ជាតិ
×![]()
ការដែលមហាអំណាចចិនបង្កើតគំនិតផ្តួចផ្តើម «ខ្សែក្រវាត់មួយ និងផ្លូវមួយ» និងធនាគារវិនិយោគហេដ្ឋារចនាសម្ព័ន្ធអាស៊ីនៅពេលនេះ វាកំពុងផ្តល់ផលប្រយោជន៍មកដល់កម្ពុជាដែលជាមហាមិត្តគ្រប់ជ្រុងជ្រោយរបស់ចិន។ លោកនាយករដ្ឋមន្ត្រី ហ៊ុន សែន សង្ឃឹមថា កម្ពុជានឹងទទួលបានឥណទានពីធនាគារថ្មីនេះ ដើម្បីអភិវឌ្ឍន៍កម្ពុជាបន្តទៀត។
ប្រមុខរដ្ឋាភិបាលកម្ពុជា លោក ហ៊ុន សែន បានកត់សម្គាល់បែបវិជ្ជមាន ថាវាហាក់ដូចជាចំពេលល្អមែនទែន នៅពេលដែលកម្ពុជាកំពុងកសាងបណ្តាញតភ្ជាប់ផ្លូវថ្នល់ក្នុងក្របខណ្ឌផ្ទៃក្នុងប្រទេស និងក្នុងតំបន់ ស្រាប់តែមហាមិត្តចិនរបស់ខ្លួនបង្កើតគំនិតផ្តួចផ្តើមផ្លូវសូត្រ និងធនាគារវិនិយោគហេដ្ឋារចនាសម្ព័ន្ធអាស៊ី។
«បន្ថែមពីលើនេះ ធនាគារដែលវិនិយោគលើហេដ្ឋារចនាសម្ព័ន្ធ ហើយដែលកម្ពុជាជាសហស្ថាបនិកមួយដែរនោះ មានទំហំទឹកប្រាក់វិនិយោគ១០០ពាន់លានដុល្លារ។ កម្ពុជាសង្ឃឹមថានឹងអាចទទួលបានឥណទានទាំងនេះដើម្បីអនុវត្តគម្រោងថ្មីៗរបស់ខ្លួនដែលត្រូវបានដាក់បញ្ជូនទៅមិត្តចិនរួចហើយ»។ នេះជាការរៀបរាប់របស់លោកនាយករដ្ឋមន្ត្រីកម្ពុជា ដែលបានហៅមិត្តចិនមិនដាច់ពីមាត់។
បើស្តាប់សុន្ទរកថារបស់លោកស្រីឯកអគ្គរដ្ឋទូតចិន ពូ ជៀនគ័រ នៅក្នុងពិធីសម្ពោធស្ពានមិត្តភាពកម្ពុជា-ចិន តាខ្មៅ ស្ពានតាខ្មៅនេះគឺជាសមិទ្ធផលមួយនៃនយោបាយនៃការតភ្ជាប់គ្នាផ្នែកហេដ្ឋារចនាសម្ព័ន្ធរវាងប្រទេសចិននិងកម្ពុជារួចទៅហើយ។ ហើយថា បើតាមការបញ្ជាក់របស់លោកស្រីឯកអគ្គរដ្ឋទូតដដែល រដ្ឋាភិបាលចិនរបស់លោកស្រីបានត្រៀមខ្លួនដើម្បីជួយសម្រេចផែនការអនាគតរបស់កម្ពុជាក្នុងការដ្ឋានសាងសង់ហេដ្ឋារចនាសម្ព័ន្ធផ្លូវថ្នល់។ លោកស្រី ពូ ជៀនគ័រ អះអាងយ៉ាងដូច្នេះ៖«ភាគីចិនមានគោលបំណងឆ្លៀតឱកាសកសាងគំនិតផ្តួចផ្តើម ខ្សែក្រវាត់មួយនិងផ្លូវមួយ តភ្ជាប់ជាមួយផែនការអនាគតរបស់រាជរដ្ឋាភិបាលកម្ពុជា ជួយដល់ប្រទេសកម្ពុជា ក្នុងការសាងសង់ និងជួសជុលផ្លូវ និងស្ពានកាន់តែច្រើន ធ្វើយ៉ាងណាធ្វើឲ្យការអភិវឌ្ឍន៍របស់ប្រទេសចិនក្លាយជាកាលានុវត្តភាពដ៏សំខាន់សម្រាប់ជំរុញ ដល់ការអភិវឌ្ឍន៍របស់កម្ពុជា។ ធ្វើឲ្យការអភិវឌ្ឍន៍របស់ប្រទេសចិននាំផលប្រយោជន៍កាន់តែច្រើនដល់កម្ពុជា និងជួយរាជរដ្ឋាភិបាលកម្ពុជាសម្រេចគោលដៅយុទ្ធសាស្ត្រចតុកោណក្នុងពេលឆាប់ៗនេះ»។
និយាយពីសារសំខាន់នៃកំណាត់ផ្លូវ និងស្ពានតាខ្មៅនេះ រដ្ឋមន្ត្រីក្រសួងសាធារណៈការ និងដឹកជញ្ជូន លោក ត្រាំ អ៊ីវតឹក បានពន្យល់នៅក្នុងពិធីសម្ពោធស្ពានតាខ្មៅថា ស្ពាន និងកំណាត់ផ្លូវតាខ្មៅនេះ គឺជាផ្លូវវាងរាជធានីភ្នំពេញនៃរបៀងសេដ្ឋកិច្ចខាងត្បូងរបស់មហាអនុតំបន់មេគង្គ ដោយកាត់តាមផ្លូវអាស៊ានហាវេលេខ១១ ឬផ្លូវជាតិលេខ៤របស់កម្ពុជា មកកាន់ផ្លូវជាតិលេខ១ ដែលនឹងភ្ជាប់ដោយរលូនចរាចរណ៍ពីទីក្រុងបាងកក ឆ្ពោះទៅតំបន់អាស៊ាន និងមហាអនុតំបន់មេគង្គ។ លោករដ្ឋមន្ត្រីបន្តឲ្យដឹងដែរថា កំណាត់ផ្លូវ និងស្ពានតាខ្មៅនេះ ក៏នឹងជួយជំរុញការធ្វើពាណិជ្ជកម្ម និងទេសចរណ៍ជាមួយទីក្រុងហូជីមិញ និងភាគខាងត្បូងរបស់វៀតណាម និងរួមចំណែកក្នុងការអភិវឌ្ឍន៍មហាអនុតំបន់មេគង្គ ព្រមទាំងសំដៅអនុវត្ត ការតភ្ជាប់ អាស៊ាន និងការអនុវត្តសហគមន៍សេដ្ឋកិច្ចអាស៊ាន នៅចុងឆ្នាំ២០១៥ផងដែរ៕
Tag:
កម្ពុជា-ចិន
© រក្សាសិទ្ធិដោយ thmeythmey.com
