អន្តរជាតិ
នយោបាយអន្តរជាតិ
របាយការណ៍ការពារជាតិជប៉ុនបំផ្លាញទំនាក់ទំនងជប៉ុនជាមួយចិន ![](https://image.thmeythmey.com/pictures/2015/07/22/2272015152156japan_south_china.jpg)
×![]()
របាយការណ៍ការពារជាតិប្រចាំឆ្នាំរបស់ជប៉ុនបានធ្វើឲ្យចិនខឹងសម្បារយ៉ាងខ្លាំង ដែលរបាយការណ៍នោះថ្កោលទោសចិនក្នុងសំណុំរឿងសមុទ្រចិនខាងត្បូង។ ចិនខឹងច្រឡោតដោយហៅរបាយការណ៍រដ្ឋាភិបាលលោក ស៊ីនហ្សូ អាបេ ថាជារបាយការណ៍បំភាន់ បំភ្លៃ និងផ្ទុយជាការពិតទាំងស្រុង។ ចិនអះអាងយ៉ាងថាច្បាស់ របាយការណ៍កម្រាស់៥០០សន្លឹកនឹងបំផ្លាញទំនាក់ទំនងទ្វេភាគីដែលប្រទេសទាំងពីរប្រឹងសាងយូរឆ្នាំមកហើយ។
លោក មុំ ពិទូរ្យ លម្អិតព័ត៌មាននេះ
របាយការណ៍ការពារជាតិប្រចាំឆ្នាំដែលចេញកាលពីថ្ងៃ អង្គារ របស់ក្រុងតូក្យូមានទិតៀនចិនខ្លាំងៗរឿងបន្តវាតទីកាត់យកដែនទឹកនៅតំបន់ជម្លោះជាមួយខ្លួននៅសមុទ្រចិនខាងកើតនិងនៅសមុទ្រចិនខាងត្បូង។ ជប៉ុនទាមទារឲ្យក្រុងប៉េកាំងបញ្ឈប់ចេតនាទុច្ចរិត ប្រឹងតំឡើងឧបករណ៍បូបប្រេង និងឧស្ម័នធម្មជាតិនៅក្បែរតំបន់ជម្លោះកោះសេនកាគូនៅសមុទ្រចិនខាងកើតរវាងជប៉ុននិងចិន។ របាយការណ៍នេះក៏ចាត់ទុកមហាអំណាចចិនដែលស្ថិតនៅក្បែរខាងខ្លួននោះជាគ្រោះថ្នាក់ធំសម្រាប់សន្តិសុខជប៉ុន និងតំបន់ទាំងមូល។
របាយការណ៍កម្រាស់ ៥០០ទំព័រ ដែលគេហៅរបាយការណ៍ក្រដាសសនេះបានធ្វើឲ្យរដ្ឋាភិបាលចិនខឹងច្រឡោត ដោយចិនចោទជប៉ុនវិញថាកំពុងប្រឹងលាបពណ៌ និងបំភ្លៃការពិតជុំវិញសកម្មភាពចិននៅសមុទ្រចិនខាងកើតនិងនៅតំបន់សមុទ្រចិនខាងត្បូង។
ទំនាក់ទំនងទ្វេភាគីរបស់ប្រទេសទាំងពីរចាប់ផ្តើមប្រសើរឡើងកាលពីឆ្នាំមុន ក្រោយប្រមុខរដ្ឋាភិបាលជប៉ុនលោក ស៊ីនហ្សូ អាបេ និងប្រមុខរដ្ឋចិនលោក ស៊ី ជិនពីង បានជួបពិភាក្សាគ្នាជាលក្ខណៈឯកតោភាគីជាប្រវត្តិសាស្ត្រក្រៅកិច្ចប្រជុំកំពូលសហប្រតិបត្តិការអាស៊ីប៉ាស៊ីហ្វិក ដែលធ្វើឡើងនៅក្រុងប៉េកាំង។ ជំនួបនេះបានជួយឲ្យទំនាក់ទំនងប្រទេសទាំងពីរប្រសើរឡើងបន្តិច និងអាចត្រួសត្រាយផ្លូវសម្រាប់ពង្រឹងសហប្រតិបត្តិការផងដែរ។ ប៉ុន្តែក្រោយត វាជារឿងចៀសមិនផុតដែលរបាយការណ៍ការពារជាតិរបស់ចិននេះធ្វើឲ្យខូចខាតប្រយោជន៍ និងប៉ះពាល់ខ្លាំងដល់ទំនាក់ទំនងទ្វេភាគីរវាងចិននិងជប៉ុនដែលទើបល្អប្រសើរឡើងកាលពីឆ្នាំទៅមិញនេះ។
អ្នកនាំពាក្យក្រសួងការបរទេសចិនLu Kang បានសង្កត់ធ្ងន់ថា របាយការណ៍ជប៉ុនមិនបានទទួលស្គាល់ការពិត ជាពិសេសមិនទទួលស្គាល់សកម្មភាពចិនដែលកំពុងធ្វើបច្ចុប្បន្នជាសកម្មភាពស្របច្បាប់អនុលោមតាមបទដ្ឋានអន្តរជាតិឡើយ។ លោកបានបន្ថែមថា សកម្មភាពចិនសុទ្ធតែស្របច្បាប់និងស្ថិតក្រោមអធិបតេយ្យរបស់ខ្លួន ហើយកោះដៀវយូ (សេនកាគូ) ជាកោះរបស់ចិនតាំងពីសម័យបុរាណមកម្ល៉េះ។ ចិនប្តេជ្ញាថានឹងប្រើប្រាស់រាល់វិធានការចាំបាច់ដើម្បីការពារអធិបតេយ្យរបស់ខ្លួនទប់ទល់ជាមួយអ្នកដែលចង់ឈ្លានពាននិងរំលោភអធិបតេយ្យខ្លួនផងដែរ។ អ្នកនាំពាក្យម្នាក់នេះក៏បានផ្តាំផ្ញើរទៅក្រុងតូក្យូផងដែរ កុំឲ្យព្យាយាមបំភ្លៃការពិត ធ្វើឲ្យចិនខូចកេរ្តិ៍ឈ្មោះដូច្នេះទៀត។
អ្វីដែលគួរឲ្យភ្ងាក់ផ្អើលនៅពេលនេះ គឺជប៉ុនស្រាប់តែចេញមុខរិះគន់សកម្មភាពចិននៅក្នុងសមុទ្រចិនខាងត្បូងទៀត ទាំងដែលខ្លួនមិនមែនជាភាគីជម្លោះទាល់តែសោះនោះ។ ជប៉ុនក៏ទាមទារឲ្យចិនបញ្ឈប់សកម្មភាពសាងសង់កោះ និងត្រៀមដាក់មូលដ្ឋានយោធានៅក្នុងដែនជម្លោះសមុទ្រចិនខាងត្បូងដូចគ្នាដែរ ដោយជប៉ុនបារម្ភខ្លាំងពីអនាគតសកម្មភាពពាណិជ្ជកម្មតាមសមុទ្រជាពិសេសពាណិជ្ជកម្មឆ្លងតាមសមុទ្រចិនខាងត្បូងតែម្តង៕
Tag:
សមុទ្រចិនខាងត្បូវ
ស៊ីនហ្សូអាបេ
© រក្សាសិទ្ធិដោយ thmeythmey.com