ជាតិ
សង្គមជាតិ
សាលារាជធានីភ្នំពេញ ផ្តើមខួងធ្វើតេស្តស្រទាប់ដីលើគម្រោងសង់ផ្លូវក្រោមដីស្តុបបេកាសេ ![លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ](https://image.thmeythmey.com/pictures/2016/01/08/credit-.jpg)
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ
×![]()
នៅថ្ងៃទី៨ខែមករានេះ ការដ្ឋានគម្រោងស្ថាបនាផ្លូវក្រោមដីស្តុបបេកាសេ ប្រសព្វរវាងមហាវិថីសហព័ន្ធរុស្ស៊ីនិងមហាវិថីព្រះមុនីវង្ស បានចាប់ផ្តើមដំណើរការខួងដីធ្វើ តេស្តស្រទាប់ដី ដើម្បីត្រៀមស្ថាបនានាពេលខាងមុខ។ នេះបើយោងតាមទំព័រហ្វេសប៊ុក របស់សាលារាជធានីភ្នំពេញ។
តែយ៉ាងណាក៏ដោយ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ មិនអាចបញ្ជាក់ពីកាលបរិច្ឆេទនៃការបញ្ចប់ដំណើរការ ការធ្វើតេស្តនេះនោះទេ។ លោកថ្លែងប្រាប់សារព័ត៌មានថ្មីៗយ៉ាងនេះថា៖«នេះជា ការងារបច្ចេកទេស ដូច្នេះខ្ញុំមិនអាចបញ្ជាក់ថាពេលណាធ្វើតេស្តហើយ ឬចាប់ផ្តើមសាងសង់នៅពេលណានោះទេ។ ការខួងតេស្តដីនេះ ចាត់ទុកថាជាការជូនដំណឹងទៅដល់សាធារណជន»។
សូមបញ្ជាក់ថា នៅក្នុងប្រអប់ Comment របស់ហ្វេសប៊ុកសាលារាជធានីភ្នំពេញដែលបានផ្សាយពីគម្រោងសាងសង់ផ្លូវក្រោមដីនេះ បានសរសេរយ៉ាងនេះថា៖«ការសិក្សាទីតាំងនេះ អ្នកជំនាញបានសិក្សាប្លង់រួចហើយ ជា៤ជម្រើសផ្សេងៗគ្នា ហើយជម្រើសនេះមានផលប៉ះពាល់តិច ចំណាយតិច និងអាចដោះស្រាយបញ្ហាកកស្ទះចរាចរណ៍បានល្អជាង»។
គម្រោងនេះ ប៉ះពាល់ដើមគីនីន ចំនួន១២ដើម និងបំពង់ទឹកស្អាតទំហំ១.៥ម៉ែត្រក្រោមដីនៃមហាវិថីមុនីវង្សប្រវែង៣០ម៉ែត្រ។ គម្រោងនេះក៏នឹងងាយស្រួលដល់ផែនការអភិវឌ្ឍន៍ រថភ្លើងTramway sky train រួមទាំងការភ្ជាប់ប្រព័ន្ធចរាចរ Expressway ពីមហាវិថីព្រះមុនីវង្ស ស្របផ្លូវរថភ្លើងទៅផ្លូវកប់ស្រូវផងដែរ។ នេះជាការសរសេរនៅក្នុងប្រអប់ Comment ដដែល។
ផ្អែកតាមទំព័រហ្វេសប៊ុកដដែល ផ្លូវក្រោមដីរត់ ពីមហាវិថីសហព័ន្ឋរុស្ស៊ី មុជក្រោមមហាវិថីព្រះមុនីវង្ស ជាផ្លូវក្រោមដីទ្វេទិស មានប្រវែង៣៤០ម៉ែត្រ ទទឹងប្រវែង ១៤.៧ម៉ែត្រ និងកម្ពស់ក្រោមស្ពាន ៥ម៉ែត្រ៕
Tag:
ផ្លូវក្រោមដី
ឡុង ឌីម៉ង់
© រក្សាសិទ្ធិដោយ thmeythmey.com