កីឡាជាតិ
ជាតិ
ប៉ូលិសជួបគិរីវង់ បៀលប្រាយប៉ះវេស្ទើន ខណៈជំនួបបឹងកេត-ការពារជាតិ លើកពេល
លោក ប៉ែន ផាត នាយកបច្ចេកទេសក្លិបវេស្ទើន។ រូបថត ហ្វេសប៊ុកវេស្ទើន
×![]()
ការប្រកួតរវាងក្រុមបឹងកេតអង្គរ និងក្រុមក្រសួងការពារជាតិ នៅល្ងាចថ្ងៃអាទិត្យ ទី ១៦ ខែ សីហា ឆ្នាំ ២០១៥ នេះក្នុងសប្ដាហ៍ទី ១៤ នៃពានរង្វាន់បាល់ទាត់ក្របខណ្ឌមិត្តហ្វូនខេមបូឌានលីក២០១៥ (Metfone Cambodian League) ត្រូវបានលើកពេលប្រកួត ខណៈការប្រកួតរវាងក្រុមអគ្គស្នងការដ្ឋាន នគរបាលជាតិ (ប៉ូលិស) ជួបក្រុមគីរីវង់សុខសែនជ័យ និងក្រុមបៀលប្រាយយូណាយធីត ប៉ះក្រុមវេស្ទើនភ្នំពេញ មិនមានការប្រែប្រួលនោះទេ។
យោងតាមប្រភពមកពីសហព័ន្ធកីឡាបាល់ទាត់កម្ពុជា (FFC) បានឱ្យដឹងថាមូលហេតុដែលមានការលើកពេលប្រកួតរវាងក្រុមបឹងកេតអង្គរ និង ក្រុមក្រសួងការពារជាតិ នៅល្ងាចនេះព្រោះតែសមាជិកជាច្រើនរបស់ការពារជាតិជាប់ក្នុងបញ្ជីក្រុមជម្រើសជាតិ ជាពិសេសក្នុងឈុតយុវជនក្រោមអាយុ១៩ឆ្នាំដែលត្រូវប្រកួតជាមួយក្រុមមីយ៉ាន់ម៉ា នៅប្រទេសថៃវេលាម៉ោង ៣:៣០ នាទីល្ងាចនេះ។ ការប្រកួតនឹងលើកទៅរៀបចំនៅថ្ងៃទី ១៤ ខែ កញ្ញា ឆ្នាំ ២០១៥ ខាងមុខលើទីលានស្តាតចាស់ និងម៉ោង ៣:៣០ នាទីដដែល។
ចំណែកក្រុមអគ្គស្នងការដ្ឋាននគរបាលជាតិ ត្រូវប្រកួតជាមួយក្រុមគីរីវង់សុខសែនជ័យ នៅវេលាម៉ោង ៣:៣០ នាទីល្ងាចថ្ងៃអាទិត្យនេះលើទីលានពហុកីឡដ្ឋានជាតិព្រមទាំងមានផ្សាយផ្ទាល់នៅលើប៉ុស្ដិ៍ទូរទស្សន៍បាយ័នព័ត៌មាន BTV ថែមទៀតផង។ ចំពោះក្រុមប៉ូលិស ដែលដឹកនាំដោយលោកគ្រូបង្វឹក អ៊ុង កងយ៉ានិត ត្រូវការ ៣ ពិន្ទុជាចាំបាច់នៅក្នុងការប្រកួតនេះដើម្បីស្វែងរកកៅអីនៅតំបន់ក្រុមខ្លាំងទាំង៤ប្រចាំរដូវកាល (Top4) ស្របពេលក្រុមគីរីវង់សុខសែនជ័យ ក៏ចង់បានជ័យជម្នះដូចគ្នាដើម្បីឆ្លងផុតពីតំបន់គ្រោះថ្នាក់នៅបាតតារាង។
មួយប្រកួតទៀតចុងក្រោយគេនៅល្ងាចនេះក្រុមបៀលប្រាយយូណាយធីត ត្រូវប្រកួតជាមួយក្រុមវេស្ទើនភ្នំពេញ នៅវេលាម៉ោង ៦ ល្ងាចលើទីលានពហុកីឡដ្ឋានជាតិដូចគ្នា។ ក្រុមសាកលវិទ្យាល័យ ទាំង២ នេះនៅមិនទាន់ស្គាល់ជ័យជម្នះដូចគ្នាគិតពីសប្ដាហ៍ទី ១២ បើកឆាកជើងទី២ MCL 2015 មកនេះ។
តើក្រុមណានឹងអាចរកបាន ៣ ពិន្ទុនៅល្ងាចនេះ?
Tag:
MCL2015
© រក្សាសិទ្ធិដោយ thmeythmey.com
