ជាតិ
អតីតសិស្សវិទ្យាល័យព្រះមុនីវង្ស បង្កើតកម្មវិធី «សង្ក្រាន្តភូមិយើង» នៅថ្ងៃទី១០ ខែមេសា ![](https://image.thmeythmey.com/pictures/2016/04/08/youth.jpg)
×![]()
អតីតសិស្សវិទ្យាល័យព្រះមុនីវង្សនៅក្រុងបាត់ដំបងមួយក្រុម បានផ្តើមគំនិតរៀបចំកម្មវិធីដែលមានឈ្មោះថា «សង្ក្រាន្តភូមិយើង» ដែលនឹងប្រព្រឹត្តទៅនៅក្នុងវិទ្យាល័យរបស់ពួកគេ នៅថ្ងៃទី១០ មេសាខាងមុខនេះ។ គំនិតផ្តូចផ្តើមនៃការរៀបចំកម្មវិធីនេះឡើង ក្នុងគោលបំណងផ្សព្វផ្សាយ អប់រំ និងលើកកម្ពស់តម្លៃនៃវប្បធម៌ ប្រពៃណី រួមទាំងរៃអង្គាសថវិកា និងសម្ភារសិក្សាជួយដល់ក្មេងៗផងដែរ។
និស្សិតមហាវិទ្យាល័យឆ្នាំទី៣ ស៊ូ សិទ្ធិសត្យា ដែលជាអតីតសិស្សវិទ្យាល័យព្រះមុនីវង្សនៅក្រុងបាត់ដំបងម្នាក់ ក្នុងចំណោមសមាជិក៥០នាក់ដែលរៀបចំកម្មវិធីនេះ បានបញ្ជាក់ពីគំនិតផ្តួចផ្តើមនេះថា កម្មវិធី«សង្ក្រាន្តភូមិយើង» គឺរៀបចំឡើងដើម្បីកៀរគរយុវនជនឲ្យមានស្មារតី រួមសាមគ្គីគ្នា បង្កើនមិត្តភាពរវាងក្រុមយុជន និងយុវជន ហើយជំរុញឲ្យពូកគេយកចិត្តទុកដាក់និងលើកម្ពស់នូវវប្បធម៌ ប្រពៃណីខ្មែរឲ្យកាន់តែច្រើន តាមរយៈការលេងល្បែងប្រជាប្រិយខ្មែរ។
អ្នករៀបចំកម្មវិធី ស៊ូ សិទ្ធិសត្យា បានបន្ថែមទៀតថា ការរៀបចំកម្មវិធីនេះឡើងក៏ក្នុងគោលបំណងរៃអង្គាសថវិកា និងសម្ភារសិក្សា ដើម្បីជួយសង់បណ្ណាល័យមួយឲ្យសាលាបឋមសិក្សាជ្រោយស្នា នៅស្រុកបវិល ខេត្តបាត់ដំបង ដែលកំពុងខ្វះសៀវភៅ និងសម្ភារសិក្សា។
កម្មវីធីដែលនឹងប្រព្រឹត្តិទៅពេញមួយថ្ងៃ នៅថ្ងៃទី១០ មេសា នៅវិទ្យាល័យព្រះមុនីវង្សនៅក្រុងបាត់ដំបងនេះ នឹងមានការប្រគំតន្ត្រី លេងល្បែងប្រពៃណីខ្មែរ និងការរាំំកម្សាន្ត ដោយបញ្ចៀសនូវការលេងប៉ាតម្សៅ និងគប់ទឹកដាក់គ្នា ដែលមិនមែនជាវប្បធម៌មួយល្អឡើយ៕
© រក្សាសិទ្ធិដោយ thmeythmey.com