អន្តរជាតិ
នយោបាយអន្តរជាតិ
ជប៉ុនពង្រឹងអំណាចយោធានិងផ្តើមលូកដៃក្នុងជម្លោះសមុទ្រចិនខាងត្បូងជាសញ្ញាអវិជ្ជមាន?
×![]()
ជប៉ុនចាប់ផ្តើមចេញមុខចេញមាត់កាន់តែខ្លាំងដោយរិះគន់ក្រុងប៉េកាំងរឿងវាតទីដណ្តើមដែនទឹកក្នុងជម្លោះសមុទ្រចិនខាងត្បូងដោយសង់កោះសិប្បនិម្មិតកន្លងមក។ ការរិះគន់ចិនធ្ងន់ៗនេះមានក្នុងរបាយការណ៍ការពារជាតិប្រចាំឆ្នាំកម្រាស់៥០០ទំព័ររបស់ជប៉ុន ដែលទើបចេញផ្សាយថ្មីៗនេះ។ ជប៉ុនបង្ហាញក្តីបារម្ភថា សកម្មភាពនិងការដាក់មូលដ្ឋានយោធារបស់ចិននៅតំបន់ជម្លោះសមុទ្រចិនខាងត្បូងនឹងប៉ះពាល់ដល់ដល់សកម្មភាពពាណិជ្ជកម្មតាមសមុទ្ររបស់ខ្លួននាពេលបច្ចុប្បន្ន។ គេរំពឹងថា ក្រោយច្បាប់សន្តិសុខថ្មីរបស់ជប៉ុនត្រូវសភាអនុម័តជោគជ័យ និងចូលជាធរមាន រដ្ឋាភិបាលជប៉ុននឹងពង្រីកតួនាទីសន្តិសុខក្នុងតំបន់ជាពិសេសជួយជ្រោមជ្រែងរដ្ឋជាប់ជម្លោះជាមួយចិនក្នុងបញ្ហាសមុទ្រចិនខាងត្បូងនេះ។ បច្ចុប្បន្ន ជប៉ុនប្រឹងពង្រីងឥទ្ធិពលរបស់ខ្លួនឡើងវិញនៅតំបន់អាស៊ីអាគ្នេយ៍។ លុយ ១១០ពាន់លានដុល្លារ ត្រូវរដ្ឋាភិបាលជប៉ុនដាក់ចេញដើម្បីសម្រេចគម្រោងហេដ្ឋារចនាសម្ព័ន្ធនៅតំបន់អាស៊ីប្រជែងគម្រោងខ្សែក្រវ៉ាត់មួយវិថីមួយនិងធនាគារវិនិយោគចិនផង។
សូមស្តាប់ការបកស្រាយរបស់សៅផលនិស្ស័យ៖
របាយការណ៍ការពារជាតិថ្មីរបស់ជប៉ុនដែលទើបចេញផ្សាយថ្មីៗ មានបង្ហាញរូបភាពកោះរបស់ចិនដែលថតដោយផ្កាយរណប និងបង្កប់ពាក្យទិតៀនរបបដឹកនាំក្រុងប៉េកាំងធ្ងន់ៗផងជុំវិញការវាតទីយកដែនទឹកនៅតំបន់ជម្លោះសមុទ្រចិន។ របាយការណ៍ការពារជាតិជប៉ុនដែលមានកម្រាស់រហូតដល់ ៥០០ទំព័រនេះត្រូវបានចងក្រងឡើងដោយរដ្ឋាភិបាលលោក ស៊ីនហ្សូ អាបេ។ ហើយវាជាលើកដំបូងបំផុតដែលរបាយការណ៍នេះមានបង្កប់រូបភាពនិងអត្ថន័យរិះគន់រដ្ឋាភិបាលក្រុងប៉េកាំងរឿងជម្លោះសមុទ្រចិនខាងត្បូង។
ចិនទារយកដែនទឹកប្រហែល៩០ភាគនៃដែនទឹកសរុបក្នុងតំបន់ជម្លោះ ដោយផ្អែកតាមផែនទី រាងអក្សរ U ឬផែនទី៩ ចំណុចដែលខ្លួនគូសជាលក្ខណៈឯកតោភាគីតាំងពីឆ្នាំ ១៩៤៧មកម្ល៉េះ។ ប៉ុន្តែប្រទេសផ្សេងទៀតដូចជាវៀតណាម ហ្វីលីពីន ម៉ាឡេស៊ី ប្រ៊ុយណេ និងតៃវ៉ាន់ផងសុទ្ធតែទាមទារយកដែនជម្លោះនោះដូចគ្នាដែរ។
