អន្តរជាតិ
សេ្ដចឌូបៃ បណ្ដេញមន្ត្រី៩នាក់ចេញពីតំណែង ព្រោះចូលធ្វើការយឺត ![](https://image.thmeythmey.com/pictures/2016/08/31/sheikh-mohammed.jpg)
×![]()
ស្តេចឌូបៃ (Emir of Dubai) បានចេញបញ្ជាឲ្យមានការរុះរើការគ្រប់គ្រងនៅបុរីទីក្រុងនេះ ដោយរួមបញ្ចួលទាំងការដាក់ឲ្យចូលនិវត្តន៍មន្ត្រីជាន់ខ្ពស់៩នាក់។ បទបញ្ជារុះរើនេះ ធ្វើឡើងមួយថ្ងៃ បន្ទាប់ពីស្ដេចឌូបៃ បានបង្កការភ្ញាក់ផ្អើល ដោយបានទៅពិនិត្យការិយាល័យរដ្ឋាភិបាលដោយមិនប្រាប់មុន ហើយក៏រកឃើញថា មន្ត្រីជាច្រើនមិនទាន់មកដល់ ខណៈម៉ោង៧:៣០ ព្រឹកទៅហើយនោះ។
ព្រះអង្គម្ចាស់ Sheikh Mohammed bin Rashid al-Maktoum បានទៅទស្សនកិច្ចដោយមិនឲ្យដំណឹងជាមុន សំដៅត្រួតពិនិត្យការងារនៅតាមការិយាល័យមន្ត្រីស៊ីវិល កាលពីព្រឹកថ្ងៃអាទិត្យ ទី២៨ ខែសីហា ព្រោះថ្ងៃអាទិត្យ ជាថ្ងៃធ្វើការរបស់ទីក្រុងនេះ។ ប៉ុន្តែអ្វីដែលព្រះអង្គម្ចាស់នេះភ្ញាក់ផ្អើលនោះ គឺនៅតាមតុធ្វើការទាំងនោះមិនមានមន្ត្រីជាន់ខ្ពស់ អង្គុយធ្វើការឡើយ។
បើតាមវីដេអូ ដែលត្រូវបានបង្ហោះលើបណ្ដាញ Twitter គេសង្កេតឃើញ ព្រះអង្គម្ចាស់ Sheikh ដែលជានាយករដ្ឋមន្ត្រី និងជាអនុប្រធានាធិបតីនៃអេមីរ៉ាតអារ៉ាប់រួមដែរនោះ យាងចូលការិយាល័យនៃនាយកដ្ឋានដែនដី និងនាយកដ្ឋានអភិវឌ្ឍសេដ្ឋកិច្ច ដែលមិនទាន់មានមន្ត្រីមកធ្វើការនៅឡើយនោះ។ លោក Mona al-Marri មន្ត្រីព័ត៌មានឌូបៃ និយាយ ទស្សនកិច្ចនេះ គឺសារមួយសម្រាប់មន្ត្រីទាំងអស់។
យោងតាមសារព័ត៌មាន Telegraph ក្រៅពីនាយកដ្ឋានទាំងពីរខាងលើ ព្រះអង្គម្ចាស់ Sheikh ក៏បានទៅកាន់ព្រលានយន្តហោះអន្តរជាតិក្រុងឌូបៃ។ នៅទីនោះ មន្ត្រីផ្នែកអន្តោប្រវេសន៍ គឺមកធ្វើការទាន់ម៉ោងធ្វើការ និងរៀបរយទាំងអស់គ្នា។ មួយថ្ងៃបន្ទាប់ពីការចុះត្រួតពិនិត្យ មន្ត្រី៩នាក់មកពីអង្គភាពប្រតិបត្តិនៃក្រុងឌូបៃ រួមទាំងមន្ត្រីថ្នាក់អគ្គនាយក និងអគ្គនាយករងផងនោះ ត្រូវបានដាក់ឲ្យចូលនិវត្តន៍។
គេមិនដឹងច្បាស់ពីការបណ្ដេញចេញមន្ត្រីទាំងនេះឡើយ ប៉ុន្តែព្រះអង្គម្ចាស់ Sheikh ក៏បានអរគុណមន្ត្រីទាំង៩នាក់ ចំពោះសមិទ្ធផលកន្លងមក។ ស្ដេចឌូបៃអង្គនេះ បញ្ជាក់ថា លោកចង់ឲ្យអ្នកជំនាន់ក្រោយ មកកាន់តំណែងគ្រប់គ្រងម្ដង ដើម្បីផ្ដល់សេវាកម្មដែលមានគុណភាពសម្រាប់ប្រជាជនឌូបៃ។
តាមពិតទៅ ប្រមុខបុរីរដ្ឋ Dubai អង្គនេះ ត្រូវគេទទួលស្គាល់ចំពោះទស្សនកិច្ចមិនប្រាប់មុន ដើម្បីត្រួតពិនិត្យការងាររបស់មន្ត្រីទាំងឡាយ។ ពោលគឺព្រះអង្គធ្វើដូចនេះ ចាប់តាំងពីការចាប់ផ្ដើមដំណើការអភិវឌ្ឍទីក្រុងនេះ ពីវាលខ្សាច់ ទៅជាមជ្ឈមណ្ឌលពាណិជ្ជកម្មដ៏ធំ និងទំនើបមួយនៅលើពិភពលោក៕
© រក្សាសិទ្ធិដោយ thmeythmey.com