អន្តរជាតិ
រុស្ស៊ី៖ប្រព័ន្ធមីស៊ីលអាមេរិកនៅឧបទ្វីបនឹងប៉ះពាល់ទំនាក់ទំនងរុស្ស៊ីកូរ៉េខាងត្បូង
× ក្រោយមានគម្រោងប្រកាសពង្រាយប្រព័ន្ធមីស៊ីលអាមេរិក THAAD នៅក្នុងទឹកដីកូរ៉េខាងត្បូង រុស្ស៊ីបានជំទាស់ភ្លាម ដោយលើកឡើងថា ការពង្រាយប្រព័ន្ធនេះមិនជួយដោះស្រាយបញ្ហាអ្វីឡើយ។ ការពង្រាយប្រព័ន្ធមីស៊ីលនេះត្រូវដាក់ចេញដើម្បីទប់ទល់ការគំរាមកំហែងពីសំណាក់ក្រុងព្យុងយ៉ាង។
ឯកអគ្គរដ្ឋទូតរុស្ស៊ីប្រចាំកូរ៉េខាងត្បូងលោក Alexander Timonin បានជំទាស់គម្រោងពង្រាយប្រព័ន្ធមីស៊ីលអាមេរិកនៅលើទឹកដីកូរ៉េខាងត្បូងនៅថ្ងៃ អង្គារទី ២កុម្ភៈកន្លងទៅនេះ។ បើយោងតាមទីភ្នាក់ងារព័ត៌មានចិន Xinhua មន្ត្រីទូតរុស្ស៊ីនេះចាត់ទុកថា ការពង្រាយប្រព័ន្ធការពារដែនអាកាសនេះ មិនជួយដោះស្រាយបញ្ហានិងរក្សាសន្តិសុខក្នុងតំបន់ឡើយ តែវានឹងធ្វើឲ្យបញ្ហាកាន់តែធ្ងន់ធ្ងរ។ ហើយលោកបានឆ្លៀតព្រមានផងដែរថា វត្តមានប្រព័ន្ធការពារដែនអាកាសអាមេរិកនឹងប៉ះពាល់ខ្លាំងដល់ទំនាក់ទ្វេភាគីរវាងកូរ៉េខាងត្បូងនិងរុស្ស៊ីផ្ទាល់។
ប៉ុន្តែលោកក៏បាន ស្នើឲ្យភាគីពាក់ព័ន្ធបញ្ចៀសឲ្យបាននូវការប្រើប្រាស់សកម្មភាពបង្កបញ្ហា ហើយអត់ធ្មត់មិន ប្រើប្រាស់សកម្មភាពយោធាដើម្បីកុំឲ្យបញ្ហាកាន់តែធ្ងន់ធ្ងរដែរ។
ផែនការពង្រាយប្រព័ន្ធការពារដែនអាកាសរបស់អាមេរិកនៅឧបទ្វីបកូរ៉េ កើតឡើងក្រោយពេលដែលក្រុងព្យុងយ៉ាងបានបាញ់សាកល្បងអាវុធអ៊ីដ្រូសែន នៅដើមខែមករាកន្លងមក។ កូរ៉េខាងត្បូងនិងអាមេរិកធ្លាប់ជជែកគ្នាច្រើនដងដែរពាក់ព័ន្ធនឹងការដាក់ដំឡើងប្រព័ន្ធមីស៊ីលអាមេរិកដែលវាអាចជួយការពារកូរ៉េខាងត្បូងពីការគំរាមកំហែងផ្នែកសន្តិសុខដែលបង្កឡើងដោយកូរ៉េខាងជើង។
កាលពីសប្តាហ៍មុនក្រសួងការពារជាតិកូរ៉េខាងត្បូងបានលើកឡើងការប្រើប្រាស់ប្រព័ន្ធការពារដែនអាកាសកូរ៉េខាងត្បូង រួមជាមួយប្រព័ន្ធការពារដែនអាកាសអាមេរិកនឹងជួយការពារសុវត្ថិភាពកូរ៉េខាងត្បូងប្រឆាំងកូរ៉េខាងជើង។ នេះ បញ្ជាក់ថា កូរ៉េខាងជើងអាចនឹងទទួលយកសំណើរដំឡើងប្រព័ន្ធនេះនៅពេលណាមួយខាងមុខផង។
កន្លងមកចិនបានប្រតិកម្មខ្លាំងៗតបនឹងគម្រោងនេះ ព្រោះចិនបារម្ភពីសុវត្ថិភាពនិងសន្តិសុខជាតិរបស់ខ្លួនដែរ។ ហើយរដ្ឋបាលលោកស្រី ប៉ាក ហ្គឺនហេ ក៏ស្ទាក់ស្ទើរមិនហ៊ានអនុញ្ញាតឲ្យអាមេរិកបញ្ជូនអាវុធប្រភេទនេះមកកាន់ប្រទេសកូរ៉េដែរ។
ដោយឡែក មន្ត្រីការទូតរុស្ស៊ីនេះ ក៏បានបង្ហាញពីគោលជំហររបស់រុស្ស៊ីដែលចង់ឲ្យភាគីពាក់ព័ន្ធទាំងអស់ត្រលប់មកជ្រើសរើសយកវេទិកាជជែកភាគី ៦ ដែលជាប់គាំងអស់ពេលជាច្រើនឆ្នាំមកហើយនោះ។ លោក Alexander Timonin ជឿជាក់ថា គ្មានអ្វីអាចដោះស្រាយបញ្ហានុយក្លេអ៊ែរកូរ៉េខាជើងបានក្រៅពីការសន្ទនាឡើយ ហើយរាល់ទណ្ឌកម្មដាក់ចេញជាឯកតោភាគីឬពហុភាគីក្តីមិនបានជួយស្រោចស្រង់ស្ថានការណ៍ដែលកំពុងអាក្រក់ស្រាបឡើយ។ កាលណាបើធ្វើឲ្យកូរ៉េខាងជើងកាន់តែឯកោ តាមរយៈការដាក់ទណ្ឌកម្ម កុំរំពឹងថា កូរ៉េខាងជើងព្រមបោះបង់ចោលអាវុធប្រល័យលោកឲ្យសោះ៕
Tag:
រុស្ស៊ី
កូរ៉េខាងត្បូង
ប្រព័ន្ធមីស៊ីល THAAD
© រក្សាសិទ្ធិដោយ thmeythmey.com