ជាតិ
មន្ទីរពេទ្យកុមារអង្គរខ្វះថវិកា១លានដុល្លារទៀតដើម្បីបង្គ្រប់ការចំណាយប្រចាំឆ្នាំ ![](https://image.thmeythmey.com/pictures/2016/08/04/vcha.jpg)
×![]()
សៀមរាប៖ មន្ទីរពេទ្យកុមារអង្គរ គឺជាមន្ទីរពេទ្យទី២បន្ទាប់ពីមន្ទីរពេទ្យគន្ធបុប្ផា ដែលព្យាបាលកុមារដោយឥតគិតថ្លៃ នៅក្នុងខេត្តសៀមរាប។ ជារៀងរាល់ថ្ងៃ កុមារក្រីក្រនៅទូទាំងប្រទេស បានមកទទួលការព្យាបាលជំងឺនៅមន្ទីរពេទ្យកុមារអង្គរ ដែលធ្វើឲ្យមន្ទីរពេទ្យមួយនេះ ស្វះស្វែងរកជំនួយ និងបង្កើតកម្មវិធីសប្បុរសធម៌ជាច្រើន ក្នុងបំណងរកថវិកាសម្រាប់ចាយវាយប្រចាំឆ្នាំ។
នៅក្នុងឆ្នាំ២០១៦នេះ មន្ទីរពេទ្យកុមារអង្គរ នៅខ្វះខាតថវិកាប្រមាណ១លានដុល្លារបន្ថែមទៀត ដើម្បីបង្គ្រប់ការចំណាយប្រចាំឆ្នាំរបស់ខ្លួន។ លោក ងួន ចាន់ភក្រា្ត ប្រធានមន្ទីរពេទ្យកុមារ បានប្រាប់អ្នកសារព័ត៌មានកាលពីពេលថ្មីៗនេះថា ក្នុងមួយឆ្នាំៗមន្ទីរពេទ្យត្រូវការខ្ទង់ថវិកាចំនួន ៦,៥លានដុល្លារ។
លោក ងួន ចាន់ភាក្ត្រា បានអំពាវនាវដល់សប្បុរសជនខ្មែរ ជួយបរិច្ចាគទាំងថវិកា សម្ភារ ថ្នាំពេទ្យ ដើម្បីសម្រាលបន្ទុករបស់មន្ទីរពេទ្យអង្គរ ដែលតែងតែព្យាបាលកុមារដោយមិនគិតថ្លៃ។ ក្រៅពីកង្វះថវិកា និងធនធានហើយនោះ មន្ទីរពេទ្យមួយនេះ ក៏នៅត្រូវការអ្នកបរិច្ចាគឈាម ដើម្បីទុកជួយសង្គ្រោះកុមារ ដែលត្រូវការវះកាត់។ល។ នេះជាការបញ្ជាក់ពីប្រធានមន្ទីរពេទ្យ។
ក្រៅពីព្យាបាលជំងឺទូទៅដល់កុមារហើយនោះ មន្ទីរពេទ្យកុមារអង្គរ ក៏មានសេវាវះកាត់បេះដូងដល់កុមារផងដែរ។ ក្នុងនោះដែរ មន្ទីរពេទ្យមួយនេះ ក៏បានជួយផ្គត់ផ្គន់អាហារ កន្លែងស្នាក់នៅ ថ្លៃឡានឈ្នួល។ល។ ដល់អាណាព្យាបាលក្មេង ដែលមកពីបណ្តាខេត្តមួយចំនួន និងដែលមានជីវភាពទីទ័លក្រផងដែរ។ តួលេខពីខាងមន្ទីរពេទ្យកុមារអង្គរ ក្នុងមួយថ្ងៃមានកុមារប្រមាណ ៥០០នាក់ ដែលបានចូលមកសម្រាក និងពិនិត្យព្យាបាលជំងឺក្នុងមន្ទីរពេទ្យ។
ជុំវិញការអំពាវនាវដល់សប្បុរសជនជួយដល់មន្ទីរពេទ្យអង្គរនេះ គេសង្កេតឃើញកន្លងមក មានបណ្តាក្រុមហ៊ុន សមាគម សណ្ឋាគារ ភោជនីយដ្ឋាន សប្បុរសជន។ល។ បានរៀបចំកម្មវិធីផ្សេងៗគ្នា ក្នុងបំណងរៃអង្គាសថវិកា ដើម្បីយកមកជួយដល់មន្ទីរពេទ្យមួយនេះ។ កន្លងមក ថ្នាក់គ្រប់គ្រងមន្ទីរពេទ្យផ្ទាល់ ក៏ធ្លាប់ធ្វើបុណ្យផ្កាសាមគ្គីជាប្រចាំឆ្នាំ ហើយនៅថ្ងៃទី១៤ សីហា ឆ្នាំ២០១៦ខាងមុខនេះ មានកម្មវិធីជិះកង់ប្រចាំឆ្នាំ ដើម្បីរកថវិកាជួយដល់មន្ទីរពេទ្យនេះផងដែរ។ ការចុះឈ្មោះចូលរួម ក៏កំពុងបន្តនៅក្នុងមន្ទីរពេទ្យកុមារអង្គរ ភោជនីយដ្ឋានអាស៊ានឃ្វែរជាដើម។
គួររម្លឹកថា មន្ទីរពេទ្យកុមារអង្គរបង្កើតឡើងនៅឆ្នាំ១៩៩៩ ដោយជនជាតិអាមេរិកកាំង ដើមកំណើតជប៉ុន។ លោក ខេនរ៉ូ អ៊ីហ្ស៊ុ មានអារម្មណ៍សោកសង្រេង នៅពេលលោកបានឃើញទិដ្ឋភាពកុមារជំងឺ និងកង្វះអាហារូបត្ថម្ភ ហើយលោកបានប្រមូលមិត្តភក្តិ និងសប្បុរសជនមួយចំនួន ដើម្បីបើកមន្ទីរពេទ្យមួយនេះ នៅក្នុងខេត្តសៀមរាប៕
Tag:
មន្ទីរពេទ្យកុមារអង្គរ
សៀមរាប
© រក្សាសិទ្ធិដោយ thmeythmey.com