ករណីពលករក្រៅប្រទេស៖ លោក គល់ បញ្ញា ថា កម្ពុជាគួរយកគំរូការបោះឆ្នោតនៅភូមា

បទយកការណ៍ / បទសម្ភាសន៍

ករណីពលករក្រៅប្រទេស៖ លោក គល់ បញ្ញា ថា កម្ពុជាគួរយកគំរូការបោះឆ្នោតនៅភូមា

04, Sep 2016 , 10:03 am

រូបភាព

ដោយ:

ភ្នំពេញ៖ លោក គល់ បញ្ញា នាយកប្រតិបត្តិអង្គការ ខុមហ្វ្រែល ដែលបានអញ្ជើញទៅសង្កេតការណ៍ ការបោះឆ្នោតនៅភូមា កាលពីចុងឆ្នាំ២០១៥ បានថ្លែងថា ពលករ និងកម្មករនៅក្រៅប្រទេសរបស់ភូមា គឺពួកគេអាចបោះឆ្នោតនៅតាមស្ថានទូតប្រទេសដែលពួកគេរស់នៅ និងធ្វើការងារ ដោយមិនចាំបាច់មកបោះឆ្នោតនៅភូមានោះទេ។ ដោយឡែក កម្មករ ពលករ មន្ត្រីរាជការ … ដែលកំពុងធ្វើការងារនៅទីប្រជុំ ឬទីក្រុង ពួកគេអាចបោះឆ្នោតនៅកន្លែងការងារ ដោយមិនចាំបាច់ត្រឡប់ទៅបោះឆ្នោតនៅស្រុកកំណើតឡើយ។ តើភូមាបានរៀបចំយន្តការអ្វីខ្លះ ដើម្បីផ្តល់សិទ្ធិបោះឆ្នោតដល់អ្នកចំណាកស្រុក?

ជាបន្តសូមអញ្ជើញស្តាប់បទសម្ភាសន៍រវាង លោក រ៉ឹម ភារី អ្នកយកព័ត៌មានរបស់គេហទំព័រថ្មីៗ ជាមួយ លោក គល់ បញ្ញា នាយកប្រតិបត្តិគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា Comfrel ដូចតទៅ៖

កាលពីចុងឆ្នាំ២០១៥កន្លងទៅ លោក គល់ បញ្ញា ត្រូវបានគេអញ្ជើញឲ្យចូលរួមសង្កេតការណ៍បោះឆ្នោត នៅប្រទេសមីយ៉ាន់ម៉ា(ភូមា) ដែលការបោះឆ្នោតនៅភូមា ត្រូវបានសហគមន៍អន្តរជាតិ និងគ្រប់ភាគីគណបក្សនយោបាយ មានកោតសរសើរចំពោះភាពអព្យាក្រិត្យ សេរី និងយុត្តិធម៌។ ក្រៅពីនេះ លោក គល់ បញ្ញា បានអះអាងថា ប្រព័ន្ធបោះឆ្នោតនៅភូមា បានគោរពសិទ្ធិបោះឆ្នោតរបស់ពលរដ្ឋនៅគ្រប់ស្ថានភាព និងគ្រប់ទីកន្លែង។ ជាក់ស្តែង លោកថា ពលករ កម្មករ និងអ្នកចំណាកស្រុកនៅក្រៅប្រទេស គឺពួកគេមានសិទ្ធិបោះឆ្នោតនៅតាមស្ថានទូត ដែលប្រជាជនភូមាកំពុងធ្វើការ និងស្នាក់នៅ ដោយមិនចាំបាច់ឲ្យពួកគេ ធ្វើដំណើរទៅបោះឆ្នោតនៅប្រទេសភូមាឡើយ។ ចំណែកនៅក្នុងប្រទេសភូមាវិញ កម្មករ មន្ត្រីរាជការ…ដែលការងារនៅទីប្រជុំជនឬទីក្រុង គឺសុទ្ធសឹងអាចបោះឆ្នោតនៅកន្លែងការងារបាន ដោយមិនចាំបាច់វិលទៅបោះឆ្នោតនៅស្រុកកំណើតនោះឡើយ។ សូម្បីតែអ្នកជាប់ពន្ធធនាគារ ក៏អាចមានសិទ្ធិបោះឆ្នោតផងដែរ ដោយអ្នករៀបចំការបោះឆ្នោតនៅភូមា ធ្វើការរៀបចំការិយាល័យនៅក្នុងពន្ធធនាគារតែម្តង។

លោក គល់ បញ្ញា បានបន្ថែមថា ពលករ កម្មករ និងអ្នករស់នៅក្រៅប្រទេស គឺអ្នករៀបចំការបោះឆ្នោតនៅភូមា បានរៀបចំឲ្យមានការបោះឆ្នោតមុនថ្ងៃកាលបរិច្ឆេទបោះឆ្នោតនៅក្នុងប្រទេស។ ឯកម្មករ មន្ត្រីរាជការ និងអ្នកជាប់ពន្ធធនារ ដែលស្នាក់នៅ និងធ្វើការងារនៅទីប្រជុំ ឬទីក្រុង ក៏រៀបចំការបោះឆ្នោតមុនថ្ងៃកាលបរិច្ឆេទបោះឆ្នោតផងដែរ។ លោកពន្យល់ថា សំឡេងឆ្នោតរបស់ពួកគេ ត្រូវបានបញ្ជូនទៅការិយាល័យនៅស្រុកកំណើត ឲ្យបានមុនថ្ងៃរាប់សន្លឹកឆ្នោត ដើម្បីរាប់ជាមួយសំឡេងឆ្នោតទាំងអស់ក្នុងការិយាល័យ នៅស្រុកំណើតរបស់ពួកគេតែម្តង។

ឆ្លើយនឹងសំណួររបស់សារព័ត៌មានថ្មីៗថា តើមូលហេតុអ្វីបានជាកម្ពុជាមិនយកគំរូការបោះឆ្នោតនៅភូមាជុំវិញ សិទ្ធិពលករ និងកម្មករ ក្រៅប្រទេស? លោក គល់ បញ្ញា បានឆ្លើយភ្លាមថា គឺ កម្ពុជាអាចធ្វើបែបនេះបាន ពីព្រោះ សព្វថ្ងៃនេះ ការចុះឈ្មោះបោះឆ្នោត គឺធ្វើតាមប្រព័ន្ធទំនើប(កុំព្យូទ័រ)។ ប៉ុន្តែ លោកបានទទួលព័ត៌មានថា ការដែលគណៈកម្មាធិការជាតិរៀបចំការបោះឆ្នោត(គជប) មិនរៀបចំការបោះឆ្នោតនៅក្រៅប្រទេសនេះ គឺបណ្តាលមកពីបញ្ហាបច្ចេកទេស និងថវិកា។

ទោះបីគ្មានតួរលេខពិតប្រាកដ តែបើការប៉ាន់ស្មានក្រៅផ្លូវរបស់មជ្ឈដ្ឋានមួយចំនួន បានអះអាងថា បច្ចុប្បន្ន ពលករ និងកម្មករខ្មែរ ដែលរស់នៅ និងធ្វើការងារនៅក្រៅប្រទេស ដូចជា ប្រទេសថៃ កូរ៉េខាងត្បូង ម៉ាឡេស៊ី(១៤,០០០នាក់) និងប្រទេសនានានៅទូទាំងពិភពលោក គឺមានប្រមាណជាង១លាននាក់៕