អន្តរជាតិ
រុស្ស៊ី-អាស៊ាន បង្កើតនិម្មាបនកម្មសន្តិសុខក្នុងតំបន់អាស៊ីប៉ាស៊ីហ្វិក
× ប្រមុខការទូតរុស្ស៊ី លោក Sergei Lavrov បានថ្លែងនៅក្នុងសន្និសីទនៃកិច្ចប្រជុំរដ្ឋមន្ត្រីការបរទេសអាស៊ាន-រុស្ស៊ី ថា រុស្ស៊ី និងសមាគមប្រជាជាតិអាស៊ីអាគ្នេយ៍ បានសហការយ៉ាងជិតស្និទ្ធជាមួយគ្នាដើម្បីប្រឹងប្រែងក្នុងការកសាងនិម្មាបនកម្មសន្តិសុខទំនើបមួយនៅក្នុងតំបន់អាស៊ីប៉ាស៊ីហ្វិក ដោយផ្អែកលើគោលការណ៍ស្មើភាព។ និម្មាបនកម្មសន្តិសុខ សំដៅលើការបង្កើតកិច្ចសហប្រតិបត្តិការរួមមួយរឹងមាំ។
«ខ្ញុំ ចង់កត់សម្គាល់បន្តិចថា យើង បានសម្របសម្រួលការងាររបស់យើងជាមួយនឹងអាស៊ានដើម្បីកសាងនិម្មាបនកម្មសន្តិសុខនៅក្នុងតំបន់អាស៊ីប៉ាស៊ីហ្វិក ដោយឈរលើគោលការណ៍ស្មើភាព ការបើកចំហ និងបញ្ហាសម្រាប់ផលប្រយោជន៍រាល់ភាគីពាក់ព័ន្ធ»។ នេះគឺជាលើកឡើងរបស់លោករដ្ឋមន្ត្រីការបរទេសរុស្ស៊ី Sergei Lavrov នាសន្និសីទអាស៊ាន-រុស្ស៊ី ក្នុងក្រុងវៀងចន្ទន៍នៅថ្ងៃទី២៥ខែកក្កដា ម្សិលមិញ។
លោករដ្ឋមន្ត្រីការបរទេសរូបនោះ ក៏បានបន្ថែមដែរថា រុស្ស៊ី និងអាស៊ាន បានសហការជាមួយគ្នាប្រកបដោយផ្លែផ្កានៅក្នុងឆាកអន្តរជាតិ ហើយ រុស្ស៊ី ក៏បានប្តេជ្ញារក្សាតម្លៃ និងបទដ្ឋាន និងការពារតួនាទីនិងកិច្ចការនៅក្នុងតំបន់អាស៊ានទាំងដប់ផងដែរ។ នេះបើយោងតាមកាសែត TASS។
លោក ក៏បានសង្កត់ធ្ងន់ដែរថា រុស្ស៊ី នឹងបន្តចូលរួមកិច្ចសហការយ៉ាងសកម្មនៅក្នុងសកម្មភាពជាមួយនឹងអាស៊ានដើម្បីពង្រឹងសន្តិភាព និងស្ថិរភាព សុខដុមរមនា និងកំណើនប្រកបដោយចីរភាពនៅក្នុងតំបន់អាស៊ីប៉ាស៊ីហ្វិក។
សូមរមឹ្លកផងដែរថា កាលពីខែឧសភាកន្លងទៅ រុស្សី ក៏បានបង្កើតកិច្ចប្រជុំកំពូលមួយដោយបានអញ្ជើញប្រមុខដឹកនាំកំពូលៗរបស់អាស៊ានដើម្បីចូលរួមក្នុងគោលដៅដើម្បីពង្រឹងកិច្ចសហប្រតិបត្តិការទ្វេភាគីជាមួយនឹងបណ្តាសមាជិកអាស៊ាននីមួយៗ និងកិច្ចសហប្រតិបត្តិការជារួមជាមួយនឹងអាស៊ានផងដែរ៕
© រក្សាសិទ្ធិដោយ thmeythmey.com