អន្តរជាតិ
ចិនធ្វើម្ចាស់ផ្ទះកិច្ចប្រជុំG-20 ស្របពេលខ្លួនកំពុងពង្រីកឥទ្ធិពលលើឆាកអន្តរជាតិ G-20 រូបភាពពី Xinhua
× កិច្ចប្រជុំនៃបណ្ដាប្រទេសមានសេដ្ឋកិច្ចរីកចម្រើនទាំង២០ (G-20) នឹងចាប់ផ្ដើមនៅចុងសប្ដាហ៍នេះ ក្នុងក្រុង Hangzhou។ ប្រមុខរដ្ឋ ប្រមុខរដ្ឋាភិបាលនៃប្រទេស G-20 នឹងចូលរួមកិច្ចប្រជុំដ៏សំខាន់នេះ ស្របពេលដែលគេរំពឹងថា មហាយក្សនឹងឆ្លៀតឱកាសនេះ បង្ហាញពីកម្លាំងសេដ្ឋកិច្ចដ៏មហិមា ក៏ដូចជាតួនាទីរបស់ខ្លួនលើការងារអភិបាលកិច្ចរបស់ពិភពលោក ដែលកំពុងប្រឈមមុខនឹងបញ្ហាជាច្រើន។
កិច្ចប្រជុំ G-20 ដែលទីក្រុង Hangzhou ជាម្ចាស់ផ្ទះ នឹងធ្វើឡើងពីថ្ងៃទី២ ដល់ថ្ងៃទី៣ ខែកញ្ញា។ កិច្ចប្រជុំពិភពលោកនេះ ធ្វើឡើងចំពេលដែលមហាយក្សចិន កំពុងដើរតួយ៉ាងសំខាន់ក្នុងសេដ្ឋកិច្ច និងអភិបាលកិច្ចរបស់ពិភពលោកនាពេលបច្ចុប្បន្ននេះ។ ប្រធានាធិបតី បារ៉ាក់ អូបាម៉ា ក៏ដូចជានាយករដ្ឋមន្ត្រីជប៉ុន ក៏នឹងមានវត្តមានក្នុងជំនួបកំពូលសេដ្ឋកិច្ចនេះដែរ។
មហាយក្សចិន ឈានជើងចូលសេដ្ឋកិច្ចពិភពលោកជាផ្លូវការ បន្ទាប់ពីក្លាយជាសមាជិកអង្គការពាណិជ្ជកម្មពិភពលោកក្នុងឆ្នាំ២០០១ ។ រយៈពេល១៥ឆ្នាំមកនោះ ចិនក្លាយជាមហាអំណាចសេដ្ឋកិច្ចពិភពលោក ជាមួយនឹងកំណើនសេដ្ឋកិច្ចជាមធ្យមចំនួន១០ភាគរយ និងការវិនិយោគយ៉ាងច្រើននៅប្រទេសជាច្រើនជុំវិញពិភពលោក។ អ្វីគួរកត់សម្គាល់នោះ នៅរយៈពេលពីរឆ្នាំចុងក្រោយនេះ មហាយក្ស ក៏ប្រែមុខមាត់ថ្មីមួយទៀត គឺចិនលែងជាប្រទេសលាក់មុខលាក់មាត់ទៀតហើយ។
ចិនបានដើរតួនាទីយ៉ាងសំខាន់ក្នុងសករាជនៃសកលភាវូនីយកម្ម ហើយចិនក៏មិនមែនជាប្រទេសដែលចាំតែឆក់យកប្រយោជន៍ទៀតដែរ។ ការផ្ដើមគំនិតបង្កើតធនាគារអភិវឌ្ឍហេដ្ឋារចនាសម្ព័ន្ធអាស៊ី (AIIB) ដែលមានសមាជិកមកពីអាស៊ី និងអឺរ៉ុប និងគំនិតផ្ដួចផ្ដើមខ្សែក្រវ៉ាត់មួយ វិថីមួយ ដែលការគំនិតនៃការតភ្ជាប់ប្រទេសជាច្រើន គឺជាឧទាហរណ៍បង្ហាញពីឥទ្ធិពលរបស់ចិនលើឆាកអន្តរជាតិ។
