ជាតិ
សង្គមជាតិ
ក្រសួងមហាផ្ទៃបង្កើត«សាលាអភិបាលកិច្ច»បង្រៀនចាប់ពីកម្រិតវិញ្ញាបនបត្រ ដល់អនុបណ្ឌិត ![ពិធី MOU រវាងក្រសួងមហាផ្ទៃ និងអង្គការតម្លាភាពកម្ពុជា នៅរសៀលនេះ](https://image.thmeythmey.com/pictures/2016/01/15/12576257_898141863637831_215024008_n.jpg)
ពិធី MOU រវាងក្រសួងមហាផ្ទៃ និងអង្គការតម្លាភាពកម្ពុជា នៅរសៀលនេះ
×![]()
ភ្នំពេញ៖ ក្រសួងមហាផ្ទៃ និងអង្គការតម្លាភាពកម្ពុជាបានសហការគ្នាបង្កើតសាលាអភិបាលកិច្ច សម្រាប់ការបណ្តុះបណ្តាលសិស្ស និស្សិត និងមន្ត្រីរាជការក្រសួងមហាផ្ទៃលើជំនាញអភិបាលកិច្ចគ្រប់គ្រងសេវាសាធារណៈពីកម្រិតសិក្សាថ្នាក់វិញ្ញាបនបត្រ បរិញ្ញាបត្រ និងបរិញ្ញាបត្រជាន់ខ្ពស់ (អនុបណ្ឌិត) ដើម្បីធានាឲ្យការដឹកនាំគ្រប់គ្រងសេវាសាធារណៈមានសុច្ចរិតភាព តម្លាភាព និងអភិបាលកិច្ចកាន់តែល្អប្រសើរ។
ពិធីចុះហត្ថលេខាលើអនុស្សារណៈយោគយល់គ្នារវាងក្រសួងមហាផ្ទៃ និងអង្គការតម្លាភាពកម្ពុជា បានប្រព្រឹត្តទៅ នៅរសៀលថ្ងៃទី១៥ ខែមករានេះ ក្នុងអគារមជ្ឈមណ្ឌលសិក្សាស្រាវជ្រាវអភិបាលកិច្ច នៃក្រសួងមហាផ្ទៃ។ រដ្ឋលេខាធិការក្រសួងមហាផ្ទៃ លោក ងី ចន្ទ្រផល បាននិយាយថា សាលាអភិបាលកិច្ច ជាសាលាបង់ថ្លៃសិក្សា ត្រូវបានបង្កើតឡើងក្រោម MOU រវាងក្រសួងមហាផ្ទៃជាមួយនឹងអង្គតម្លាភាពកម្ពុជា (TI) និងដៃគូពាក់ព័ន្ធ ក្នុងគោលដៅបណ្តុះបណ្តាល និងពង្រឹងសមត្ថភាពធនធានមនុស្សជំនាន់ក្រោយ លើការគ្រប់គ្រងស្ថាប័នសាធារណៈឲ្យអភិបាលកិច្ចល្អ។ ហើយថា ក្រសួងនឹងចាប់ផ្តើមបណ្តុះបណ្តាលសិស្ស និស្សិត និងមន្ត្រី ស្របតាមស្តង់ដាកម្មវិធីសិក្សាគ្រឹះស្ថានឧត្តមសិក្សា ចាប់ពីពាក់កណ្តាលឆ្នាំ ២០១៦ នេះ នៅអគារមជ្ឈមណ្ឌលសិក្សាស្រាវជ្រាវអភិបាលកិច្ច នៃក្រសួងមហាផ្ទៃ។
លោកបន្តទៀតថា កម្មវិធីសិក្សារបស់សាលាអភិបាលកិច្ច ដែលស្ថិតក្រោមអំណាចអាណាព្យាបាលក្រសួងមហាផ្ទៃនេះ មានលក្ខខណ្ឌខុសពីគ្រឹះស្ថានសាធារណៈ និងឯកជនដទៃ ដោយសាលានេះ ផ្តោតតែលើការបណ្តុះបណ្តាលទ្រឹស្តី និងការអនុវត្តផ្ទាល់ជំនាញអភិបាលកិច្ចតែប៉ុណ្ណោះ។
