អន្តរជាតិ
នយោបាយអន្តរជាតិ
×![]()
ដោយ: តន ចាន់រិទ្ធារ៉ា
អធិការបតីអាល្លឺម៉ង់ លោកស្រី Angela Merkel បានបង្ហាញជំហរគាំទ្រគម្រោងបែងចែកជនភៀសខ្លួនតាមកូតារបស់អឺរ៉ុប ស្របពេលដែលរដ្ឋជាសមាជិកសហភាពអឺរ៉ុបមួយចំនួន បានទាត់ចោលផែនការនេះក្រោមហេតុផលសន្តិសុខ។ មិនតែប៉ុណ្ណោះ លោកស្រី ក៏ប្រាប់ឲ្យសមាជិកអឺរ៉ុបទាំងនោះ ត្រូវអនុវត្តតាមគោលការណ៍ដែលស្ថាប័នអឺរ៉ុបសម្រេចចិត្តរួចហើយនោះ។
លោកស្រី Angela Merkel នៅថ្ងៃទី២៨ ខែសីហា បានចាត់ទុកការបដិសេធទទួលយកជនភៀសមូស្លីមរបស់រដ្ឋសមាជិកអឺរ៉ុប គឺជារឿងមិនអាចទទួលយកបានឡើយ និងបានអំពាវនាវឲ្យរដ្ឋអឺរ៉ុបទាំងអស់ ត្រូវធ្វើតាមការសម្រេចចិត្តរបស់ស្ថាប័នអឺរ៉ុប។ អាល្លឺម៉ង់ ដែលត្រូវចាត់ទុកជាបងធំមួយរបស់អឺរ៉ុប បានស្នើឲ្យមានការបែងចែកចំនួនជនភៀសខ្លួនទៅតាមរដ្ឋសមាជិកនានា ប៉ុន្តែសំណើនេះ មិនត្រូវបានរដ្ឋសមាជិកទាំងអស់ស្វាគមន៍ឡើយ។
អធិការបតីអាល្លឺម៉ង់ បានប្រាប់ទូរទស្សន៍ ARD ថា វាមិនមែនជារឿងត្រឹមត្រូវទេដែលប្រទេសខ្លះនិយាយថា ខ្លួនមិនត្រូវការជនមូស្លីមក្នុងប្រទេសនោះ។ ឆ្លៀតពេលនោះ លោកស្រី Merkel ដែលគាំទ្រប្រព័ន្ធបែងចែកជនភៀសខ្លួនតាមកូតានោះ ក៏សង្កត់ធ្ងន់ដែរថា គ្រប់គ្នា (រដ្ឋសមាជិកអឺរ៉ុប) ត្រូវតែគោរពការទទួលខុសត្រូវរបស់ខ្លួន ហើយគេនឹងរកច្រកចេញរួមមួយសម្រាប់បញ្ហានេះ។
គោលនយោបាយរួមមួយលើបញ្ហាជនភៀសខ្លួន គឺជាបញ្ហារសើបរបស់អឺរ៉ុប ខណៈដែលរដ្ឋអឺរ៉ុបខ្លះ មិនសូវជាពេញចិត្តនឹងគោលនយោបាយបែបនេះឡើយ និងព្រមទាំងប្រកាសមិនស្វាគមន៍ជនភៀសខ្លួនថែមទៀត។ បញ្ហាចម្រូងចម្រាសនេះ នឹងក្លាយជាប្រធានក្ដៅនៅក្នុងកិច្ចប្រជុំកំពូលអឺរ៉ុប នៅខែក្រោយ ស្របពេលដែលកិច្ចព្រមព្រៀងជនភៀសខ្លួនជាមួយតួកគី ក៏កំពុងប្រឈមមុខនឹងការដួលរលំដែរនោះ។
សមាជិកអឺរ៉ុបមួយចំនួន ដែលភាគច្រើនមកពីតំបន់អឺរ៉ុបខាងកើត ដូចជា សាធារណរដ្ឋឆែក, ហុងគ្រី, ប៉ូឡូញ, និងស្លូវ៉ាគី ជាដើមនោះគឺសុទ្ធតែប្រឆាំងនឹងគម្រោងបែងចែកជនភៀសខ្លួនរបស់អឺរ៉ុប ឬក៏ទទួលយកតែក្នុងបរិមាណកំណត់ណាមួយប៉ុណ្ណោះ។ ជាក់ស្ដែងនោះ ប្រធានាធិបតីស្លូវ៉ាគី លោក Robert Fico ប្រកាសហើយថា ប្រទេសលោកនឹងមិនទទួលយកជនមូស្លីម សូម្បីតែម្នាក់ឡើយ។
ចំណែកមេដឹកនាំផ្សេងទៀត ក៏ព្រួយបារម្ភចំពោះការទទួលយកជនភៀសខ្លួនមូស្លីមមកកាន់ទឹកដីរបស់ខ្លួន បើទោះជាមិនបានបដិសេធផែនការរបស់អឺរ៉ុបកក៏ដោយចុះ។ ការវាយប្រហារជាបន្តបន្ទាប់នៅប្រទេសបារាំង និងបែលហ្សិក បានធ្វើឲ្យសមាជិកដទៃទៀត ស្ទាក់ស្ទើរចិត្តទទួលយកជនភៀសខ្លួន ដែលភាគច្រើនមកពីមជ្ឈិមបូព៌ា។ នាយករដ្ឋមន្ត្រីឆែក លោក Bohuslav Sobotka និយាយថា លោកមិនចង់មានសហគមន៍មូស្លីមទ្រង់ទ្រាយធំនៅក្នុងប្រទេសឡើយ ហើយលោកចង់ឲ្យប្រទេសនីមួយៗ ជាអ្នកសម្រេចចិត្តថា ពួកគេអាចទទួលបានប៉ុន្មាន ជាជាងទទួលយកអ្វីដែលអឺរ៉ុបសម្រេចរួចហើយនោះ៕
Tag:
អាល្លឺម៉ង់
អឺរ៉ុប
ជនភៀសខ្លួន
Angela Merkel
© រក្សាសិទ្ធិដោយ thmeythmey.com
