អន្តរជាតិ
នយោបាយអន្តរជាតិ
ប៉េកាំងមិនឲ្យរដ្ឋាភិបាលក្រុងវ៉ាស៊ីនតោនលូកដៃរឿងសមុទ្រចិនខាងត្បូង ![](https://image.thmeythmey.com/pictures/2015/07/27/china_us_sea.jpg)
×![]()
ជម្លោះសមុទ្រចិនខាងត្បូងគឺបញ្ហាដែនអធិបតេយ្យភាពរវាងរដ្ឋអាស៊ានជាមួយនឹងមហាយក្សចិន។បញ្ហានេះបានធ្វើឲ្យមានភាពតានតឹងនៃការប្រកួតប្រជែងទាំងផ្នែកយោធានិងការទូតរវាងរដ្ឋពាក់ពន្ធ័ជាពិសេសហ្វីលីពីននិងចិន។អវត្តមាននៃការដោះស្រាយបានធ្វើឲ្យហ្វីលីពីនត្រូវសម្រេចដំណើរការដោះស្រាយបញ្ហាតាមមជ្ឈត្តការតែម្នាក់ឯងលើការវាទទីរបស់ចិននៅក្នុងតំបន់ជម្លោះ។ជុំវិញបញ្ហាអាមេរិកក៏បានជំរុញឲ្យភាគីវិវាទទាំងពីរត្រូវអនុវត្តតាមច្បាប់អន្តរជាតិដែលត្រូវបានក្រុងប៉េកាំងចាត់ទុកថាជាលូកដៃបញ្ហារដ្ឋខាងក្រៅនិងប្រើប្រាស់ឥទ្ធិពលរបស់ខ្លួនដោយប្រយោលទៅលើសំណុំរឿងនេះ។
លោក មុំ ពិទូរ្យ លម្អិតព័ត៌មាននេះ
កាលពីចុងសបា្តហ៍កន្លងទៅនេះរដ្ឋាភិបាលក្រុងប៉េកាំងបានរិះគន់យ៉ាងចាស់ដៃលើការជ្រៀតជ្រែករបស់រដ្ឋាភិបាលក្រុងវ៉ាស៊ីនតោនលើបញ្ហាសមុទ្រចិនខាងត្បូង។សេចក្តីថ្លែងការណ៍នេះត្រូវបានធ្វើឡើងក្រោយអាមេរិកបានព្យាយាមប្រើប្រាស់ឥទ្ធិពលរបស់ខ្លួនទៅលើសំណុំរឿងដែលហ្វីលីពីនបានប្តឹងទៅកាន់មជ្ឈត្តការអន្តរជាតិដោយចោទចិនថាបានបំពានទៅលើដែនអធិបតេយ្យខ្លួន។
ជាគោលការណ៍រដ្ឋាភិបាលក្រុងប៉េកាំងបានចាត់ទុកជម្លោះសមុទ្រចិនខាងត្បូងគឺជាបញ្ហាដែលត្រូវដោះស្រាយជាលក្ខណៈទ្វេរភាគី។បន្ថែមពីរដ្ឋាភិបាលចិនតែងតែងច្រានចោលរាល់ការដោះស្រាយតាមផ្លូវតុលាការផងដែរ។
យ៉ាងណាក៏ដោយខណៈពេលដែលសំណុំរឿងសមុទ្រចិនខាងត្បូងកំពុងស្ថិតនៅក្នុងនីតិវិធីរបស់មជ្ឈត្តការនៃតុលាការអន្តរជាតិអចិន្ត្រៃយ៍លោក Daniel Russel មន្ត្រីជាន់ខ្ពស់រដ្ឋាភិបាលក្រុងវ៉ាស៊ិនតោនបែរជាចេញមុខអះអាងករណីនេះគួរតែត្រូវដោះស្រាយតាមច្បាប់អន្តរជាតិ។លោកបន្ថែមទៀតថាចិននិងហ្វីលីពីនគឺជាភាគីហត្ថលេខីនៃអនុសញ្ញាស្តីពីច្បាប់សមុទ្រអង្គការសហប្រជាជាតិពោលគឺភាគីទាំងពីរត្រូវតែអនុវត្តកាតព្វកិច្ចទៅតាមការកំណត់នៅក្នុងច្បាប់នេះ។
ឆ្លើយតបជាមួយនឹងការលើកឡើងនេះចិនបានចាត់ទុកសកម្មភាពសហរដ្ឋអាមេរិកថាកំពុងតែជ្រៀតជ្រែកលើបញ្ហារដ្ឋដទៃដែលប្រើប្រាស់ឥទ្ធិពលរបស់ខ្លួនដោយប្រយោលទៅលើការសម្រេចរបស់មជ្ឈត្តការអន្តរជាតិ។ជាមួយគ្នានេះរដ្ឋមន្ត្រីការបរទេសចិនបានបញ្ជាក់ជាច្រើនដងហើយថាអនុសញ្ញាដែលអាមេរិកនិងរដ្ឋពាក់ពន្ធ័ផ្សេងលើកឡើងមិនមានអនុភាពទៅលើបញ្ហានេះទេពោលគឺសំណុំរឿងនេះគឺជាបញ្ហាអធិបតេយ្យភាពមិនមែនជាការបំពានសិទ្ធិដូចដែលច្បាប់បានកំណត់នោះឡើយ។
អ្វីដែលគួរកត់សម្គាល់នោះសហរដ្ឋអាមេរិកខ្លួនឯងផ្ទាល់មិនទាន់បានក្លាយសមាជិកពេញអង្គនៃសន្ធិសញ្ញានេះផងបែរជាចេញមុខជំរុញនិងរិះគន់គេឲ្យអនុវត្តច្បាប់ទៅវិញ។សកម្មភាពនេះអាចនឹងត្រូវឲ្យគេរិះគន់អាមេរិកថាកំពុងតែដើរតួនាទីហួសព្រំដែនហើយនឹងធ្វើឲ្យចិនកាន់តែឃា្លតឆ្ងាយពីការដោះស្រាយដើម្បីបញ្ចប់បញ្ហា។
គួររំលឹកផងដែរសំណុំរឿងដែលហ្វីលីពីនបានដាក់ទៅកាន់មជ្ឈត្តការអន្តរជាតិដោយឯកតោភាគីកំពុងរង់ចាំការសម្រេចពីមជ្ឈត្តករថាតើមានយុត្តិធិការដោះស្រាយលើវិវាទនេះឬអត់។មួយវិញទៀតបើនីតិវិធីនៃសំណុំរឿងនេះត្រូវបានមជ្ឈត្តករសម្រេចថាចិនពិតជាបំពានទៅនឹងដែនអធិបតេយ្យហ្វីលីពីនដែលសម្ពន្ធ័មិត្តរបស់អាមេរិកនៅអាស៊ានមែននោះចិននឹងត្រូវរងនូវភាពអាម៉ាសចំពោះសហគមន៍អន្តរជាតិជាក់ជាមិនខាន៕
© រក្សាសិទ្ធិដោយ thmeythmey.com