យ៉ាងណាមិញ ស្របពេលដែលចិនកំពុងពង្រីកឥទ្ធិពលរបស់ខ្លួនតាមរយៈគំនិតផ្ដួចផ្ដើមជាច្រើននោះ ពាណិជ្ជកម្ម និងវិនិយោគអន្តរជាតិ បែរជាធ្លាក់ចុះទៅវិញ។ ជាមួយគ្នានោះ នៅឯប្លុកលោកខាងលិចឯណោះ ក៏មានចលនាប្រឆាំងនឹងបរិបទសកលភាវូនីយកម្ម។ តួយ៉ាង អ្នកប្រឆាំងសកលភារូបនីយកម្មនោះមាន បេក្ខជនប្រធានាធិបតីអាមេរិក ដូណាល់ ត្រាំ និងសមាជិកព្រឹទ្ធសភា លោក Bernie Sanders ជាដើម ហើយការចាកចេញរបស់អង់គ្លេសពីអឺរ៉ុប ក៏ជាបញ្ហាដូចគ្នា។
បើទោះមានជាការប្រឈមច្រើនក្ដី អ្វីដែលគេមិនអាចប្រកែកបាននោះ គឺសេដ្ឋកិច្ចចិននៅតែមានកំណើនយ៉ាងឆាប់រហ័ស ហើយចិននៅតែមានការប្ដេជ្ញាចិត្តខ្ពស់ ក្នុងការគាំទ្រ សកលភាវូនីយកម្ម និងជំរុញឲ្យមានការពឹងពាក់គ្នាទៅវិញទៅមក។ នៅពេលនេះ ចិនដែលជាមហាអំណាចសេដ្ឋកិច្ចលំដាប់ទីពីរ មានសមត្ថភាពក្នុងការផ្ដល់នូវបរិបទថ្មីដែលល្អប្រសើរដល់ពិភពលោក តាមរយៈកំណើនសេដ្ឋកិច្ច កិច្ចប្រតិបត្តិការរួមគ្នា ក៏ដូចជាសកលភាវូនីយកម្មថ្មីផងដែរ។
មកទល់ពេលនេះ ប្លុកលោកខាងលិច ដែលមានសេដ្ឋកិច្ចជាប់ទ្រឹង ឬមានកំណើនតិចតួចនោះ និងប្រឈមមុខបញ្ហាមិនចេះចប់ ទំនងជាមិនអាចរកច្រកចេញអ្វីធំដុំនៅអំឡុងពេលកិច្ចប្រជុំ G-20 នេះឡើយ។ ចំណែកឯចិន និងឥណ្ឌាវិញ ត្រូវគេមើលឃើញថា ជាប៉ូលសេដ្ឋកិច្ចវិជ្ជមានសម្រាប់ពិភពលោក ជាពិសេសចិនតែម្ដង ដែលស្ថិតនៅចំបេះដូងនៃសេដ្ឋកិច្ចសកល និងអភិបាលកិច្ចពិភពលោក។
ប្រសិនបើមហាយក្សចិន អាចឆក់យកឱកាសនៃកិច្ចប្រជុំដ៏សំខាន់នេះ ដើម្បីផ្តល់នូវសមិទ្ធផលគួរឲ្យកត់សម្គាល់ណាមួយសម្រាប់ពិភពលោកនោះ តួនាទីដែលមិនអាចខ្វះបានរបស់ក្រុងប៉េកាំងលើឆាកអន្តរជាតិ នឹងកាន់តែចាក់គ្រឹះរឹងមាំបន្ថែមទៀត។ ឥទ្ធិពលរបស់ចិនដែលកើនឡើងជាលំដាប់ នឹងបន្តរីកសាយភាយនៅគ្រប់ទ្វីបទាំងអស់ តាមរយៈការផ្ដល់ជំនួយ ការវិនិយោគ និងការធ្វើជាពាណិជ្ជកម្មមិនរើសមុខ ហើយចិន នឹងក្លាយជាមហាអំណាចពិតប្រាកដរបស់ពិភពលោកមិនខាន៕
© រក្សាសិទ្ធិដោយ thmeythmey.com