លោកថា៖«រាជរដ្ឋាភិបាលមានបំណងលើកកម្ពស់សមត្ថភាពមន្ត្រីកំពុងបម្រើការងារ ក្រោមឱវាទក្រសួង និងជាពិសេសគឺ យើងចង់បណ្តុះបណ្តាលធនធានមនុស្សជំនាន់ក្រោយ ឲ្យមាន សមត្ថភាពខ្ពស់ផ្នែកអភិបាលកិច្ច ដើម្បីគ្រប់គ្រង និងបម្រើសេវាសាធារណៈឲ្យកាន់តែមាន ប្រសិទ្ធភាពជូនប្រជាពលរដ្ឋនៅថ្នាក់មូលដ្ឋាន»។
បើតាមរដ្ឋលេខាធិការក្រសួងមហាផ្ទៃ រាជរដ្ឋាភិបាលកម្ពុជាសម្រេចអនុញ្ញាតឲ្យក្រុមការងារក្រសួងមហាផ្ទៃសិក្សាពីការបង្កើតរចនាសម្ព័ន្ធសាលាអភិបាលកិច្ច ក្នុងនោះ រួមមាន ការរៀបចំរចនាសម្ព័ន្ធថ្នាក់ដឹកនាំ កម្មវិធីសិក្សា គ្រូឧទ្ទេសនាម និងលក្ខខណ្ឌចូលសិក្សាជាដើម ចាប់តាំងពីដើមឆ្នាំ២០១៥ រហូតឈានដល់ ការចុះ MOU ជាអង្គការតម្លាភាព នាពេលនេះ។
ក្នុងឱកាសចុះ MOU ផងដែរ នាយកប្រតិបត្តិអង្គការតម្លាភាពកម្ពុជា លោក ព្រាប កុល បាននិយាយថា ការបង្កើតសាលាអភិបាលកិច្ចក្រសួងមហាផ្ទៃ ជាសញ្ញាវិជ្ជមានមួយ ដែលបង្ហាញ ឲ្យឃើញពីឆន្ទៈលើកម្ពស់កិច្ចការអភិបាលកិច្ចសេវាសាធារណៈរបស់រាជរដ្ឋាភិបាល។
លោកបន្តនិយាយទាំងមោទកភាព ក្នុងនាមជាដៃគូសហការជាមួយក្រសួងយ៉ាងដូច្នេះថា៖«សាលាអភិបាលកិច្ចនេះ នឹងជួយរួមចំណែកដល់រដ្ឋាភិបាល ដើម្បីអភិបាលផែនការយុទ្ធសាស្ត្រ និងធនធានមនុស្ស តាមកម្មវិធីកំណែរទម្រង់ លើកកម្ពស់ប្រសិទ្ធភាព សេវាសាធារណៈ ការគ្រប់គ្រងធនធានហិរញ្ញវត្ថុ ធនធានមនុស្សរបស់ប្រទេសឲ្យកាន់តែមានប្រសិទ្ធភាព។ ហើយអាចចូលរួមចំណែកកាត់ បន្ថយអំពើពុករលួយដែលជាយុទ្ធសាស្ត្ររបស់រាជរដ្ឋាភិបាល»។
សម្រាប់ព័ត៌មានបន្ថែម អំពីលក្ខខណ្ឌនៃការចុះឈ្មោះចូលសិក្សាក្នុងសាលាអភិបាលកិច្ច សិស្ស និស្សិតអាចទំនាក់ទំនងប្រធាននាយកដ្ឋានសុចរិតភាព និងអភិបាលកិច្ចនៃក្រសួងមហាផ្ទៃ លោក ប៊ុត ជិ តាមរយៈទូរសព្ទលេខ ០១១ ៣៥៩ ៨០៧ និងអ៊ីម៉ែល [email protected] រៀងរាល់ម៉ោងធ្វើការរដ្ឋ៕
Tag:
ក្រសួងមហាផ្ទៃ
សាលាអភិបាលកិច្ច
© រក្សាសិទ្ធិដោយ thmeythmey.com