អន្តរជាតិ
ជ័យលាភីមេដាយមាសអូឡាំពិកនៅអាស៊ានអាចជិះ Air Asia ដោយឥតគិតថ្លៃមួយជីវិត អត្តពលិកអាស៊ានដែលឈ្នះមេដាយមាសអូឡាំពិក។ រូបថត ហ្វេសប៊ុក Tony Fernandes
× ក្នុងគោលដៅអបអរអត្តពលិកអាស៊ានដែលឈ្នះមេដាយនៅព្រឹត្តិការណ៍អូឡាំពិក Rio 2016 ក្រុមហ៊ុនអាកាសចរណ៍ម៉ាឡេស៊ី Air Asia បានសម្រេចផ្ដល់សំបុត្រយន្តហោះពិសេសដល់អត្តពលិកដែលឈ្នះមេដាយទាំងអស់។ ក្នុងនោះ ម្ចាស់មេដាយមាស នឹងទទួលបានសំបុត្រជិះយន្តហោះដោយមិនគិតថ្លៃអស់មួយជីវិត ខណៈម្ចាស់មេដាយប្រាក់ និងសំរិទ្ធ នឹងទទួលបានសំបុត្រដែលអាចជិះក្នុងពេលកំណត់មួយ។
ក្នុងសេចក្ដីប្រកាសព័ត៌មាននៅថ្ងៃទី២៤ ខែសីហា ក្រុមហ៊ុនអាកាសចរណ៍ Air Asia នឹងផ្ដល់សំបុត្រយន្តហោះជិះដោយសេរីមួយជីវិត ដល់អត្តពលិកនៃប្រទេសសមាជិកអាស៊ានទាំងអស់ ដែលឈ្នះមេដាយមាស នៅឯកីឡាអូឡាំពិកឆ្នាំ២០១៦ នៅទីក្រុង Rio de Janeiro ប្រទេសប្រេស៊ីល។ នេះបើយោងតាមការផ្សាយរបស់ទូរទស្សន៍ Channel News Asia។
សេចក្ដីប្រកាសព័ត៌មានដដែលបន្ថែមថា ចំពោះអត្តពលិកដែលទទួលបានមេដាយប្រាក់ នឹងទទួលបានសំបុត្រយន្តហោះដែលអាចជិះដោយសេរីរយៈពេល៥ឆ្នាំ។ ហើយម្ចាស់មេដាយសំរិទ្ធនៅតាមប្រភេទកីឡារបស់ខ្លួន នឹងទទួលបានសំបុត្រដែលអាចជិះក្នុងរយៈពេល២ឆ្នាំផងដែរ។ អត្តពលិកដែលមានសិទ្ធិទទួលបានសំបុត្រទាំងអស់ អាចធ្វើដំណើរទៅកាន់គោលដៅច្រើនជាង១២០ នៅអាស៊ី អូស្ត្រាលី មជ្ឈិមបូព៌ា និងអាហ្វ្រិក។
បើយោងតាមលទ្ធផលបន្ទាប់ពីបញ្ចប់ព្រឹត្តិការណ៍អូឡាំពិក Rio 2016 អត្តពលិកមកពីតំបន់អាស៊ានដែលឈ្នះមេដាយមាស រួមមានកីឡាករហែលទឹកសិង្ហបុរី Joseph Schooling កីឡាករវាយសីដៃគូឥណ្ឌូណេស៊ី Liliyana Natsir និងTontowi Ahmad។ វៀតណាមមាន ម្ចាស់មេដាយមាសវិញ្ញាសាបាញ់កាំភ្លើង Hoang Xuan Vinh ឯថៃមានក៏ទទួលបានមេដាយមាសពីរគ្រឿងដែរលើវិញ្ញាសាលើកទម្ងន់ គឺ កីឡាការិនី Sukanya Srisurat និងSopita Tanasan។
នាយកប្រតិបត្តិ Air Asia លោក Tony Fernandes និយាយថា អត្តពលិកអាស៊ានដែលអាចយកឈ្នះមេដាយ ជាសក្ខីកម្មបង្ហាញថា រឿងគ្រប់យ៉ាងសុទ្ធតែអាចសម្រេចបាន តាមរយៈការជឿជាក់លើខ្លួនឯង និងការប្រឹងប្រែងដោយមិនខ្លាចនឿយហត់ដើម្បីទៅដល់គោលដៅ។ លោកសង្ឃឹមទៀតថា ជោគជ័យនេះ នឹងជំរុញអត្តពលិកដទៃទៀតនៅក្នុងតំបន់អាស៊ាន ឲ្យដើរតាមការព្យាយាមរបស់ពួកគេ ហើយលោករំពឹងថា នៅថ្ងៃអនាគត តំបន់អាស៊ាន នឹងទទួលបានមេដាយកាន់តែច្រើន៕
Tag:
Rio 2016
អាស៊ាន
Air Asia
© រក្សាសិទ្ធិដោយ thmeythmey.com