អន្តរជាតិ
អតីតនាយករដ្ឋមន្ត្រីម៉ាឡេស៊ី ម៉ាហាធា៖ លោកខាងលិចរួមចំណែកបង្កើតវិបត្តិជនភៀសខ្លួន ![](https://image.thmeythmey.com/pictures/2015/09/18/1892015141328______________________________.jpg)
×![]()
(កូឡាឡាំពួរ)៖ ក្នុងពិធីបើកកម្មវិធីសិក្សាស្តីពីសន្តិភាពពិភពលោកលើកទី៤ នៅក្រុងរដ្ឋបាល ពូត្រាចាយ៉ា (Putra Jaya) អតីតនាយករដ្ឋមន្ត្រីម៉ាឡេស៊ីលោក ម៉ាហាធា មហាម៉េត (Mahathir Mohamad) បានថ្លែងរិះគន់បណ្តាប្រទេសលោកខាងលិចដែលចូលចិត្តប្រើប្រាស់សង្គ្រាមដើម្បីផ្លាស់ប្តូររបបដឹកនាំនានាដែលខ្លួនមិនពេញចិត្ត។ លោកក៏បានអះអាងផងដែរថា វិបត្តិជនភៀសខ្លួន នៅអឺរ៉ុបបច្ចុប្បន្នកើតចេញពីបណ្តាមហាអំណាចទាំងនោះ តែលោកបានទិតៀនមេដឹកនាប្រទេសឥស្លាមមួយចំនួនដែរដែលចូលចិត្តធ្វើសង្គ្រាម។
ថ្លែងបើកកម្មវិធីសិក្សាស្តីពីសន្តិភាពពិភពលោកលើកទី៤( Mahathir Global Peace School) ដែលគាំទ្រដោយមូលនីធិPerdana Global Peace (PGPF)លើកទី៤ នៅទីក្រុងរដ្ឋបាលម៉ាឡេស៊ី Putra Jaya អតីតប្រមុខរដ្ឋាភិបាលម៉ាឡេស៊ីលោក ម៉ាហាធា មហាម៉េតបានរិះគន់បណ្តាប្រទេសមហាអំណាចជាពិសេសលោកខាងលិចដែលព្យាយាមបង្កើតសង្គ្រាមនៅពាសពេញពិភពលោក។
កម្មវិធិសិក្សាស្តីពីសន្តិភាពពិភពលោកជាកម្មវិធីមួយដែលបង្កើតឡើងដើម្បីបំពាក់បំប៉នសមត្ថភាពដល់និស្សិតមកពីសង្គមដែលមានវប្បធម៌ ប្រពៃណី និងសាសនាផ្សេងៗគ្នា ឲ្យពួកគេអាចស្វែងយល់មធ្យោបាយលើកកម្ពស់សន្តិភាព សន្តិសុខ វិបុលភាព និងយុត្តិធម៌នៅលើពិភពលោកផង។
ត្រលប់មកវិញ ពាក់ព័ន្ធបញ្ហាសង្គ្រាមដែលបន្តកើតឡើងឥតឈប់ លោក ម៉ាហាធា បានលើកឧទាហរណ៍ថា សង្គ្រាមដែលមហាអំណាចបង្កើតឡើងនោះជាមូលហេតុចម្បងដែលបង្កឲ្យមានវិបត្តិជនភៀសខ្លួននិងជនអន្តោប្រវេសន៍ច្រើនសន្ធឹកឆ្លងសមុទ្រប្តូរជីវិតទៅកាន់តំបន់អឺរ៉ុបនាពេលបច្ចុប្បន្ន។
ក្រៅពីរិះគន់លោកខាងលិចរឿងបង្កសង្គ្រាម លោក ក៏បានឆ្លៀតទិតៀនបណ្តាប្រទេសឥស្លាមមួយចំនួនជាពិសេសនៅតំបន់មជ្ឈិមបូព៌ាផងដែរដែលចូលចិត្តធ្វើសង្គ្រាមនិងឲ្យសង្គ្រាមដឹកមុខ។ លោកថា៖« ឥស្លាមមានន័យថាសន្តិភាព ប៉ុន្តែយើងមិនមានសន្តិភាពឡើយ។ នេះព្រោះថាយើងមិនត្រងត្រាប់តាមដំបូន្មាននៃសាសនា។ វាជារឿងអាម៉ាសបំផុតនៅពេលដែលប្រទេសឥស្លាមមួយចំនួនមិនអាចគ្រប់គ្រប់ខ្លួនឯងដោយសន្តិភាព។ ហើយវាជាការពិតដែលប្រជាជនឥស្លាមនាំគ្នាធ្វើសង្គ្រាមប្រយុទ្ធគ្នាច្រើនជាងអ្នកកាន់សាសនាផ្សេងទៀតលើលោក»
ក្រៅពីនេះ អតីតមេដឹកនាំម៉ាឡេស៊ីដែលទទួលបានការគោរពពីបណ្តាប្រជាជនម៉ាឡេស៊ីនិងប្រជាជនឥស្លាមភាគច្រើនទូទាំងពិភពលោកខាងលើ ក៏បានអះអាងផងដែរថា ពិភពលោកបច្ចុប្បន្នចូលចិត្តប្រើប្រាស់សង្គ្រាមដើម្បីស្វែងរកសន្តិភាព។ លោក បន្ថែមថា វាជាការពិតដែលសង្គ្រាមអាចបង្កើតសន្តិភាពនាសម័យបុរាណនៅពេលដែលក្រុមជនជាតិនីមួយៗច្បាំងគ្នាដើម្បីសម្លាប់មេដឹកនាំក្រុម។ បើសិនសម្លាប់មេដឹកនាំក្រុមបានហើយនោះពួកគេនឹងអាចបញ្ចប់សង្គ្រាមនិងជម្លោះបានជោគជ័យ។
ប៉ុន្តែវាជារឿងផ្ទុយស្រឡះនាពេលបច្ចុប្បន្នព្រោះ សង្គ្រាមមិនអាចប្រើប្រាស់ដើម្បីបង្កើតសន្តិភាពបានឡើយ ហើយសង្គ្រាមបង្កឲ្យមានការប្រើប្រាស់ហិង្សា និងបង្កវិនាសកម្មសម្រាប់មនុស្សជាតិលើលោកនេះ។
លោក មហាធា បានសង្កត់ធ្ងន់ ភាគីជម្លោះនាពេលបច្ចុប្បន្នមានជម្រើសច្រើនក្នុងការដោះស្រាយបញ្ហាដោយបញ្ចៀសសង្គ្រាម ដោយពួកគេអាចប្រើប្រាស់ការដោះស្រាយបញ្ហាដោយសន្តិវិធី តាមសន្ធានកម្ម ចរចា មជ្ឈត្តការ និងអាចបញ្ចូនរឿងទៅតុលាការដើម្បីដោះស្រាយតែម្តង៕
Tag:
ម៉ាឡេស៊ី
ជនភៀសខ្លួន
© រក្សាសិទ្ធិដោយ thmeythmey.com