ព័ត៍មានសុខភាព
×![]()
ដោយ: ថ្មីៗ
ខ្ញុំអាយុ ៣០ ឆ្នាំ ហើយពេលថ្មីៗនេះ ខ្ញុំក៏បានរួមភេទជាមួយដៃគូខ្ញុំដែរ ប៉ុន្តែ ក្រោយពីរួមភេទរួច ខ្ញុំក៏ឃើញមានកន្ទួលក្រហមៗ រមាស់ច្រើននៅលើលិង្គខ្ញុំ។ តើវាអាចបណ្តាលមកពីហេតុអ្វីទៅ? ហើយខ្ញុំគួរតែទៅជួបពេទ្យទេ ព្រោះថានេះមិនមែនជាលើកទីមួយ ដែលខ្ញុំរួមភេទជាមួយដៃគូខ្ញុំឡើយ? 
ស្នាមកន្ទួលក្រហមៗលើលិង្គ អាចបណ្តាលមកពីមូលហេតុច្រើនប្រភេទ ដូចជា ការបង្ករោគ កង្វះទឹករំអិលក្នុងពេលរួមភេទ ជំងឺទឹកនោមផ្អែមម មានចៃ ឬអាលែកស៊ី។ ដូច្នេះ យកល្អ យើងគួរតែពិគ្រោះជាមួយគ្រូពេទ្យ និងឲ្យដឹងសម្រេចចិត្តព្យាបាល ដោយផ្អែកទៅលើមូលហេតុរបស់វាទៅ។ ករណីខ្លះ ការពិនិត្យរាងកាយធម្មតាៗគឺគ្រប់គ្រាន់ ដើម្បីដឹងមូលហេតុរបស់វាហើយ តែក៏មានករណីផ្សេងៗទៀតត្រូវការធ្វើតេស្តច្រើន ទើបរករោគវិនិច្ឆ័យឃើញដែរ។ ខាងក្រោមនេះ គឺជាមូលហេតុដែលនាំឲ្យមានកន្ទួលក្រហមៗ លើលិង្គជាញឹកញាប់។
ការបង្ករោគ
រឿងនេះកើតឡើងច្រើនជាងគេ គឺដោយសារតែជំងឺកាមរោគតែម្តង ហើយជំងឺដែលបង្កវានោះ មានដូចជា Trichomonialis Vaginalis ជំងឺស្វាយ ឬជំងឺប៉េសជាដើម។
កង្វះទឹករំអិលក្នុងពេលរួមភេទ
បើសិនជាវាមិនមែន បង្កឡើងដោយការបង្ករោគទេ នោះគឺជាការកង្វះទឹករំអិល ក្នុងពេលរួមភេទហើយ ព្រោះវានឹងធ្វើឲ្យមាន ការកកិតស្បែកខ្លាំង និងបង្កជាស្នាមកន្ទួលក្រហមលើលិង្គបាន។ រឿងនេះច្រើនកើតឡើង លើការរួមភេទបែបចាប់បង្ខំ ឬនៅពេលដែលស្ត្រី មិនទាន់មានការត្រៀមខ្លួនរួច។ ក្រៅពីនេះ វាក៏ធ្វើឲ្យខាងស្រី មានការឈឺចាប់ខ្លាំងណាស់ដែរ។
អាលែកស៊ី
ស្ថិតក្នុងករណីដ៏កម្រ វាអាចដោយសារតែប្រតិកម្មអាលែកស៊ី ដែលធ្វើឲ្យឈឺចាប់ អារម្មណ៍ក្រហាយ និងរមាស់នៅលើលិង្គ។ វាអាចជាការអាលែកស៊ី ទៅនឹងសារធាតុរំអិលចេញពីមនុស្សស្រី ចៃនៅរោមថ្ងាសក្រោម ឬរោមថ្ងាសក្រោមនោះ ធ្វើឲ្យអាលែកស៊ីតែម្តង ឬក៏មកពីការប្រើស្រោមអនាម័យ ក៏មានដែរ។
ជំងឺទឹកនោមផ្អែម
ករណីខ្លះ ការមានស្នាំក្រហម កន្ទួល ឬរមាស់នៅលើលិង្គ អាចដោយសារតែជាតិស្ករក្នុងឈាមឡើងខ្ពស់ ដូច្នេះ វាក៏អាចបញ្ជាក់អំពី សញ្ញាមិនធម្មតារបស់ជំងឺទឹកនោមផ្អែមដែរ។ ក្រោយពីរួមភេទរួច បើសិនជាអ្នកធ្លាប់មានអាការៈក្រហាយៗ ជាមួយនឹងកន្ទួលក្រហមៗលើស្បែក និងមិនស្រាកស្រាន្តទៅវិញ ក្រោយពីប្រើថ្នាំលាប ឬថ្នាំផ្សះរួចនោះ វាអាចបញ្ជាក់ច្បាស់ថា អ្នកមានជំងឺរលាកលិង្គហើយ ដូច្នេះយកល្អ គួរតែពិនិត្យជាតិស្ករក្នុងឈាមមើលសិនទៅ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
