អន្តរជាតិ
ហ្វីលីពីន ព្រមផ្តល់មូលដ្ឋានយោធាដល់អាមេរិក៥កន្លែងដើម្បីពង្រឹងសន្តិសុខដែនសមុទ្រ ![](https://image.thmeythmey.com/pictures/2016/03/20/bn-kr264_philus_hhhhhh.jpg)
×![]()
ភាពតានតឹងនៅក្នុងតំបន់ជម្លោះសមុទ្រចិនខាងត្បូង បានជំរុញឲ្យរដ្ឋាភិបាលក្រុងម៉ានីល ត្រូវបន្ថែម យុទ្ធសាស្ត្រដើម្បីបង្កើនសន្តិសុខ និងការពារអធិបតេយ្យរបស់ខ្លួន។ស្របជាមួយនឹងភាពតានតឹងនេះដែរ រដ្ឋាភិបាលក្រុងម៉ានីល ក៏បានព្រមព្រៀងជាមួយរដ្ឋាភិបាលក្រុងវ៉ាស៊ីនតោនក្នុងការដាក់មូលដ្ឋានយោធា ប្រាំកន្លែងនៅក្នុងទឹកដីហ្វីលីពីនក្នុងកិច្ចសហប្រតិបត្តិមនុស្សធម៌ និងសន្តិសុខដែនសមុទ្រ។
មន្ត្រីជាន់ខ្ពស់អាមេរិក លោកស្រី Amy Searightបានអះអាងថា អាមេរិក និងហ្វីលីពីន បានព្រមព្រៀងលើទីតាំងប្រាំកន្លែងសម្រាប់ការដាក់មូលដ្ឋានយោធារបស់អាមេរិកនៅក្នុងទឹកដីហ្វីលីពីនក្រោម កិច្ចព្រមព្រៀងកិច្ចសហប្រតិបត្តិការពង្រឹងវិស័យការពារ (EDCA)។ ការអះអាងនេះធ្វើឡើងក្នុងឱកាសកិច្ចសន្ទនាយុទ្ធសាស្ត្រទ្វេភាគីអាមេរិក-ហ្វីលីពីនលើកទី៦ ក្នុងក្រុងវ៉ាស៊ិនតោនថ្ងៃទី១៨ខែមីនាកន្លងទៅ។
នៅក្នុងឱកាសដដែលនោះ លោកស្រី Searight ក៏បានបន្ថែមដែរថា មន្ទីរបញ្ចកោន ក៏បានប្រាប់ទៅកាន់សភាអាមេរិកពីគម្រោងនៃការផ្តល់ជំនួយ៥០លានដុលារដើម្បីជួយកសាងសន្តិសុខដែនសមុទ្រនៅក្នុងតំបន់ ហើយ ហ្វីលីពីន ក៏ស្ថិតនៅចំណែកមួយដ៏ធំជាងគេនៃគម្រោងនេះដែរ។នេះបើយោងតាម ភ្នាក់ងារ Reuters ដែលបានដកស្រង់សម្តីមន្ត្រីជាន់ខ្ពស់អាមេរិកដែលបានអះអាងដែលថារដ្ឋមន្ត្រីការ ពារអាមេរិក នឹងធ្វើទស្សនកិច្ចទៅកាន់ហ្វីលីពីននៅខែមេសាខាងមុខដើម្បីពិភាក្សាពីការអនុវត្តកិច្ចព្រម ព្រៀងលើទីតាំងយោធាទាំងនោះ។
សូមបញ្ជាក់ផងដែរថា កិច្ចព្រមព្រៀងកិច្ចសហប្រតិបត្តិការពង្រឹងវិស័យការពារ (EDCA) គឺជាកិច្ចព្រមព្រៀងរវាងអាមេ រិក និងហ្វីលីពីន ដែលបានចុះហត្ថលេខានៅឆ្នាំ២០១៤។ ហើយវា បានចូលជាធរមាននៅដើមឆ្នាំ២០១៦ បន្ទាប់ពីតុលាការកំពូលហ្វីលីពីនប្រកាសពីធម្មនុញ្ញភាពនៃកិច្ចព្រមព្រៀងនោះ។
កិច្ចព្រមព្រៀងកិច្ចសហប្រតិបត្តិការពង្រឹងវិស័យការពារ នឹងផ្តល់លទ្ធភាពឲ្យកងទ័ពអាមេរិកអាចបំពាក់សព្វាវុធ និងបញ្ជូនកងទ័ពរបស់ខ្លួនមកកាន់ទឹកដីហ្វីលីពីនបានដោយស្របច្បាប់។ បន្ថែមពីនេះ កិច្ចព្រមព្រៀងនេះ ក៏នឹងផ្តល់អត្ថប្រយោជន៍សម្រាប់កងទ័ពហ្វីលីពីន ក្នុងការទទួលបាន ការហ្វឹកហ្វឺនបន្ថែមពីអាមេរិក ការការពារសន្តិសុខដែនសមុទ្រ និងប្រតិបត្តិការមនុស្សធម៌ និងមហន្ត រាយផ្សេងៗទៀតផង។ ជាពិសេសនោះ កិច្ចព្រមព្រៀងនេះ ក៏ជាសមិទ្ធផលមួយដ៏សំខាន់នៅក្នុង អាណត្តិរបស់លោកប្រធានាធិបតីហ្វីលីពីនប៊ែរនីណូ អាហ្គីណូ ដែលនឹងត្រូវផុតអាណត្តិនៅឆ្នាំ២០១៦ នេះ។
តែអ្វីដែលគួរកត់សម្គាល់នោះ កិច្ចព្រមព្រៀង ដែលធ្វើឡើងខណៈជម្លោះសមុទ្រចិនខាងត្បូង កំពុងតែឡើងកម្តៅ នឹងធ្វើឲ្យអាមេរិក អាចអន្តរាគមន៍ដើម្បីការពារហ្វីលីពីននៅក្នុងតំបន់ជម្លោះបានគ្រប់ពេល។ នេះក៏មានន័យដែរថាចាប់ពីពេលនេះ កងទ័ពអាមេរិក អាចមានវត្តមានដើម្បីទប់ទល់ចិននៅក្នុងតំបន់ជម្លោះសមុទ្រចិនខាងត្បូងដោយស្របច្បាប់ និងរហ័សផងដែរ៕
© រក្សាសិទ្ធិដោយ thmeythmey.com