អន្តរជាតិ
front ឥណ្ឌា រូបភាព៖ Indian Tribune
×![]()
ដោយ: ថ្មីៗ
ក្នុងរយៈពេល ៤ឆ្នាំខាងមុខ ឥណ្ឌានឹងក្លាយជាប្រទេសដែលមានប្រជាជនសកម្មច្រើនជាងគេបំផុតលើលោក។ ជាធម្មតា វានឹងនាំមកនូវប្រយោជន៍សេដ្ឋកិច្ច និងជំរុញវិស័យឧស្សាហកម្ម ពេលប្រទេសមួយមានប្រជាជនសកម្មច្រើន។ ប៉ុន្តែនៅឥណ្ឌា វានឹងនាំមកនូវវិបត្តិច្រើនជាងប្រយោជន៍ ជាពិសេសវិបត្តិគ្មានការងារធ្វើ និងបញ្ហាចលាចលទៅវិញ។
មហាយក្សអាស៊ីខាងត្បូងឥណ្ឌា នឹងក្លាយជាប្រទេសដែលមានប្រជាជនសកម្មច្រើនជាងគេលើកពិភពលោកក្នុងរយៈពេលបួនឆ្នាំខាងមុខនេះ។ កំណើនប្រជាជនសកម្មនេះ ហាក់បីដូចជាមិននាំមកនូវប្រយោជន៍ ជាពិសេសជួយដល់កំណើនសេដ្ឋកិច្ចឥណ្ឌាឡើយ តែវានាំមកនូវបញ្ហាច្រើនសម្រាប់ឥណ្ឌាទៅវិញ។ បញ្ហាទាំងនោះមានវិបត្តិគ្មានការងារធ្វើ និងអសន្តិសុខសង្គមជាដើម។
យោងតាមសារព័ត៌មាន Sputnik អ្នកសារព័ត៌មានឥណ្ឌាលោក Aakar Patel បានអះអាងថា កំនើនប្រជាជនសកម្មខ្ពស់នៅឥណ្ឌាក្នុងរយៈពេលប៉ុន្មានឆ្នាំខាងមុខនោះ នឹងនាំមកនូវបញ្ហាច្រើនហួសហេតុ។
អ្នកសារព័ត៌មានរូបនេះបានលើក យករបាយការណ៍មួយដែលចុះផ្សាយដោយ India Spend ដែលវាបង្ហាញថាប្រជាជនឥណ្ឌារហូតដល់ ៩៧ ភាគរយមានការងារដែលស្ថិតនៅក្នុងវិស័យដែលគ្មានការរៀបចំត្រឹមត្រូវ ពោលគឺគ្មានចំណូលផ្លូវការជាប្រចាំ ឬគ្មានការទទួលការគាំពារផ្នែកសន្តិសុខសង្គម។
ហើយយោងតាមអ្នកសារព័ត៌មាននេះដដែល ប្រជាជនឥណ្ឌាប្រហែល ៦០ ឯណោះដែលគ្រាន់តែមានការងារបណ្តោះអាសន្ន។
ចំណែកបញ្ហាមួយទៀតគឺ បញ្ហាទីផ្សារការងារនៅឥណ្ឌា។លោក Aakar Patel អះអាងថា វាមិនមានការងាថ្មីឡើយសម្រាប់ប្រជាជនសកម្ម។ ដូចឃើញស្រាប់ហើយ កំណើនការងារនៅឥណ្ឌាកើនឡើងទាបបំផុតក្នុងឆ្នាំ ២០១៥ ហើយការងារភាគច្រើនស្ថិតនៅក្នុងវិស័យកសិកម្មប៉ុណ្ណោះ។ ដូច្នេះ វានឹងបង្កើតជាបញ្ហា នៅពេលដែលកំណើនប្រជាជនសកម្មនិងពេញកម្លាំងធ្វើការងារខ្ពស់ពេកនៅពេលខាងមុខ ហើយតម្រូវការមនុស្សធ្វើការងារមានកម្រិតទាប។
បញ្ហាមួយទៀត គឺ ការសិក្សាក្នុងសង្គមឥណ្ឌាមានកម្រិតទាបខ្លាំង។ ប្រជាជនឥណ្ឌាភាគច្រើនហាក់បីដូចជាពិបាកទទួលបានការអប់រំដែលជួយបំពាក់បំប៉នជំនាញសំខាន់ៗដើម្បីទទួលបានការងារល្អ។
យ៉ាងណាក៏ដោយ រដ្ឋាភិបាលឥណ្ឌាបច្ចុប្បន្នរបស់លោក នារិន្ទ្រា ម៉ូឌី ហាក់បីដូចជាខ្នះខ្នែងខ្លាំងក្នុងការជួយបង្កើនសមត្ថភាព និងជួយឲ្យប្រជាជនឥណ្ឌាមានចំណេះជំនាញនិងវិជ្ជាជីវៈត្រឹមត្រូវ ដើម្បីអាចបំពេញតាមតម្រូវការងារ។ ប៉ុន្តែវាជាដំណោះស្រាយរយៈពេលវែង ហើយវាក៏ត្រូវការពេលវេលាយូរដែរ ទម្រាំបានផ្លែផ្កា៕
Tag:
ឥណ្ឌា
Aakar Patel
នារិន្ទ្រា ម៉ូឌី
© រក្សាសិទ្ធិដោយ thmeythmey.com