យោងតាមរបាយការណ៍នេះ ជប៉ុនបានទាមទារឲ្យក្រុងប៉េកាំងបញ្ឈប់សកម្មភាពវាតទីយកដែនទឹកជម្លោះជាលក្ខណៈឯតោភាគីទៀត និងចាត់ទុកទង្វើចិនជាសកម្មភាពខុសច្បាប់បង្កការគំរាមកំហែងដល់សន្តិសុខតំបន់ផង។ របាយការណ៍កម្រាស់៥០០ទំព័រ នេះត្រូវគេបញ្ចេញ ប៉ុន្មានថ្ងៃក្រោយពេលដែលសភាជាន់ទាបជប៉ុនបោះឆ្នោតទទួលយកសេចក្តីព្រាងច្បាប់សន្តិសុខថ្មីរបស់រដ្ឋាភិបាលលោក ស៊ីនហ្សូ អាបេ ដោយមិនខ្វល់ការខឹងសម្បាររបស់ប្រជាជនជប៉ុនទូទៅ។ ដែលនេះបញ្ជាក់ថាច្បាស់ថា ជប៉ុនកំពុងប្រឹងប្រែងកសាងឥទ្ធិពលនិងអំណាចយោធារបស់ខ្លួនឡើងវិញ ទុកគ្រាន់ប្រឆាំងក្រុងប៉េកាំងដែលអុងអាត់កាន់តែខ្លាំងឡើងៗក្នុងតំបន់នេះ។ ប៉ុន្តែ ចិនធ្លាប់តបវិញដែររឿងរិះគន់ចិនឥតសំចៃរឿងវាតទីយកដែនទឹកនៅសមុទ្រចិនខាងត្បូង ដោយចិនលើកឡើងថា ហេតុអ្វីរិះគន់តែចិន ចុះវៀតណាមដែលដណ្តើមកាន់កាប់យកដែនទីកយ៉ាងច្រើនក្បែរកោះស្ព្រាត់លី រយៈពេល២ទសវត្សកន្លងមក ម្តេចក៏គ្មានអ្នកថ្កោលទោស។
តាមពិតទៅ អ្វីដែលជប៉ុនបារម្ភខ្លាំងនៅពេលចិនប្រឹងសាងសង់មូលដ្ឋានយោធាខ្លួនកណ្តាលតំបន់ជម្លោះនោះ គឺការកាត់ផ្តាច់ ឬការគំរាមកំហែងចរាចរណ៍ទំនិញ និងកម្មភាពពាណិជ្ជកម្មតាមសមុទ្រចិនខាងត្បូងដែលទំហំពាណិជ្ជកម្មរាល់ឆ្នាំស្មើ៥ពាន់ពាន់លានដុល្លារអាមេរិក ហើយភាគច្រើនទំនិញនាំចេញនិងនាំចូលទៅជប៉ុននេះឯង។ បើសិនចិនកាន់តែមានអំណាចយោធាខ្លាំង និងកាន់កាប់ផ្លូវពាណិជ្ជកម្មតាមសមុទ្រចិនខាងត្បូងនោះ វាប្រាកដណាស់ថា ជប៉ុនអាចខាតបង់ច្រើនដែរ។
យ៉ាងណាក៏ដោយ ការលូកដៅកាន់តែជ្រៅរបស់ជប៉ុន អាចនិយាយបានថា មិនមែនជាសញ្ញាវិជ្ជមានឡើយ។ ជប៉ុនមិនមែនជាភាគីជម្លោះសមុទ្រចិនខាងត្បូងសោះ តែជប៉ុនមានជម្លោះជាមួយចិនលើកោះតូចមួយនៅសមុទ្រចិនខាងកើតប៉ុណ្ណោះ។បើជប៉ុនមានវិស័យយោធាខ្លាំងខាងមុខ វាជារឿងចៀសមិនរួចដែលប្រទេសជិតខាងពីរចិននិងជប៉ុនត្រូវប្រឈមមុខដាក់គ្នា និងអាចឈានទៅប៉ះទង្គិចគ្នាដោយអាវុធផងក៏មិនដឹង។
តាំងពីចិនព្យាយាមបន្តបង្កើនអំណាចរបស់ខ្លួនក្នុងតំបន់និងគឃើ្លនទន្ទ្រានយកដែនជម្លោះដោយសង់កោះសិប្បនិម្មិតសម្រាប់បម្រើវិស័យយោធានោះ ជប៉ុនចាប់ផ្តើមលូកដៃបន្តិចម្តង។ ហើយក្រុងត្យូក្យូលូកដៃកាន់តែខ្លាំងក្រោយរដ្ឋាភិបាលហ្វីលីពីនស្វះស្វែងរកការគាំទ្រពីជប៉ុនដើម្បីទប់ទល់ចិនក្នុងបញ្ហាជម្លោះដែនទឹកនេះផង។ ជប៉ុនកន្លងមកធ្លាប់ឧបត្ថម្ភនាវាល្បាតជាច្រើនគ្រឿង ដល់រដ្ឋាភិបាលក្រុងម៉ានីលដើម្បីពង្រឹងសកម្មភាពល្បាតតាមសមុទ្រ ប៉ុន្តែជប៉ុនមិនអាចផ្តល់ជំនួយយោធាធំដុំជាងនេះទេ ដ្បិតតែមានការហាមឃាត់ដោយរដ្ឋធម្មនុញ្ញសន្តិភាព។ ដូច្នេះ បើសិនច្បាប់សន្តិសុខថ្មីត្រូវដាក់អនុវត្ត ក្រុងតូក្យូ នឹងមានឱកាសពង្រឹងទ័ពខ្លួនផង និងមានលទ្ធភាពផ្តល់ជំនួយអាវុធយុទ្ធភ័ណ្ឌដល់មិត្តខ្លួនជាពិសេសរដ្ឋដែលកំពុងតតាំងចិនដូចជាហ្វីលីពីននេះផង។ ក្រៅពីហ្វីលីពីន វៀតណាមក៏អាចក្លាយជាគោលដៅចម្បងរបស់ជប៉ុនដែរ។ ជប៉ុនអាចនឹងជួយរដ្ឋដើម្បីទប់ទល់អំណាចចិនក្នុងតំបន់។ អាចនិយាយបានថា ផែនការរយៈពេលវែង ជប៉ុននិងសម្ព័ន្ធមិត្តអាមេរិកនឹងសហការគ្នាជួយបណ្តារដ្ឋដែលមានជម្លោះជាមួយចិន។ វៀតណាមងាកទៅរកអាមេរិកខ្លាំងរយៈពេលប៉ុន្មានឆ្នាំចុងក្រោយ ហើយថ្មីៗនេះហ្វីលីពីនក៏សម្រេចអនុញ្ញាតឲ្យអាមេរិកប្រើប្រាស់មូលដ្ឋានយោធា Subic Bayរបស់ខ្លួនឡើងវិញទៀត។ ទៅថ្ងៃមុខ ហ្វីលីពីននិងវៀតណាមនឹងក្លាយជាតួអង្គសំខាន់ ដែលមាននាទីទប់ទល់ចិន ដែលពួកគេស្ថិតក្រោមការជ្រោមជ្រែងរបស់អាមេរិកនិងជប៉ុនផ្ទាល់។
ក្រៅពីជួយជ្រោមជ្រែងភាគីជម្លោះ ជប៉ុនក៏ប្រឹងប្រែងពង្រឹងចំណងការទូតជាមួយរដ្ឋនៅតំបន់អាស៊ីអាគ្នេយ៍ឲ្យកាន់តែស្អិតល្មួតឡើងដែរ ព្រោះចិនក៏កំពុងប្រឹងអូសទាញរដ្ឋនៅអាស៊ីអាគ្នេយ៍ស្រាប់។ ជប៉ុនមិនបាននៅស្ងៀមឡើយកន្លងមក តែបានសម្រេចចេញគម្រោងហិរញ្ញវត្ថុទំហំ ១១០ពាន់លានដុល្លារសម្រាប់លើកកម្ពស់ការកសាងហេដ្ឋារចនាសម្ព័ន្ធតំបន់ផង។ គេមើលឃើញច្បាស់ថា គម្រោងថ្មីរបស់ចិន គឺដើម្បីប្រជែងគម្រោងរបស់ចិនដែលបង្កើតឡើងដើម្បទាក់ទាញបណ្តារដ្ឋនានា និងពង្រីកឥទ្ធិពលរបស់ខ្លួនក្នុងតំបន់ផង។
ក្រុងប៉េកាំងប្រឹងប្រែងពង្រឹងទំនាក់ទំនងជាមួយរដ្ឋនៅអាស៊ីអាគ្នេយ៍ដោយប្រើលុយជំនួយវាល់លានដុល្លារ ហើយក៏ដាក់ចេញគម្រោងលើកកម្ពស់ការកសាងហេដ្ឋារចនាសម្ព័ន្ធ បង្កើនការផ្សារភ្ជាប់រវាងរដ្ឋជាមិត្តរបស់ចិន ជាមួយចិនឲ្យជិតស្និទ្ធនិងឈានទៅពង្រឹងចំណងពាណិជ្ជកម្មនិងសហប្រតិបត្តិការសេដ្ឋកិច្ច។ ដូចឃើញស្រាប់ ចិនដាក់ចេញគំនិតផ្តូចផ្តើមថ្មី «ខ្សែក្រវ៉ាត់មួយវិថីមួយ» និងមួយវិញទៀតនោះគឺការបង្កើតធនាគារវិនិយោគហេដ្ឋារចនាសម្ព័ន្ធអាស៊ីថ្មីនេះផងដែរ ដែលធនាគារនេះទាក់ទាញរដ្ឋជាច្រើនក្នុងនោះមានទាំងសម្ព័ន្ធមិត្តអាមេរិកផង លើកលែងតែជប៉ុន៕
Tag:
សមុទ្រចិនខាងត្បូង
ស៊ីនហ្សូអាបេ
© រក្សាសិទ្ធិដោយ thmeythmey.com
