ជាតិ
ក្រសួងប្រកាសជ្រើសរើសមគ្គុទ្ទេសក៍ឆ្នើមដើម្បីចូលរួមព្រឹត្តិការណ៍អង្គរសង្ក្រាន្ត ![](https://image.thmeythmey.com/pictures/2016/03/23/songkran0323.jpg)
×![]()
ក្រសួងទេសចរណ៍តាមរយៈសេចក្តីជូនដំណឹងចុះថ្ងៃទី២២ មីនា បានប្រកាសជ្រើសរើសមគ្គុទ្ទេសក៍ឆ្នើម សម្រាប់រាជធានីភ្នំពេញ និងតំបន់សៀមរាប-អង្គរ។ ការជ្រើសរើសមគ្គុទ្ទេសក៍ឆ្នើម គឺដើម្បីចូលរួមក្នុងកម្មវិធីអង្គរសង្ក្រាន្តឆ្នាំ២០១៦ ដែលនឹងមកដល់ក្នុងពេលឆាប់ៗខាងមុខនេះ។
«ក្រសួងទេសចរណ៍នឹងរៀបចំបង្កើតឲ្យមានកម្មវិធីជ្រើសរើសមគ្គុទ្ទេសក៍ទេសចរណ៍ “ថ្នាក់តំបន់” ឆ្នើម ដើម្បីផ្តល់ឳកាសឲ្យបេក្ខជន-បេក្ខនារី ដែលជាមគ្គុទ្ទេសក៍ទេសចរណ៍តំបន់រាជធានីភ្នំពេញ និងតំបន់សៀមរាប-អង្គរ ចូលរួមក្នុងកម្មវិធីអង្គរសង្ក្រាន្តឆ្នាំ២០១៦ នៅខេត្តសៀមរាប»។ នេះជាខ្លឹមសារក្នុងសេចក្តីជូនដំណឹងរបស់ក្រសួងទេសចរណ៍។
ក្រសួងទេសចរណ៍មិនបានបញ្ជាក់លម្អិតពីគោលបំណងនៃការរៀបចំជ្រើសរើសមគ្គុទ្ទេសក៍ឆ្នើមនោះទេ ដោយគ្រាន់តែបញ្ជាក់ថា អ្នកដែលចាប់អារម្មណ៍ត្រូវដាក់ពាក្យឲ្យមុនថ្ងៃទី២៥ មីនា ឆ្នាំ២០១៦ ដោយមានភ្ជាប់ជាមួយ ពាក្យសុំចុះឈ្មោះប្រឡង អាជ្ញាបណ្ណមគ្គុទ្ទេសក៍ថតចំលង សាលាកប័ត្រឯកត្តជន អត្តសញ្ញាណប័ណ្ណសញ្ជាតិខ្មែរ ឫលិខិតបញ្ជាក់ទីលំនៅ ថតចំលង និងរូបថត ៤X៦ ចំនួនពីរសន្លឹក។
បេក្ខជន-បេក្ខនារីដែលចាប់អារម្មណ៍ អាចទៅដាក់ពាក្យប្រឡងនៅក្រសួង ឫមន្ទីររាជធានី-ខេត្ត ឫតាមរយៈទំព័រហ្វេសប៊ុក របស់នាយកដ្ឋានឧស្សាហកម្មទេសចរណ៍ រហូតដល់ថ្ងៃទី២៩ ខែមីនា ឆ្នាំ២០១៦ ៕
Tag:
មគ្គុទ្ទេសក៍
អង្គរសង្ក្រាន្ត
© រក្សាសិទ្ធិដោយ thmeythmey.com