អន្តរជាតិ
នយោបាយអន្តរជាតិ
លោក អូបាម៉ា ស្នើឲ្យចាត់វិធានការបញ្ឈប់លំហូរចូលក្រុមសកម្មប្រយុទ្ធបរទេសទៅស៊ីរី ![](https://image.thmeythmey.com/pictures/2015/06/09/d70.jpg)
×![]()
ប្រធានាធិបតីអាមេរិក បារ៉ាក់ អូបាម៉ា ទទួលស្គាល់ថាការបញ្ឈប់ការហូរចូលក្រុមសកម្មប្រយុទ្ធបរទេសទៅក្នុងប្រទេសស៊ីរី ជារឿងសំខាន់បំផុតមួយដើម្បីកម្ចាត់ក្រុមរដ្ឋឥស្លាម។ សហរដ្ឋអាមេរិកនៅបន្តដឹកនាំក្រុមសម្ព័ន្ធអន្តរជាតិតាមកម្ចាត់ក្រុមរដ្ឋឥស្លាម ប៉ុន្តែក្រុមរដ្ឋឥស្លាមហាក់មិនសូវថមថយកម្លាំងសោះដោយសារមានសមាជិកថ្មីចូលរួមជាប្រចាំ។ ក្រុមសកម្មយុទ្ធបរទេសបន្តលួចឆ្លងដែនប្រទេសតួកគី និងបន្តចូលចូលរួមជាមួយក្រុមរដ្ឋឥស្លាមដែលកំពុងកាន់កាប់ទឹកដីធំល្វឹងល្វើយនៅស៊ីរី និងអ៊ីរ៉ាក់។
លោក មុំ ពិទួរ្យ លម្អិតព័ត៌មាននេះ
ក្នុងសន្និសីទសារព័ត៌មានក្នុងប្រទេសអាឡឺម៉ង់ប្រធានាធិបតីអាមេរិក លោក បារ៉ាក់ អូបាម៉ា បានព្រមានពីការកើនឡើងនៃលំហូរចូលរបស់ក្រុមសកម្មប្រយុទ្ធបរទេសចូលទៅក្នុងប្រទេសស៊ីរី។ មេដឹកនាំអាមេរិក បានព្រមានដូច្នេះ ស្របពេលដែលក្រុមសកម្មប្រយុទ្ធរាប់ពាន់នាក់បានបន្តរត់ឆ្លងចូលតាមច្រកព្រំដែនតួកគីដើម្បីចូលរួមជាមួយក្រុមភេរវជនរដ្ឋឥស្លាមដែលកំពុងកាន់កាប់ទឹកដីមួយចំនួននៃប្រទេសស៊ីរី និងអ៊ីរ៉ាក់។
ជុំវិញការបន្តហូរចូលរបស់ក្រុមសកម្មប្រយុទ្ធបរទេសទៅស៊ីរី និងអ៊ីរ៉ាក់គេចាត់ទុកជាសញ្ញាអាក្រក់មួយ និងបញ្ជាក់ថា កងកម្លាំងក្រុមរដ្ឋឥស្លាមមិនអន់ខ្សោយឡើយព្រោះមានសមាជិកថ្មីចូលរួមជាមួយខ្លួនឥតដាច់។ សមាជិកថ្មីចូលរួមធ្វើសង្គ្រាមជាមួយក្រុមជីហាតឥតដាច់ ដែលវាជំរុញឲ្យក្រុមរដ្ឋឥស្លាមនៅរក្សាកម្លាំងសម្រាប់ប្រយុទ្ធបានយ៉ាងមានប្រសិទ្ធភាព។
