អន្តរជាតិ
ចិនចង់ឲ្យហ្វីលីពីនដកបណ្តឹងសំណុំរឿងសមុទ្រចិនព្រោះខ្លាចអាម៉ាសលើឆាកអន្តរជាតិ ![](https://image.thmeythmey.com/pictures/2015/07/24/china-philippines.jpg)
×![]()
ជម្លោះសមុទ្រចិនខាងត្បូង មិនត្រឹមតែជាបញ្ហាដែលត្រូវបានដឹងលឺនៅក្នុងតំបន់នោះទេ តែសហគមន៍អន្តរជាតិផ្តោតអារម្មណ៍ និង កំពុងលូកដៃចូលផងដែរ។ កាលពីថ្មីៗនេះរដ្ឋាភិបាលក្រុងប៉េកាំងប្រកាសធ្វើសមយុទ្ធយោធានៅតំបន់សមុទ្រចិនខាងត្បូង ហើយភ្លាមស្រាប់តែទទូចឲ្យហ្វីលីពីនដកពាក្យបណ្តឹងប្រឆាំងខ្លួននៅមជ្ឈត្តការអន្តរជាតិ ស្របគ្នាតែម្តង។ គេសន្និដ្ឋានថា នេះប្រហែលជាចិនចង់រក្សាកេរ្តិ៍ឈ្មោះក្នុងនាមជាមហាយក្សមួយរបស់ពិភពលោក ។
រដ្ឋាភិបាលក្រុងប៉េកាំងបានចាប់ផ្តើមធ្វើសមយុទ្ធយោធារយៈពេល១០ថ្ងៃនៅក្នុងតំបន់ជម្លោះសមុទ្រចិនខាងត្បូងកាលពីថ្ងៃពុធ ខណៈស្ថានភាពកំពុងតែមានការតានតឹងស្រាប។ ស្របពេល ជាមួយគ្នានោះដែរចិនក៏បានទទូចឲ្យហ្វីលីពីន ដកពាក្យបណ្តឹងប្រឆាំងខ្លួននៅមជ្ឈត្តការ អន្តរជាតិពីបទរំលោភបំពានដែនអធិបតេយ្យផងដែរ។ សកម្មភាពពីរផ្សេងគ្នា ក្នុងពេលតែមួយនេះ ត្រូវបានគេចាត់ទុកថាជាយុទ្ធសាស្ត្រ «វាយផង អង្អែលផង» របស់ចិនដើម្បីការពារកុំឲ្យអាម៉ាស់កើតឡើងនៅក្នុងឆាកអន្តរជាតិ។
យោងតាមរដ្ឋបាលសុវត្ថិភាពដែនសមុទ្រចិន នាវាចម្បាំងរបស់ចិនជាច្រើនគ្រឿងត្រូវបានបញ្ជូនទៅកាន់តំបន់ភាគខាងកើតនៃកោះហៃណាន ដែលជាផ្នែកមួយនៃតំបន់ជម្លោះសមុទ្រចិនខាងត្បូង ដើម្បីធ្វើលំហាត់យោធានៅទីនោះ។ អ្វីដែលគួរកត់សម្គាល់នោះ ក្រៅពីនាវាដែលត្រូវធ្វើសមយុទ្ធ គេក៏មិនត្រូវបានអនុញ្ញាតឲ្យមានការចរាចរណ៍នាវានៅក្នុងតំបន់នោះឡើយ។ សន្តិសុខដែនសមុទ្រ ត្រូវបានរឹតត្បិតចំពោះការឆ្លងកាត់ ដើម្បីទប់ស្កាត់គ្រោះថ្នាក់។ ជុំវិញការធ្វើលំហាត់យោធាជាលក្ខណៈឯកតោភាគី គេចាត់ទុកថាជាការបង្ហាញសាច់ដុំយោធាកំញើញហ្វីលីពីន