ជាតិ
ក្រសួងបញ្ចប់ការពិភាក្សាសេចក្ដីព្រាងច្បាប់ស្ដីពីការគ្រប់គ្រងការប្រកបវិជ្ជាជីវៈសុខាភិបាល
×![]()
ក្រសួងសុខាភិបាល បានបញ្ចប់ការពិភាក្សាសេចក្ដីព្រាងច្បាប់ស្ដីពីការគ្រប់គ្រងការប្រកបវិជ្ជាជីវៈសុខាភិបាលហើយ កាលពីថ្ងៃទី១៩ខែមេសា។ មន្ត្រីជាន់ខ្ពស់ក្រសួងមួយនេះ បានអះអាងថា សេចក្តីព្រាងថ្មីនេះ នឹងធ្វើឲ្យអ្នកប្រកបជំនាញវិជ្ជាជីវៈក្នុងវិស័យសុខាភិបាល កាន់តែមានទំនួលខុសត្រូវ និងធានាបានសុខុមាលភាពពលរដ្ឋ។ 
សេចក្ដីព្រាងច្បាប់ស្ដីពីការគ្រប់គ្រងការប្រកបវិជ្ជាជីវៈសុខាភិបាល បានបញ្ចប់ការពិភាក្សាហើយ កាលពីថ្ងៃទី១៩ខែមេសា។ សេចក្តីព្រាងច្បាប់នេះ ក៏បានកំណត់អ្នកប្រកបអាជីវកម្មផ្នែកសុខាភិបាល ស្នើសុំអាជ្ញាប័ណ្ណពីក្រសួងសុខាភិបាល និងកំណត់ពីសុពលភាពចំពោះអាជ្ញាប័ណ្ណផងដែរ ដើម្បីងាយស្រួលក្នុងការគ្រប់គ្រង។
លោក ហុក ខៀវ ប្រធាននាយកដ្ឋាននីតិកម្មនៃក្រសួងសុខាភិបាល បានបញ្ជាក់ថា ការទាមទារឲ្យមានការអនុញ្ញាតពីក្រសួងសុខាភិបាលនេះ គឺដើម្បីពង្រឹងសមត្ថភាពអ្នកដែលមានជំនាញវិជ្ជាជីវៈក្នុងវិស័យសុខាភិបាល និងបំពេញការងារប្រកបដោយភាពទទួលខុសត្រូវ។ សេចក្ដីព្រាងច្បាប់ថ្មីនេះ ក៏បានកំណត់ពីសុពលភាពអាជ្ញាបណ្ណធ្វើអាជីវកម្មផងដែរ ខណៈបច្ចុប្បន្នអាជ្ញាបណ្ណមានសុពលភាពប្រើប្រាស់ជាអចិន្ដ្រៃយ៍ ដែលធ្វើឱ្យក្រសួងមិនអាចគ្រប់គ្រងលើជំនាញវិជ្ជាជីវៈសុខាភិបាលបាន។ នេះជាការបន្ថែមរបស់លោក ហុក ខៀវ។
ចំពោះខ្លឹមសារនៃសេចក្ដីព្រាងច្បាប់នេះ លោក ធា គ្រុយ រដ្ឋលេខាធិការក្រសួងសុខាភិបាល និងប្រធានគណៈគ្រូពេទ្យកម្ពុជា បានបញ្ជាក់ថាបានដាក់បញ្ចូលនូវការពង្រឹងក្រមសីលធម៌ និងវិជ្ជាជីវៈគ្រូពេទ្យ បំប៉នលើសមត្ថភាពវិន័យគ្រូពេទ្យ និងការកំណត់កម្រិតវប្បធម៌របស់គ្រូពេទ្យមុនចូលបម្រើការងារ ពិសេសបង្កើនការយកចិត្តទុកដាក់ បម្រើប្រយោជន៍ប្រជាពលរដ្ឋ។
សេចក្តីព្រាងច្បាប់ដែលមាន៩ជំពូក និង៣៤មាត្រានេះ នឹងត្រូវបញ្ជូនទៅក្រសួងយុត្តិធម៌ ពិនិត្យ និងកែសម្រួលលើទោសប្បញ្ញត្តិ មុននឹងបញ្ជូនទៅទីស្ដីការគណៈរដ្ឋមន្ត្រី និងរដ្ឋសភា អនុម័ត៕
ប្រភព៖ AKP
Tag:
សុខាភិបាល
ហុក ខៀវ
ធា គ្រុយ
© រក្សាសិទ្ធិដោយ thmeythmey.com
