ជាតិ
សង្គមជាតិ
នគរបាលចរាចរផាកពិន័យបានជាង ៤០០ លានរៀល រយៈពេល ៦ថ្ងៃ ![](https://image.thmeythmey.com/pictures/2016/01/06/1919182_567032873452419_2713285175315607013_n.jpg)
×![]()
ភ្នំពេញ៖ រយៈពេល ៦ថ្ងៃ នៃការអនុវត្តច្បាប់ចរាចរណ៍ផ្លូវគោកថ្មី កម្លាំងនគរបាលចរាចរផាកពិន័យបានទឹកប្រាក់ជាង ៤០០លានរៀល ពីការពិន័យយានយន្តដែលល្មើសច្បាប់នៅទូទាំងប្រទេស។
ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ លោក រុន រ័ត្នវាសនា បានឲ្យដឹងថា ក្នុងថ្ងៃទី៦ មករានេះ នគរបាលចរាចរបានត្រួតពិនិត្យយានយន្តចំនួន ៣៦៤៥៧គ្រឿង ដោយបានផាកពិន័យយានយន្តចំនួន ៧២០៨គ្រឿង ក្នុងនោះម៉ូតូ ៤២៣២គ្រឿង និងបានឃាត់ម៉ូតូ និងរថយន្តចំនួន ១៥៣គ្រឿង។
បើតាមលោក រ៉ុន រ័ត្នវាសនា ក្នុងរយៈពេល៦ថ្ងៃនគរបាលបានត្រួតពិនិត្យយានយន្តសរុបជាង ១៥ម៉ឺន ក្នុងនោះបានអប់រំអ្នកបើកបរជាង២ម៉ឺន និងផាកពិន័យលើយានយន្ដល្មើស ៤១៥៦១គ្រឿង ក្នុងនោះម៉ូតូ ២២១២៤គ្រឿង។ ឃាត់បានយានយន្តទុកចំនួន៧៤៨គ្រឿង ក្នុងនោះម៉ូតូ ៧៣៦ គ្រឿង និងរថយន្ត ១២គ្រឿង។
ប្រធាននាយកដ្ឋាននគរបាលចរាចររូបនេះ បន្ថែមថា បើប្រជាពលរដ្ឋអនុវត្តច្បាប់បានល្អត្រឹមត្រូវនោះ មន្ត្រីចរាចរនឹងមិនឃាត់ ឬផាកពិន័យអ្វីនោះទេ លើកលែងតែប្រជាពលរដ្ឋទាំងនោះនៅតែល្មើសមិនអនុវត្តន៍ប៉ុណ្ណោះ៕
© រក្សាសិទ្ធិដោយ thmeythmey.com