អន្តរជាតិ
ចិនពង្រឹងការត្រួតពិនិត្យលើការនាំចេញដ្រូន និងកុំព្យូទ័រល្បឿនលឿន ![](https://image.thmeythmey.com/pictures/2015/08/03/drone_china.jpg)
×![]()
សារព័ត៌មានរដ្ឋចិនបានចុះផ្សាយថ្ងៃអាទិត្យម្សិលមិញថា រដ្ឋាភិបាលចិននឹងពង្រឹងការត្រួតពិនិត្យលើការនាំចេញដ្រូននិងកុំព្យូទ័រល្បឿនលឿនមួយចំនួន ក្នុងទិសដៅការពារសន្តិសុខជាតិ។ ការសម្រេចពង្រឹងបែបនេះ ធ្វើឡើង២សប្តាហ៍ប៉ុណ្ណោះ បន្ទាប់ពីមានការប៉ះទង្គិចនៅព្រំដែនរវាងឥណ្ឌានិងប៉ាគីស្ថាន។ កងទ័ពប៉ាគីស្ថានបានប្រកាសថា បានកំចាត់ដ្រូនស៊ើបការណ៍ឥណ្ឌា ដែលអាចជាផលិតផលរបស់ចិន។
២សប្តាហ៍មុននេះ អ្នកជំនាញជាច្រើនបានលើកឡើងថា ដ្រូនឥណ្ឌាដែលកងទ័ពប៉ាគីស្ថានបានកំចាត់នោះ អាចជាផលិតផលរបស់ប្រទេសចិន។ ដូច្នេះហើយ ទើបក្រុងប៉េកាំងសម្រេចរឹតបន្តឹងការនាំចេញផលិតផលដ្រូនអោយខ្លាំងក្លាជាងមុន។
ក្រសួងពាណិជ្ជកម្មនិងរដ្ឋបាលពន្ធដារចិនបានចេញបទបញ្ជាថ្មី តំរូវអោយក្រុមហ៊ុនជាតិដែលផលិតដ្រូននិងកុំព្យូទ័រល្បឿនលឿន ចាប់ពីថ្ងៃ១៥កក្កដានេះទៅ ត្រូវចុះបញ្ជីផលិតផលប្រាប់អោយក្បោះក្បាយពីលក្ខណៈផលិតផលជាមុនសិន មុននឹងនាំចេញទៅក្រៅប្រទេស។ ដ្រូនដែលត្រូវស្ថិតក្រោមការត្រួតពិនិត្យនេះ គឺជាដ្រូនដែលហោះស្វ័យតបានជាងមួយម៉ោង ហើយអាចហោះកំពស់ខ្ពស់ជាង១៥៤២០ម៉ែត្រ។
គិតក្នុង៥ខែដើមឆ្នាំ២០១៥ ចិនបាននាំចេញដ្រូនស៊ីវិលប្រមាណ១៦០ ០០០គ្រឿង ទៅក្រៅស្រុក មានតម្លៃប្រមាណ១២០លានដុល្លារ។ក្រុមហ៊ុនDJI ចិនជាក្រុមហ៊ុនផលិតដ្រូនស៊ីវិលដ៏ធំ និងគ្រប់គ្រងទីផ្សារពិភពលោកប្រមាណ៧០ភាគរយ។ ប៉ុន្តែក្រុមហ៊ុនប្រាប់ថា ផលិតផលខ្លួនមិនជាប់ទាក់ទងនឹងការត្រួតពិនិត្យដែលរដ្ឋាភិបាលប្រកាសពេលនេះទេ។
ចំពោះការពង្រឹងការនាំចេញកុំព្យូទ័រដែលដើរលឿនវិញ ចិនប្រហែលជាចង់រក្សាទុកនូវបច្ចេកវិទ្យាដ៏ជឿនលឿនរបស់ខ្លួន។ គួរបញ្ជាក់ថា តាំងពីខែមិថុនា ឆ្នាំ២០១៣មក កុំព្យូទ័រ Tianhe-2 របស់ចិន បានលេចធ្លោបំផុត ក្នុងតារាងចំណាត់ថ្នាក់ទាំង៥០០នៃកុំព្យូទ័រល្បឿនលឿនបំផុតក្នុងពិភពលោក៕
© រក្សាសិទ្ធិដោយ thmeythmey.com