អន្តរជាតិ
ផ្ទុះរោងចក្រសារធាតុគីមីយ៉ាងសន្ធោសន្ធៅជាថ្មីនៅចិនដោយមិនដឹងមូលហេតុ ![](https://image.thmeythmey.com/pictures/2015/09/01/china_blast.jpg)
×![]()
ឧប្បទ្ទហេតុនៃការផ្ទុះដ៏សន្ធោសន្ធៅមួយ បានកើតឡើងនៅក្នុងតំបន់រោងចក្រសារធាតុគីមីនៅក្នុង ខេត្តសានដុង ភាគខាងជើងនៃប្រទេសចិន។ ការផ្ទុះនេះ គឺជាលើកទី២ហើយ បន្ទាប់ពីការផ្ទុះឃ្លាំង ដែលផ្ទុកសារធាតុគីមីនៅក្នុងខេត្តTianjin ដែលបានបណ្តាលឲ្យប្រជាជនជាងមួយរយនាក់បាត់បង់ជីវិត និង រាប់ពាន់នាក់បានបាត់បង់ទីលំនៅ។
យោងតាមវិទ្យុជាតិចិន ដែលបានបង្ហោះនៅក្នុងគណនីបណ្តាញសង្គម Weibo ឧប្បទ្ទវហេតុនៃការផ្ទុះ សារធាតុគីមីនោះ បានកើតឡើងនៅពាក់កណ្តាលអធ្រាត្រថ្ងៃចន្ទ័។ យ៉ាងណាមិញ មិនទាន់មានការ បញ្ជាក់ពីមូលហេតុ និង របាយការណ៍ពីចំនួនអ្នកស្លាប់ និង របួសនៅឡើយនោះទេ។
សូមរម្លឹកផងដែរ កាលពីថ្ងៃទី១២ ខែសីហា កន្លងទៅនេះ មានឧប្បទ្ទវហេតុនៃការផ្ទុះឃ្លាំងសារធាតុគីមី ពីរដងយ៉ាងសន្ធោសន្ធៅនៅក្នុងទីក្រុងកំពង់ផែTianjinប្រទេសចិន ដែលបានសម្លាប់អាយុជីវិតប្រជាជន ជាងមួយរយនាក់ និង បំផ្លាញទ្រព្យសម្បត្តិឯកជន និង សារធារណៈ រាប់លានដុល្លាសហរដ្ឋអាមេរិក។ ជុំវិញបញ្ហានេះ អាជ្ញាធរចិន មិនទាន់រកឃើញពីមូលហេតុពិតប្រាកដនៅឡើយនោះទេ ក៏ប៉ុន្តែអាជ្ញាធរ បានដាក់ការសង្ស័យ និង ចាប់ខ្លួនអ្នកទទួលខុសត្រូវជាន់ខ្ពស់មួយចំនួនដែលធ្វេសប្រហែសក្នុងការ គ្រប់គ្រងប្រពន្ធ័សុវត្ថិភាព។
យ៉ាងណាក៏ដោយ ការផ្ទុះសារធាតុគីមីជាបន្តបន្ទាប់នេះ បានក្លាយជាចំនោទបញ្ហាមួយដ៏សំខាន់របស់ អាជ្ញាធរដែលត្រូវចាត់វិធានការ។ ហើយអ្វីជាឬសគល់ដែលកំពុងត្រូវបានផ្តោតសំខាន់នោះគឺ អំពើពុករលួយនៅក្នុងស្ថាប័នគ្រប់គ្រងសុវត្ថិភាព ដែលបណ្តាលឲ្យមន្ត្រីមានការខ្វះចន្លោះក្នុងការគ្រប់គ្រង ជាពិសេសនោះលើសារធាតុគីមី៕
© រក្សាសិទ្ធិដោយ thmeythmey.com