លោក បារ៉ាក់ អូបាម៉ា បានសង្កត់ធ្ងន់ថា បើទោះជាគេមិនអាចគ្រប់គ្រង និងការពាររាល់ការរត់ឆ្លងចូលទៅស៊ីរីរបស់ក្រុមសកម្មប្រយុទ្ធក៏ដោយ ក៏គេនៅតែមានវិធានការពិសេសដើម្បីរឹតបន្តឹងច្រកព្រំដែនតួកគី ជាច្រកព្រំដែនដែលក្រុមសកម្មប្រយុទ្ធរាប់ពាន់នាក់ឆ្លងកាត់។ យ៉ាងណាក៏ដោយ ច្រកព្រំដែនប្រទេសតួកគី-ស៊ីរី មិនមែនត្រឹមតែច្រកសម្រាប់ក្រុមសកម្មប្រយុទ្ធបរទេសប៉ុណ្ណោះទេ តែវាក៏ជាច្រករបៀងសំខាន់សម្រាប់ក្រុមរដ្ឋឥស្លាមលួចលក់ប្រេងដែលខ្លួនបូមបានដើម្បីផ្គត់ផ្គង់សកម្មភាពខ្លួន។ បើគ្មានចំណាត់ការតឹងតែងចំពោះការរឹតបន្តឹងការឆ្លងកាត់ច្រកព្រំដែនតួកគីនេះទេ វាប្រាកដណាស់ថា យុទ្ធសាស្ត្រកម្ចាត់ក្រុមរដ្ឋឥស្លាមមិនមានប្រសិទ្ធភាពឡើយ។
សហរដ្ឋអាមេរិកខ្វល់ខ្វាយ ដោយសារខ្លួនជាអ្នកដឹកនាំក្រុមសម្ព័ន្ធប្រទេសដើម្បីកម្ចាត់ក្រុមរដ្ឋឥស្លាមនៅស៊ីរី និងអ៊ីរ៉ាក់ អស់មួយឆ្នាំមកហើយ ប៉ុន្តែប្រសិទ្ធភាពនៃការកម្ចាត់ក្រុមរដ្ឋឥស្លាមហាក់ដូចជាមានកម្រិតទាប។ ចំនួនក្រុមរដ្ឋឥស្លាមកើនឡើង ពិតជាកង្វល់ដ៏ធំ ប៉ុន្តែបច្ចុប្បន្នចំណុចយុទ្ធសាស្ត្រមួយទៀតគឺការពង្រឹងកម្លាំងទាហានអ៊ីរ៉ាក់។ លោក អូបាម៉ា បានលើកឡើងថាអ៊ីរ៉ាក់ចាំបាច់ពង្រឹងកម្លាំងរបស់ខ្លួនឲ្យខ្លាំងដើម្បីត្រៀមប្រយុទ្ធ ព្រោះកន្លងមកកងទ័ពអ៊ីរ៉ាក់មិនបានត្រៀមលក្ខណៈទេ និងគ្មានឆន្ទៈចង់ប្រយុទ្ធឡើយ។ បច្ចុប្បន្ននេះ ក្រុមរដ្ឋឥស្លាមនៅតែមានលទ្ធភាពរក្សាតំបន់ដែលខ្លួនកាន់កាប់ និងអាចបន្តវាយដណ្តើមទឹកដីបន្ថែមពីកងកម្លាំងរដ្ឋាភិបាលថែមទៀតផង។
និយាយទៅការកាត់ផ្តាច់ចរន្តហិរញ្ញវត្ថុរបស់ក្រុមរដ្ឋឥស្លាម និងការទប់ស្កាត់រាល់លំហូរក្រុមសកម្មប្រយុទ្ធថ្មីចូលទៅក្នុងប្រទេសស៊ីរី ឬអ៊ីរ៉ាក់ សុទ្ធតែជាវិធានការសំខាន់ដែលបណ្តាប្រទេសសម្ព័ន្ធអន្តរជាតិត្រូវប្រើប្រាស។ ជាធម្មតាបើកាត់ផ្តាច់លុយ និងផ្តាច់រាល់ក្រុមសកម្មប្រយុទ្ធថ្មីដែលប៉ងទៅចូលរួមជាមួយក្រុមរដ្ឋឥស្លាមនោះ ក្រុមរដ្ឋឥស្លាមនឹងទន់ខ្សោយចៀសមិនផុតឡើយ៕
© រក្សាសិទ្ធិដោយ thmeythmey.com