតស៊ូមតិឆ្នើមបានធ្លាក់លើសិស្សមកពីវិទ្យាស្ថានអន្តរទ្វីបអាមេរិកាំង (AII) រីឯផ្នែកវោហាស័ព្ទជាសាធារណៈបានលើនិស្សិតមកពីសាកលវិទ្យាល័យភ្នំពេញអន្តជាតិ។
តំណាងជ័យលាភីក្រុមអ្នកតស៊ូមតិឆ្នើមនៃ AII កញ្ញា ប៉ែន សុខអាន បានសម្តែងអារម្មណ៍ រីករាយជាខ្លាំងនៅពេលដែលក្រុមរបស់កញ្ញាបានជ័យឈ្នះ។ សុខអាន និយាយយ៉ាងដូច្នេះថា៖«មោនភាពរបស់យើង និងសាលារបស់យើងនៅដែលក្រុមរបស់យើងឈ្នះលើក្រុម ឆ្នើមៗដ៏ទៃទៀត។ ក្រុមយើងបានសហការគ្នាបានយ៉ាងល្អ ទាំងការស្រាវជ្រាវលើប្រធានបទនិងទាំងការតស៊ូមតិលើវេទិកា»។ ទន្ទឹមនឹងការបន្តទៅប្រកួតប្រចាំតំបន់អាស៊ី នាពេលខាងមុខនេះ សុខ អាន បានប្តេជ្ញាថា នឹងព្យាយាមឲ្យអស់ពីសមត្ថភាពដើម្បីយកជ័យជំនះឲ្យកម្ពុជាផងដែរ។ កញ្ញាញញឹមប្រាប់ថា៖«ខ្ញុំមិនហ៊ានថាឈ្នះ ឬយ៉ាងណាទេប៉ុន្តែក្រុមយើងនឹងសហការគ្នាឲ្យកាន់តែខ្លាំង ដើម្បីកម្ពុជា»។
គួររម្លឹកថា កាលពីឆ្នាំ ២០១៤ កញ្ញា ប៉ែន សុខអាន បានក្លាយជើងឯកការប្រកួតវោហារសព្ទជាសាធារណៈប្រចាំតំបន់អាស៊ីប៉ាស៊ីហ្វិក ដោយកញ្ញាបានផ្ដួលយុវជនពីប្រទេសក្នុងតំបន់ ដូចជាជប៉ុន ម៉ុងហ្គោលី ម៉ាឡេស៊ី ហ្វីលីពីន និងឥណ្ឌា ជាដើម។ ពេលនោះ នាងបានក្លាយជាបេក្ខជនតំណាងអាស៊ីចូលរួមការប្រកួតផ្ដាច់ព្រ័ត្រថ្នាក់ពិភពលោកនៅទីក្រុង Leipzig ប្រទេសអាល្លឺម៉ង់ ជាមួយដៃគូឆ្នើម ៣នាក់ទៀត ដែលជាជើងឯកប្រចាំទ្វីបអាមេរិក អឺរ៉ុប និងអាហ្វ្រិក។ ប៉ុន្តែ សុខអាន ពុំចំណាត់ថ្នាក់ជើងឯកនោះទេ ពេលនោះតំណាងមកពីទ្វីបអាហ្វ្រិកសញ្ជាតិនីហ្សេរីយ៉ា លោក Paul Akingbola បានកា្លយជាជ័យលាភីថ្នាក់ពិភពលោក។ ទោះបីជាយ៉ាងណា នារីវ័យ ១៩ ឆ្នាំរូបនេះ នៅតែមានមោទនភាពចំពោះកម្ពុជាដែលមានបេក្ខជនបានក្លាយជាតំណាងឲ្យទ្វីបអាស៊ីប៉ាស៊ីហ្វិក ជាពិសេសគឺ ប្រទេសកម្ពុជា។
ដោយឡែកជ័យលាភីវោហាស័ព្ទជាសាធារណៈប្រចាំឆ្នាំ ២០១៥នេះវិញ ត្រូវបានទៅលើ កញ្ញា តារា រត្ន ជានិស្សិតច្បាប់ នៃសាកលវិទ្យាល័យភ្នំពេញអន្តរជាតិ។ មុននឹងចាកចេញទៅប្រកួតវោហាស័ព្ទនៅម៉ាឡេស៊ីនោះ និស្សិតឆ្នាំទី៤ រំពឹងទុកទាំងរឹងមាំថា នាងនឹងយកឈ្នះក្នុងកម្មវិធីនេះ។ «ខ្ញុំសង្ឃឹម៩៩,៩ភាគរយ ថា នឹងអាចយកឈ្នះបេក្ខជននៅ ក្នុងតំបន់អាស៊ី»។ នេះការរំពឹងរបស់កញ្ញា រត្ន។
ប្រធានបទប្រកួតក្នុងកម្មវិធីឆ្នាំ២០១៥នេះ ផ្តោតសំខាន់លើគោលដៅអភិវឌ្ឍសហស្សវត្សរ៍របស់អង្គការសហប្រជាជាតិ (UN-MDGs) ដែលទាក់ទងនឹងប្រធានបទកាត់បន្ថយភាពក្រីក្រធ្ងន់ធ្ងរ និងបញ្ឈប់ការរីកសាយនៃមេរោគអេដស៍ព្រមទាំងការផ្តល់នូវការអប់រំបឋមសិក្សាជាសាកលដែលត្រូវសម្រេចឲ្យបានត្រឹមឆ្នាំ ២០១៥ ។
គួរបញ្ជាក់ថា ជ័យលាភីតំណាងកម្ពុជានឹងត្រូវទៅចូលរួមក្នុងការប្រកួតប្រចាំតំបន់ដែលនឹងធ្វើឡើងអំឡុងសន្និសីទអាស៊ីប៉ាស៊ីហ្វិក ឆ្នាំ២០១៥ នៅថ្ងៃទី១១ដល់ទី១៤ ខែមិថុនាក្នុងប្រទេសម៉ាឡេស៊ី។ ហើយក្រុមដែលទទួលបានជ័យជំនះក្នុងកម្មវិធីនោះនឹងបន្តទៅប្រកួតប្រជែងជ្រើសជើងឯកពិភពលោកដែលនឹងប្រារព្ធក្នុងខែវិច្ឋិកានៅប្រទេសជប៉ុន៕
© រក្សាសិទ្ធិដោយ thmeythmey.com