បក្សមានអាសនៈទាំងពីរ ពិភាក្សាគ្នាបាន៩ចំណុចហើយ ក្នុងចំណោមចំណុចទាំង២១ ដែលភាគីសហជីពស្នើឲ្យកែប្រែ ជុំវិញសេចក្តីព្រាងច្បាប់ស្តីពីសហជីព។ ការពិភាក្សានោះ ត្រូវបានមេសហជីព មើលឃើញថា ផ្តល់ផលអវិជ្ជាមានច្រើនជាងវិជ្ជាមាន។
ភាគីសហជីព មិនទាន់ពេញចិត្តចំពោះលទ្ធផលនៃការកែប្រែសេចក្តីព្រាងច្បាប់ស្តីពីសហជីព នៅឡើយទេ ក្រោយពីគណៈកម្មការចំពោះកិច្ច ដែលកើតចេញពីបក្សកាន់អំណាចនិងបក្សប្រឆាំង បានជជែកគ្នាពីរដងកន្លងមក។ មេដឹកនាំសហជីព អះអាងថា បក្សធំៗទាំងពីរ គ្រាន់តែកែប្រែអក្សរនិងអត្ថន័យនៃពាក្យប៉ុណ្ណោះ តែមិនបានកែប្រែខ្លឹមសារ ឲ្យបានសមស្របទៅតាមការទាមទាររបស់ខ្លួនឡើយ។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាលោក អាត់ ធន់ អះអាងថា ក្នុងចំណោម៩ចំណុច មានតែ២ចំណុចទេ ដែលលោក អាចទទួលយកបាន ហើយក្រៅពីនោះលោកថា នៅតែមានលក្ខណៈអវិជ្ជមានដដែល។ អ្វីដែលោក យល់ថាគួរទទួលយកបាននោះគឺ ចំណុចដែលចែងថា សហជីពមូលដ្ឋានចាប់៩ឡើងទៅ ទើបអាចចងក្រងជាសហព័ន្ធសហជីព ត្រូវបានសម្រួលមកត្រឹម៧ និង ចំណុចដែលចែងថា សហព័ន្ធសហជីពចាប់ពី៦ឡើងទៅ ទើបអាចបង្កើតជាសភាពសហព័ន្ធសហជីព ត្រូវបានបន្ថយមកត្រឹម៥ វិញ។
ថ្លែងប្រាប់សារព័ត៌មានថ្មី ប្រធានសម្ព័ន្ធសហជីពប្រជាធិបតេយ្យកម្មកររូបនេះ នៅតែខ្វល់ខ្វាយចំពោះចំណុចផ្សេងទៀត ដែលមិនបានកែប្រែឲ្យបានសមស្របទៅនឹងបរិបទសង្គមកម្ពុជា។ ចំណុចទាំងនោះ មានដូចជា សហជីពត្រូវធ្វើរបាយការណ៍ហិរញ្ញវត្ថុ ជូនក្រសួងការងារប្រចាំខែ ត្រូវបានពន្យារមករយៈ៤៥ថ្ងៃ និងចំណុចដែលច្បាប់ដើមកំណត់ថា សហជីពត្រូវផ្តល់ដំណឹងដល់ក្រសួងការងារ នូវអាសយដ្ឋានគណនេយ្យនិងធនាគារ បន្ទាប់ពីមានការផ្លាស់ប្តូរ ក្នុងរយៈពេលយ៉ាងយូរ១៥ថ្ងៃ ត្រូវប្តូរមករយៈពេល ៣០ថ្ងៃ ហើយចំណុច ដែលចែងថា រាល់សេចក្តីសម្រេចរបស់សហជីព ដូចជាការធ្វើបាតុកម្មឬកូដកម្ម ត្រូវសម្រេចដោយសំឡេង ៥១បូក១ នៃសមាជិកចូលរួម ទើបអាចធ្វើទៅបាន ជាដើម។
