អន្តរជាតិ
នយោបាយអន្តរជាតិ
អង្គការលើកលែងទោសអន្តរជាតិ៖ដំណើរជនភៀសខ្លួននៅអាស៊ីអាគ្នេយ៍ជាដំណើរមរណៈ
×
ការជួញដូរមនុស្សគឺជាបញ្ហាសកលមួយដែលពិភពលោកកំពុងមានការព្រួយបារម្ភដ្បិតវាជាសកម្មភាពមួយធ្ងន់ធ្ងរនៃការគំរាមកំហែងដល់មួយដល់មនុស្សជាតិ។ ក្នុងនោះ តំបន់អាស៊ីអាគ្នេយ៍ក៏ជាប្រភពមួយដែលមានការឆ្លងកាត់នូវជនរងគ្រោះដែលត្រូវបានគេជួញដូរដែលអង្គការលើកលែងទោសអន្តរជាតិបានព្រមានដ្បិតរដ្ឋាភិបាលក្នុងតំបន់មិនសូវមានចំណាត់ការពេញលេញដើម្បីទប់ស្កាត់លើបញ្ហានេះ។
កាលពីម្សិលមិញនេះ អង្គការលើកលែងទោសអន្តរជាតិ បានបង្ហាញរបាយការណ៍មួយ ស្តីពីបញ្ហាជួញដូរមនុស្សនៅអាស៊ីអាគ្នេយ៍ កំពុងស្ថិតនៅក្នុងស្ថានភាពដ៏អាក្រក់បំផុត។ ស្ថាប័ននេះ ក៏បានរិះគន់ និងព្រមានទៅកាន់មេដឹកនាំអាស៊ីអាគ្នេយ៍ ដែលមានចំណាត់ការតិចតួចបំផុតក្នុងប្រតិបត្តិការទប់ស្កាត់ និងជួយសង្គ្រោះជនរងគ្រោះ។
របាយការណ៍ដែលចំណងជើងថា « ដំណើរមរណៈរបស់ជនភៀសខ្លួននិងវិបត្តិនៃជួញដូរមនុស្សនៅអាស៊ីអាគ្នេយ៍» ដែលផ្សព្វផ្សាយដោយអង្គការលើកលែងទោសអន្តរជាតិ បង្ហាញពីបញ្ហាជាច្រើន ដែលជនរងគ្រោះបានទទួលរង ក្រោយពីពួកគេបានចាញ់បោកមេខ្យល់ ក្នុងដំណើរតាមទូក។ បញ្ហាទាំងនោះ មានដូចជាជនភៀសខ្លួនត្រូវបោះបង់ចោលនៅកណ្តាលសមុទ្រ ដោយគ្មានអាហារបរិភោគ ការធ្វើទណ្ឌកម្ម ការជំរឹត និងគំរាមសម្លាប់ ប្រសិនបើពួកគេមិនផ្តល់ ប្រាក់ដែល មេខ្យល់បានកំណត់។
របាយការណ៍នេះត្រូវបានសរសេរឡើង ដោយផ្អែកតាមទិន្នន័យដែលបានមកពីការសម្ភាសន៍ជាមួយជនរងគ្រោះជនជាតិរ៉ូហឹងយ៉ា ជាងមួយរយនាក់ ដែលភាគច្រើនពួកគេជាស្ត្រី និងកុមារដែលរួចផុតជីវិតពីការជួញដូររបស់មេខ្យល់ ដែលសន្យាថានឹងនាំពួកគេទៅកាន់ម៉ាឡេស៊ី ឬឥណ្ឌូនេស៊ី។
ជាការកត់សម្គាល់ ពេលនេះគឺជារដូវកាលថ្មីទៀតហើយ ដែលក្រុមមេខ្យល់តាមទូកចាប់ផ្តើមធ្វើសកម្មភាពជួញដូរ។ ស្របពេលជាមួយគ្នានេះ អង្គការលើកលែងទោសអន្តរជាតិ បានទទូចឲ្យមេដឹកនាំអាស៊ីអាគ្នេយ៍ ចាត់វិធានការជាបន្ទាន់ ដើម្បីទប់ស្កាត់ការផ្ទុះនូវវិបត្តិនេះជាថ្មី។ ដោយមិនបំភ្លេចពីវិបត្តិ ជនភៀសខ្លួនកាលពីខែឧសភា កន្លងស្ថាប័នមួយនេះ ក៏បានផ្តល់អនុសាសន៍មួយចំនួនទៅកាន់មេដឹកនាំអាស៊ីអាគ្នេយ៍ ត្រូវតែអនុវត្តន៍នូវប្រតិបត្តិជួយសង្គ្រោះ និងរុករកជនភៀសខ្លួនដែលបានជាប់គាំងនៅជ្រោយសមុទ្រ។
សូមរម្លឹកថាកាលពីខែឧសភាកន្លងទៅនេះ មានជនភៀសខ្លួនជនជាតិរ៉ូហីងយ៉ារាប់ពាន់នាក់ ដែលភាគច្រើនមកពីមីយ៉ាន់ម៉ា និងបង់ក្លាដែសបានចាញ់បោកមេខ្យល់។ ពួកគេត្រូវបានបោះបង់ និងជាប់ គាំងនៅជ្រោយសមុទ្រម៉ាឡេស៊ី ឥណ្ឌូនេស៊ី និងថៃ។ ជនភៀសខ្លួនមួយចំនួន ត្រូវបាន រដ្ឋាភិបាលម៉ាឡេស៊ី ឥណ្ឌូនេស៊ីនិងថៃ ផ្តល់ទីជម្រកបណ្តោះអាសន្ន ខណៈដែលមួយចំនួនទៀត ត្រូវបាន រដ្ឋាភិបាលមីយ៉ាន់ម៉ាទទួលយកទៅមីយ៉ាន់ម៉ាវិញ ក៏ប៉ុន្តែមិនបានផ្តល់នូវសិទ្ធិជាប្រជាជនដល់ជនភៀសខ្លួនទាំងនោះទេ៕
© រក្សាសិទ្ធិដោយ thmeythmey.com