ជាតិ
សេដ្ឋកិច្ច
អ្នកជំនាញសេដ្ឋកិច្ចបារម្ភពីការលូតលាស់សេដ្ឋកិច្ចកម្ពុជានៅឆ្នាំ២០១៦ ![](https://image.thmeythmey.com/pictures/2016/01/06/credt_____________________________________________________________________________________________________________________.jpg)
×![]()
ភ្នំពេញ៖ បើទោះបីកំណើនសេដ្ឋកិច្ចកម្ពុជាសម្រាប់ឆ្នាំ២០១៦ អាចនឹងមានសន្ទុះជាងឆ្នាំមុនខ្លះ ប៉ុន្តែកម្ពុជានឹងរងឥទ្ធិពលពីស្ថានការណ៍ខាងក្រៅនិងក្នុងស្រុកដែលជា ឧបសគ្គដល់ការអភិវឌ្ឍសេដ្ឋកិច្ចជាតិ។ អ្នកជំនាញសេដ្ឋកិច្ច លោក កង ចាន់តារារ័ត្ន បានលើកយកបញ្ហានយោបាយក្នុងស្រុក និង ការប្រកួតប្រជែងក្នុងតំបន់ ថា ជាកង្វល់សម្រាប់សេដ្ឋកិច្ចកម្ពុជា។ ដោយឡែក លោក ចាន់ សុផល បារម្ភ ចំពោះការវិនិយោគច្រើនពេកលើទីផ្សារអចលនាទ្រព្យ ការធ្លាក់ចុះនៃតម្លៃកសិផល និង វិបត្តិផ្សេងៗពីបរទេស។
អ្នកជំនាញសេដ្ឋកិច្ច បានអះអាងថា សេដ្ឋកិច្ចកម្ពុជានឹងជួបបញ្ហាខ្លះសំរាប់ឆ្នាំ២០១៦នេះ។ តាមការផ្តល់បទសម្ភាសន៍ដល់អ្នកសារព័ត៌មានអេឡិចត្រូនិចថ្មីៗ លោក កង ចាន់តារារ័ត្ន បានពន្យល់យ៉ាងដូច្នេះថា នៅឆ្នាំ២០១៦នេះ ពាណិជ្ជកម្មរបស់កម្ពុជាមានការធាក់ថយខ្លះ ដោយសារកម្ពុជាចូលសមាហរណកម្មសេដ្ឋកិច្ចអាស៊ាន។
ដោយសារបញ្ហានេះ វានឹងនាំឲ្យមានលំហូរផលិតផលពីខាងក្រៅប្រទេស ដែលបង្ករជាផលលំបាកដល់សហគ្រិនក្នុងស្រុក។ ក្រៅពីនេះ លោក បានចាប់អារម្មណ៍ខ្លាំងចំពោះបញ្ហានយោបាយក្នុងស្រុក ដែល ជាចំណុចគន្លឹះដល់ការអភិវឌ្ឍសេដ្ឋកិច្ចជាតិដោយលោកមានប្រសាសន៍ថា៖« រឿងនយោបាយកុំឲ្យទៅជាបញ្ហាស្នូលរបស់សង្គមពេកដែលធ្វើឲ្យអ្នកវិនិយោគមានការបារម្ភណ៍ខ្លាំង»។
ដោយឡែក លោក ចាន់ សុផល មើលឃើញថា សន្ទុះសេដ្ឋកិច្ចកម្ពុជាក្នុងឆ្នាំ២០១៦ប្រហាក់ប្រហាលនឹងឆ្នាំមុនដែរ តែហានិភ័យមានច្រើនជាង។ លោកបានទាញការចាប់អារម្មណ៍លើការវិនិយោគច្រើនជ្រុលលើវិស័យអចលនទ្រព្យ ថា ជាហានិភ័យដល់សេដ្ឋកិច្ចកម្ពុជា។ លោកពន្យល់ថា កន្លងមកមាន ការបញ្ចេញឥណទានឯកជនច្រើនពេកលើវិស័យអចលនទ្រព្យ ដែលកំណើនឥណទានខ្ពស់ បែបនេះ ធ្វើឲ្យរាំងស្ទះដល់លំហូរថវិកា ហើយបង្ករជាវិបត្តិឥណទាន។ បន្ថែមពីនេះ លោក ចាន់ សុផល នៅមានការបារម្ភលើបញ្ហាក្នុងស្រុកមួយចំនួនទៀត គឺការធ្លាក់ទាប នៃតម្លៃកសិផល ពិសេសតម្លៃកៅស៊ូ។
បញ្ហាអាកាសធាតុក៏ជាកង្វល់មួយដែររបស់សេដ្ឋវិទូ។ ដោយសារនៅឆ្នាំ២០១៦នេះ ភ្លៀងធ្លាក់មិនគ្រប់គ្រាន់អាចនាំឲ្យខ្វះទឹកសម្រាប់ប្រើប្រាស់ក្នុងវិស័យកសិកម្ម។
លោក សុផល ក៏បានផ្សារភ្ជាប់វិបត្តិនានានៅក្រៅប្រទេសទៅនឹងសេដ្ឋកិច្ចកម្ពុជាផងដែរ។ អ្នកជំនាញរូបនេះលើកឡើងពីការអាចថយចុះនៃកំណើនសេដ្ឋកិច្ចរបស់សហរដ្ឋអាមេរិក អឺរ៉ុបជាដើម បន្ថែមនឹងវិបត្តិភេរវកម្ម និងការឡើងថ្លៃជ្រុលនៃតម្លៃអចលនទ្រព្យនៅអឺរ៉ុប អាចជះឥទ្ធិពលសម្រាប់ការលូតលាស់សេដ្ឋកិច្ចកម្ពុជា៕
© រក្សាសិទ្ធិដោយ thmeythmey.com