ជាតិ
នយោបាយជាតិ
លោក សម រង្ស៊ីថា ក្រោយបោះឆ្នោតរៀបចំដោយអ៊ុនតាក់ គ្មានការបោះឆ្នោតណាត្រឹមត្រូវទេ ![](https://image.thmeythmey.com/pictures/2015/10/02/2102015162034sam_rainsy_thmeythmey_prime_minister_.jpg)
×![]()
ប្រធានគណបក្សសង្គ្រោះជាតិ លោក សម រង្ស៊ី នៅតែបន្តនិយាយថា ការបោះឆ្នោតនៅក្នុងប្រទេសកម្ពុជាជាង ២០ ឆ្នាំ កន្លងមកនេះ គ្មានការបោះឆ្នោតណា ដែលត្រឹមត្រូវក្រៅពីការបោះឆ្នោតដែលរៀបចំឡើងដោយអង្គការសហប្រជាជាតិកាលពីឆ្នាំ ១៩៩៣ នោះឡើយ។ អ្នកនាំពាក្យគណបក្សប្រជាជនកម្ពុជា បានចាត់ទុកការលើកឡើងរបស់លោក សម រង្ស៊ី ថា គ្មានការពិតនោះឡើយ។
បួនអាណត្តិក្រោយពីការបោះឆ្នោតឆ្នាំ ១៩៩៣ សម្រាប់លោកប្រធានគណបក្សសង្គ្រោះជាតិ សុទ្ធសឹងតែជាការបោះឆ្នោតដែលគ្មានភាពត្រឹមត្រូវនោះឡើយ។ លោក សម រង្ស៊ី បានប្រកាសជាថ្មីទៀតថា ការបោះឆ្នោតដែលត្រឹមត្រូវ មានតែការបោះឆ្នោតរៀបចំដោយអាជ្ញាធរបណ្តោះអាសន្នរបស់អង្គការសហប្រជាជាតិប្រចាំនៅកម្ពុជា ហៅកាត់ថា អ៊ុនតាក់(UNTAC) ដែលពេលនោះគណបក្សហ្វ៊ុនស៊ិនប៉ិច ទទួលបានជ័យជំនះ។ « ២៥ ឆ្នាំក្រោយ ការបោះឆ្នោតត្រឹមត្រូវតែម្តងគត់ កាលឆ្នាំ ១៩៩៣ ដែលរៀបចំដោយអង្គការសហប្រជាជាតិ ។ ២៥ ឆ្នាំក្រោយគឺនៅក្នុងការបោះឆ្នោតឆ្នាំ ២០១៨ ខាងមុខនេះ គឺនឹងមានការបោះឆ្នោតត្រឹមត្រូវដែលយើងអាចទទួលយកបាន»។ នេះជាការបញ្ជាក់របស់លោក សម រង្ស៊ី នៅក្នុងសិក្ខាសាលាស្តីពី ដំណើរឆ្ពោះទៅរកការបោះឆ្នោត ដើម្បីនាំមកនូវការផ្លាស់ប្តូរ ដែលរៀបចំដោយគណបក្សសង្គ្រោះជាតិនៅថ្ងៃសុក្រនេះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន រិះគន់លោកសម រង្ស៊ី ថា និយាយគ្មានការពិត។ លោកថា ប្រសិនការបោះឆ្នោត ៤ អាណត្តិមកនេះមិនត្រឹមត្រូវ ហេតុអ្វីលោក សម រង្ស៊ី ទទួលស្គាល់លទ្ធផលបោះឆ្នោតកន្លងមក? «ការលើកឡើងរបស់លោក សម រង្ស៊ី ខ្ញុំមិនយល់ដែរ គាត់ជាមនុស្សចេះដឹងដែរឬក៏មនុស្សល្ងង់? ការបោះឆ្នោតកន្លងមកទទួលស្គាល់ដោយសហគមន៍ជាតិនិងអន្តរជាតិ»។ លោក សុខ ឥសាន្ត និយាយយ៉ាងនេះហើយ ក៏បន្តលើកឡើងថា ការបោះឆ្នោតឆ្នាំ ២០១៨ ខាងមុខ បើសិនគណបក្សសង្គ្រោះជាតិចាញ់ លោក សម រង្ស៊ី បដិសេធមិនចូលសភានឹងគ្មានប្រសិទ្ធភាព និងគ្មានអ្នកគាំទ្រ៕
Tag:
សម រង្ស៊ី
សុខ ឥសាន
© រក្សាសិទ្ធិដោយ thmeythmey.com