ដែលបានដំណើរការមូលដ្ឋានយោធាដ៏ធំរបស់អាមេរិកនៅក្បែរតំបន់ជម្លោះ និង ថែមទាំងទិញអាវុធថ្មីៗផ្សេងទៀតផង។ ជាពិសេសនោះ ចេតនារបស់រដ្ឋាភិបាលក្រុងប៉េកាំង គឺចង់បង្ហាញទៅកាន់ជប៉ុនដែលមិនមែនជាភាគជម្លោះ កុំឲ្យលូកដៃជ្រៅ ជួយហ្វីលីពីនខ្លួនជុំវិញសំណុំរឿងសមុទ្រចិនខាងត្បូង។
ក្នុងពេលជាមួយគ្នា រដ្ឋាភិបាលក្រុងប៉េកាំង ក៏ស្រាប់តែទទូចឲ្យហ្វីលីពីនដកពាក្យបណ្តឹងនៅមជ្ឈត្តការអន្តរជាតិវិញផង។ សំណុំរឿងនោះ ត្រូវបានហ្វីលីពីនបញ្ជូនទៅមជ្ឈត្តការអន្តរជាតិតាំងពីឆ្នាំ២០១៣ ហើយបច្ចុប្បន្នហ្វីលីពីនកំពុងរង់ចាំការសម្រេចពីមជ្ឈត្តករជុំវិញយុត្តាធិការលើសំណុំរឿងនេះតែប៉ុណ្ណោះ។ បន្ថែមពីនេះចិនក៏បានស្នើហ្វីលីពីន ត្រលប់មកចរចាជាលក្ខណៈទ្វេរភាគីដើម្បីបញ្ចៀសបញ្ហា។
ក្នុងក្រសែរភ្នែកអ្នកវិភាគ សកម្មភាពរបស់ចិនគឺជាយុទ្ធសាស្ត្រមួយដែលចង់កេងចំណេញទាំងកេរ្តិ៍ឈ្មោះនិង បង្ហាញពីសក្តានុពលយោធារបស់ខ្លួននៅក្នុងឆាកអន្តរជាតិ ជាពិសេសទៅរដ្ឋទាំងឡាយ ដែល មានចេតនាប្រឆាំងជាមួយចិន។
គួរបញ្ជាក់ផងដែរ ចិន មិនបានយល់ព្រមតាមសំណើរបស់ហ្វីលីពីនដោយចូលរួមក្នុងសវនការមជ្ឈត្តការតុលាការអចិន្ត្រៃយ៍ក្រុងឡាអេនោះទេ។ ក៏ប៉ុន្តែ ករណីហ្វីលីពីននាំសំណុំរឿងទៅដោះស្រាយតាមច្បាប់អន្តរជាតិ អាចធ្វើឲ្យចិនដែលជាភាគីតែមួយគត់ដែលទាមទារដែនអធិបតេយ្យក្នុងតំបន់ជម្លោះសមុទ្រចិនខាងត្បូងដោយយោងតាមប្រវត្តិសាស្ត្ររងភាពអាម៉ាស់ខ្លាំង។ នេះក៏ ព្រោះចិនក៏ជាភាគីអនុសញ្ញាស្តីនៃច្បាប់សមុទ្រ ប៉ុន្តែកំពុងបំពានច្បាប់ទៅវិញ។ មួយវិញទៀត បើចិនមិនព្រមបន្ទន់ខ្លួននោះទេ អ្នកដែលត្រូវខាតបង់ដោយសារការប៉ះទង្គិចគ្នា ដោយអាវុធ គឺចិនខ្លួនឯងតែម្តង។ នោះក៏ព្រោះតែចិន បានកសាងសំណង់ជាច្រើនរួមមានស្ថានីយ៍បូមប្រេង មូលដ្ឋានយោធា និង កោះសិប្បនិម្មិតជាដើម៕
Tag:
ចិន
ហ្វីលីពីន
សមុទ្រចិនខាងត្បូង
© រក្សាសិទ្ធិដោយ thmeythmey.com