លោកបានបញ្ជាក់ដូច្នេះថា៖«លទ្ធផលអ៊ីចឹង គ្មានអ្វីល្អទេ។ គ្រាន់តែពន្យារពេល តែខ្លឹមសារនៅដដែលហ្នឹង ដូចជាមិនឃើញកែប្រែអ្វីជាដុំកំភួនទេ។ ចំពោះខ្ញុំ ខ្ញុំមិនទាន់សប្បាយចិត្តចំពោះលទ្ធផលនេះទេ»។
ចំណែកឯ ប្រធានសហព័ន្ធសហជីពចលនាកម្មករ លោក ប៉ាវ ស៊ីណា សង្កេតឃើញថាដំណើរការនៃការតាក់តែងច្បាប់នេះមានលក្ខណៈល្អប្រសើរ តែលទ្ធផលមិនទាន់ត្រូវចំចំណុចដែលសហជីពចង់បាន។ លោកបន្ថែមថា គណៈកម្មការចំពោះកិច្ច មិនបានដោះស្រាយទៅតាមយោបល់ដែលសហជីពស្នើនោះទេ ដោយលោកអះអាងថា អ្វីដែលជាលទ្ធផល គ្រាន់តែសម្របសម្រួលគ្នាទៅលើពាក្យពេចន៍ប៉ុណ្ណោះ។
យ៉ាងណាក៏ដោយ ប្រធានសហព័ន្ធសហជីពចលនាកម្មកររូបនេះ នៅតែមើលឃើញវប្បធម៌ល្អ ដែលបក្សទាំងពីរបានជជែកដេញដោលគ្នា ជុំវិញការទាមទាររបស់សហជីពក៏ដូចជាកម្មករ បើទោះបីជាមិនទាន់ផ្តល់ផលសមស្របតាមបំណងក៏ពិតមែន។ ជាងនេះទៅទៀត លោក បានស្នើទៅបក្សទាំងពីរ ឲ្យបើកសិក្ខាសាលាថ្នាក់ជាតិមួយ ដើម្បីផ្តល់ឱកាសដល់សហជីព បានជជែកនិងផ្តល់យោបល់បន្ថែមលើសេចក្តីព្រាងច្បាប់នេះ មុននឹងដាក់ជូនរដ្ឋសភាអនុម័ត។
លោក ប៉ាវ ស៊ីណា បានបញ្ជាក់បែបនេះថា៖«បើលទ្ធផល ដូចជាមិនទាន់ឃើញនោះទេ។ ខ្ញុំមើលទៅ ការពិភាក្សាល្អប្រសើរជាងមុន ដោយបានពិគ្រោះគ្នាច្រើនសា តែមិនទាន់ទទួលបានផលអ្វីឲ្យធំដុំ ឡើយ។ យ៉ាងណា ខ្ញុំនៅតែសប្បាយចិត្ត ដែលឃើញបក្សទាំងពីរបានអង្គុយជជែកគ្នា ដើម្បីដោះស្រាយបញ្ហាប្រជាពលរដ្ឋ»។
សូមបញ្ជាក់ថា គណៈកម្មការចំពោះកិច្ច បានជួបពិភាក្សាគ្នាពីរដងរួចមកហើយ ដោយសម្រេចបាន៩ចំណុច ក្នុងចំណោម២១ ចំណុច ដែលភាគីសហជីពស្នើឲ្យកែប្រែ។ ជំនួបលើកទី១ ធ្វើឡើងនៅថ្ងៃទី៤ ខែមករា ឆ្នាំ២០១៦ ដោយសម្រេចបាន២ចំណុច។ ចំណែកឯជំនួបលើកទី២ ប្រព្រឹត្តទៅនៅថ្ងៃទី១៤ ខែមករា ឆ្នាំ២០១៦ ដោយសម្រេចបាន៧ចំណុច។ នៅថ្ងៃទី១៩ ខែមករា ឆ្នាំ២០១៦ បក្សទាំងពីរនេះនឹងបន្តជួបគ្នាសាជាថ្មី ដើម្បីពិភាក្សាបន្ថែមទៀត លើចំណុចសេសសល់ទាំង១២ ៕