ជាតិ
នយោបាយជាតិ
លោក ហុង សុខហួរ ស្ថិតនៅក្នុងអគ្គស្នងការដ្ឋាននគរបាលជាតិនៅឡើយ
× លោក ហុង សុខហួរ សមាជិកព្រឹទ្ធសភានៃគណបក្សសម រង្ស៊ី មិនទាន់ត្រូវបានបញ្ជូនទៅកាន់តុលាការឡើយ បើគិតត្រឹមម៉ោង១០ព្រឹកនេះ ពោលគឺប្រមាណ៤ម៉ោងក្រោយការចាប់ខ្លួន។ មន្ត្រីបក្សប្រឆាំងដែលអាចចាត់ទុកថា ជាដៃស្តាំរបស់លោក សម រង្ស៊ី រូបនេះ កំពុងស្ថិតនៅក្រោមការសាកសួរនៅអគ្គស្នងការដ្ឋាននគរបាលជាតិ ខណៈអ្នកកាសែតដ៏ច្រើនកុះករ នាំគ្នារង់ចាំរួចជាស្រេចនៅតុលាការរាជធានីភ្នំពេញ។
លោក ហុង សុខហួរ សមាជិកព្រឹទ្ធសភា គណបក្សសម រង្ស៊ី ត្រូវបានកងកម្លាំងមានសមត្ថកិច្ចចាប់ខ្លួនបានហើយ នាវេលាព្រឹកព្រហាមថ្ងៃសៅរ៍ ទី១៥ ខែសីហា នេះ នៅភូមិគ្រឹះរបស់លោក យន្ត ថារ៉ូ អ្នកតំណាងរាស្ត្រគណបក្សសង្គ្រោះជាតិ ដែលស្ថិតនៅក្នុងភូមិសាស្ត្រសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
លោក អ៊ូ ច័ន្ទឬទ្ធិ តំណាងរាស្ត្រមួយរូបទៀតរបស់គណបក្សសង្គ្រោះជាតិ បានរិះគន់ការចាប់ខ្លួននេះ ដែលប្រើប្រាស់កម្លាំងសមត្ថកិច្ចច្រើនហួសហេតុ ដែលលោក អ៊ូ ច័ន្ទឬទ្ធិ ចាត់ទុកថា ជាការមិនផ្តល់តម្លៃដល់លោក ហុង សុខហួរ ដែលជាសមាជិកព្រឹទ្ធសភា។
ការចាប់ខ្លួនលោក ហុង សុខហួរ បានកើតឡើងបន្ទាប់ពីសមាជិកព្រឹទ្ធសភារូបនេះ និយាយអំពីសន្ធិសញ្ញាមួយដោយបាន ចោទប្រកាន់រដ្ឋាភិបាលសម័យសាធារណៈរដ្ឋប្រជាមានិតកម្ពុជារបស់លោក ហេង សំរិន និងភាគីវៀតណាមរបស់លោក ផាម វ៉ាន់ដុង ថាបានរំលាយព្រំដែននៃប្រទេសជិតខាងទាំងពីរបញ្ចូលគ្នា ហើយដែលការចោទប្រកាន់ដែលផ្សាយតាមហ្វេសប៊ុក លោក សម រង្ស៊ី បានធ្វើឲ្យរដ្ឋាភិបាលបច្ចុប្បន្ន របស់លោកនាយករដ្ឋមន្ត្រី ហ៊ុន សែន ខឹងសម្បារយ៉ាងខ្លាំង ហើយបានបញ្ជាឲ្យមានការតាមចាប់ខ្លួនលោក ហុង សុខហួរ តាំងពីថ្ងៃទី១២សីហាមក៕
Tag:
ហុង សុខហួរ
ព្រំដែន
© រក្សាសិទ្ធិដោយ thmeythmey.com