ចិនខឹងជប៉ុននិងហ្វីលីពីនដែលព្រួតគ្នាវាយប្រហារខ្លួនរឿងសមុទ្រចិនខាងត្បូងក្នុងវេទិកាសន្តិសុខ

ក្រសូងការបរទេសចិនបរិហារជប៉ុននិងហ្វីលីពីននៅព្រហស្បតិ៍ម្សិលមិញនេះថា ប្រទេសទាំងពីរបានព្រួតដៃគ្នាវាយប្រហារខ្លួនក្នុងសំណុំរឿងសមុទ្រចិនខាងត្បូងនៅក្នុងវេទិកាសន្តិសុខដែលរៀបចំឡើងនៅម៉ាឡេស៊ីកាលពីប៉ុន្មានថ្ងៃមុន។ ចិនទំនងជាខឹងសម្បារជប៉ុននិងហ្វីលីពីនខ្លាំង ដែលភាគីទាំងពីរនេះកន្លងមកព្យាយាមថ្កោលទោសចិនដែលវាតទីទន្ទ្រានយកដែនជម្លោះសមុទ្រចិនខាងត្បូង។

លោក មុំ ពិទូរ្យ លម្អិតព័ត៌មាននេះ

ក្រុងប៉េកាំងបានចោទប្រកាន់រដ្ឋាភិបាលជប៉ុន និងហ្វីលីពីនថា បានប្រើប្រាស់វេទិកាសន្តិសុខតំបន់ដែលរៀបចំឡើងនៅម៉ាឡេស៊ីកន្លងមកដើម្បីវាយប្រហារចិនទាំងទទឹងទិសជុំវិញបញ្ហាជម្លោះសមុទ្រចិនខាងត្បូង។

ក្រសួងការបរទេសចិនបានចេញសេចក្តីថ្លែងការណ៍មួយកាលពីម្សិលមិញនេះ ដោយលើកឡើងច្បាស់ថា រដ្ឋមន្ត្រីក្រសួងការបរទេសហ្វីលីពីនបានវាយប្រហារគោលនយោបាយចិនពាក់ព័ន្ធសំណុំរឿងសមុទ្រចិនខាងត្បូងក្នុងកិច្ចប្រជុំសន្តិសុខប៉ុន្មានថ្ងៃមុន ហើយរដ្ឋមន្ត្រីការបរទេសជប៉ុនជាអ្នកចាំគាំទ្រពីក្រោយ។ នេះអាចនិយាយឲ្យខ្លីថា ភាគីទាំងពីរចូលដៃចូលជើង និងព្រួតគ្នាធ្វើឲ្យចិនបាក់មុខលើឆាកអន្តរជាតិ។

មិនមែនមានតែជប៉ុននិងហ្វលីពីនឡើយ ដែលនាំគ្នារិះគន់ចិន អាមេរិកឯណោះក៏មិនអន់ដែរ។ ក្នុងកិច្ចប្រជុំកំពូលអាស៊ីបូព៌ាកាលពីថ្ងៃព្រហស្បតិ៍ រដ្ឋមន្ត្រីការបរទេសអាមេរិកលោក ចន ឃឺរី ក៏ព្យាយាមទាញសំណុំរឿងសមុទ្រចិនខាងត្បូង និងរិះគន់ចិនឥតសំចៃដូចគ្នា។ ប្រមុខការទូតរូបនេះបានលើកឡើងពី ចេតនារបស់ចិនក្នុងការរឹតត្បិតសេរីភាពនាវាចរណ៍នៅសមុទ្រចិនខាងត្បូង ការសាងសង់កោះសិប្បនិម្មិត និងសំណង់ហេដ្ឋរចនាសម្ព័ន្ធនៅតំបន់ជម្លោះផងដែរ។ លោកបង្ហាញក្តីបារម្ភដោយសង្កត់ធ្ងន់ថា សំណង់របស់ចិននៅតំបន់ជម្លោះធ្វើឡើងដើម្បីសម្រួលដល់សកម្មភាពយោធា ដែលវាជារឿងគ្រោះថ្នាក់បំផុតមួយជំរុញឲ្យមានការប្រឈមមុខគ្នាដោយយោធារវាងភាគីជម្លោះដទៃទៀត។

ប៉ុន្តែក្នុងវេទិកាដដែលនេះ រដ្ឋមន្ត្រីការបរទេសចិន លោក Wang Yi បានឆ្លៀតឱកាសឆ្លើយតបការលើកឡើងរបស់រដ្ឋមន្ត្រីការបរទេសអាមេរិក ជប៉ុននិងហ្វីលីពីនផងដែរ ដោយលោកបញ្ជាក់ថា ស្ថានភាពនៅតំបន់សមុទ្រចិនខាងត្បូងនាពេលបច្ចុប្បន្នគឺល្អប្រសើរ និងមានស្ថិតភាពជាធម្មតាទេ ហើយគ្មានសញ្ញានៃការប៉ះទង្គិចគ្នាដោយអាវុធកើតឡើងនោះដែរ។

អាចនិយាយថាមិនមែនជារឿងគួរឲ្យភ្ងាក់ផ្អើលដែលចិន ចេញសេចក្តីថ្លែងការណ៍បកស្រាយនិងវាយបកប្រទេសទាំងនេះនៅពេលនេះឡើយ ព្រោះភាគីទាំងនោះឧស្សាហ៍វាយប្រហារគ្នាដោយពាក្យសម្តីជុំវិញសកម្មភាពរបស់ចិននៅតំបន់ជម្លោះសមុទ្រចិនខាងត្បូងណាស់។

សូមបញ្ជាក់ថា ចិន ទាមទារយកដែនទឹកនៅតំបន់ជម្លោះប្រហែល ៩០ភាគនៃដែនជម្លោះសរុប ខណៈពេលដែលភាគីជម្លោះឯទៀតក៏ទាមទារយកតំបន់នោះដូចគ្នាដែរ។ ប៉ុន្តែស្ថានការណ៍កាន់តែតានតឹងខ្លាំងឡើងៗ ដោយសារចិនបានចំណាយពេលវេលាយូរល្មម និងលុយរាប់ពាន់លានដុល្លារអាមេរិកដើម្បីសាងសង់សំណង់និងវាតទីយកដែនជម្លោះនេះ។ ប៉ុន្តែយ៉ាងណាក៏ដោយចុះស្ថានភាពកាន់តែអាក្រក់នៅពេលដែល ភាគីមួយចំនួនដូចជាជប៉ុននិងអាមេរិកមិនមែនជាភាគីជម្លោះសមុទ្រចិនខាងត្បូងផងនោះ បែរជាចេញមុខលូកដៃយ៉ាងជ្រៅក្នុងបញ្ហាជម្លោះដែនទឹកនេះដែរ។ អាមេរិក និងជប៉ុនបន្តនាំគ្នាគាំទ្រភាគីជម្លោះមួយចំនួនដូចជា វៀតណាម និងហ្វីលីពីន ដើម្បីទប់ទល់ជាមួយចិន។ ដូចដែលបានឃើញស្រាប់ ជប៉ុនបន្តផ្តល់ជំនួយដល់ហ្វីលីពីន ដូចជាកប៉ាល់ល្បាត ហើយគ្រោងនឹងផ្តល់យន្តហោះល្បាតដល់ហ្វីលីពីននៅពេលខាងមុខថែទៀត៕